ឆ្នាំថ្មី៖រដ្ឋមន្ត្រីលេចធ្លោ៣រូប ប្តេជ្ញាបន្តការកែទម្រង់ការងារក្នុងក្រសួងរបស់ខ្លួន

ជាតិ

ឆ្នាំថ្មី៖រដ្ឋមន្ត្រីលេចធ្លោ៣រូប ប្តេជ្ញាបន្តការកែទម្រង់ការងារក្នុងក្រសួងរបស់ខ្លួន

13, Apr 2016 , 2:03 pm

រូបភាព

ដោយ: ខន ចំប៉ា

នៅក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរនេះ រដ្ឋមន្ត្រីដែលមានប្រជាប្រិយភាព៣រូប បានចេញមុខប្តេជ្ញាបន្តអនុវត្តន៍ការងាររបស់ឲ្យមានប្រសិទ្ធភាព និងបន្តធ្វើការកំណែទម្រង់ស៊ីជម្រៅនៅក្នុងក្រសួងរបស់ខ្លួន។

រដ្ឋមន្ត្រីទាំង៣រូបគឺ លោករដ្ឋមន្ត្រីក្រសួងអប់រំ ហង់ ជួន ណារ៉ុន លោក ជា សុផារ៉ា ដែលទើបចូលកាន់តំណែងនៅក្រសួងរៀបចំដែនដី នគរូបនីយកម្ម និងសំណង់ និងលោក ស៊ុន ចាន់ថុល រដ្ឋមន្ត្រីថ្មីនៃក្រសួងសាធារណការណ និងដឹកជញ្ជូន។

លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងពីការប្តេជ្ញាចិត្តរបស់ខ្លួនប្រាប់សារព័ត៌មានថ្មីៗថា លោកនឹងខិតខំអនុវត្តន៍ការងារឲ្យសម្រេចបានតាមផែនការអប់រំសម្រាប់ឆ្នាំ២០១៦ ដែលបានដាក់ចេញនៅក្នុងសន្និបាតបូកសរុបការងារអប់រំប្រចាំឆ្នាំ២០១៥ និងទិសដៅការងារសម្រាប់ឆ្នាំ២០១៦ ។ ទន្ទឹមជាមួយគ្នានោះ លោក ក៏បានបញ្ជាក់ពីការបន្តធ្វើកំណែទម្រង់វិស័យអប់រំ តាំងពីថ្នាក់បឋម រហូតដល់ឧត្តមសិក្សា ដោយក្នុងពង្រឹងទាំងគុណភាពគ្រូ និងសិស្ស។ លោកហង់ ជួន ណារ៉ុនថា៖«កំណែទម្រង់ថ្នាក់ទី១២យើងបានធ្វើ២ឆ្នាំមកហើយ ហើយយើងនៅតែបន្តធ្វើទៀត ហើយមិនមែនតែថ្នាក់បាក់ឌុបទេ ឆ្នាំនេះយើងចាប់ផ្តើមថ្នាក់ទី៩ទៀត ដោយដាក់បញ្ចូលវិញ្ញាសារសរសេរតាមអាន និងតែងសេចក្តី។ សម្រាប់គ្រឹះស្ថានឧត្តមសិក្សា ត្រូវបន្តអនុវត្តន៍គោលការណ៍រៀន និងបង្រៀនរបស់ខ្លួនឲ្យបានខ្ជាប់ខ្ជួន ហើយក្រសួងនឹងធ្វើការតាមដានលើបញ្ហានេះយ៉ាងយកចិត្តដាក់»។

សម្រាប់ការពង្រឹងគុណភាពអប់រំនៅកម្រិតបឋមសិក្សាវិញ លោកបណ្ជាក់យ៉ាងនេះថា ក្រសួងទើបតែសម្ពោធឲ្យចាក់ផ្សាយកម្មវិធី«ស្រឡាញ់កូន»ដែលជាកម្មវិធីអប់រំមាតាបិតាដែលមានកូនអាយុពី០ដល់ក្រោម៦ឆ្នាំ និងស្ត្រីមានផ្ទៃពោះ ដែលត្រូវទទួលបាននូវចំណេះដឹងងាយៗដើម្បីយកទៅថែទាំ គាំពារ និងអប់រំកូនតូចនៅផ្ទះ។ ជាមួយគ្នានោះ ក្រសួងបានបង្កើតកម្មវិធីអំណាន និងពង្រឹងមុខវិជ្ជាគណិតវិទ្យាពីកុមារដោយផ្តោតលើក្មេងថ្នាក់ទី១ដល់ទី៣ នៅតាមបណ្តាខេត្តមួយចំនួនដូចជាខេត្តកំពង់ចាម និងខេត្តព្រៃវែងជាដើម។ ទាក់ទងនឹងវិស័យកីឡាវិញ លោករដ្ឋមន្ត្រីក្រសួងអប់រំ បានបញ្ជាក់ថាក្រសួងនឹងបន្តកសាងហេដ្ឋារចនាសម្ព័ន្ធនានាដូចជានៅកីឡដ្ឋានជាតិឡាំពិក ពហុកីឡដ្ឋានមរតកតេជោ ការបណ្តុះបណ្តាលគ្រូ កីឡាករ ចៅក្រម និងអាជ្ញាកណ្តាលជាដើម។ ជាមួយគ្នានោះ ក្រសួងបានណែនាំឲ្យរៀបចំការប្រកួតកីឡា ការប្រកួតកីឡាថ្នាក់ជាតិរៀងរាល់២ឆ្នាំម្តង ពង្រឹងសហព័ន្ធកីឡាជាតិជាដើម។

សម្រាប់រដ្ឋមន្ត្រីថ្មីក្រសួងរៀបចំដែនដី នគររូបនីយកម្ម និងសំណង់ លោក ជា សុផារ៉ា បានថ្លែងនៅក្នុងពិធីផ្ទេរតំណែង កាលពីថ្ងៃទី៥ខែមេសាថា លោកនឹងរៀបចំការងារពាក់ព័ន្ធនឹងវិស័យរបស់ខ្លួនឲ្យមានតម្លាភាព។ បន្ទាប់ពីថ្លែងអំណរគុណរដ្ឋាភិបាល និងរដ្ឋសភា ដែលផ្តល់ទំនុកចិត្ត លើរូបលោកធ្វើជារដ្ឋមន្ត្រីក្រសួងរៀបចំដែនដី នៅពាក់កណ្តាលអាណត្តិរដ្ឋាភិបាលអាណត្តិទី៥នេះ លោក ជា សុផារ៉ា បានប្តេជ្ញាចំពោះមុខសម្តេច ស ខេង រដ្ឋមន្ត្រីក្រសួងមហាផ្ទៃ និងមន្ត្រីក្រសួងរៀបចំដែនដី នគរូបនីយកម្ម និងសំណង់ចាស់ថា លោកនឹងបន្តពង្រឹងការងារ គ្រប់គ្រងមន្ត្រី វិធានអនុវត្តស្ថាប័ន ឲ្យមន្ត្រីពង្រឹងការអនុវត្តការងារ ច្បាប់ និងសេវាសាធារណៈ តាមប្រសាសន៍ប្រមុខរដ្ឋាភិបាលឲ្យបាន គឺធ្វើឲ្យបាន ធ្វើឲ្យលឿន និងធ្វើឲ្យមានតម្លាភាព។ លោក ជា សុផារ៉ា បន្តទៀតថា លោកនឹងជំរុញការងារកកស្ទះចុះបញ្ជីដីធ្លី ទប់ស្កាត់ការបំពានដីរដ្ឋ ការបំពានដីធ្លីពលរដ្ឋ ទប់ស្កាត់ការសង់សំណង់ខុសច្បាប់ ការពារបរិស្ថានសំណង់ និងបន្តការងារបែងចែកដីធ្លីជូនពលរដ្ឋក្រីក្រ យោធិន ព្រមទាំងបន្តពង្រឹងកាងារជាមួយរដ្ឋបាលថ្នាក់ក្រោមជាតិ។

ចំណែកឯរដ្ឋមន្ត្រីមួយរូបទៀតដែលមានប្រជាប្រិយភាពដែរនោះ គឺ លោក ស៊ុន ចាន់ថុល អតីតរដ្ឋមន្ត្រីក្រសួងពាណិជ្ជកម្ម ដែលត្រូវរដ្ឋាភិបាលតែងតាំង ទេសរដ្ឋមន្ត្រី និងជារដ្ឋមន្ត្រីក្រសួងសាធារណៈ និងដឹកជញ្ជូន។ នៅក្នុងពិធីផ្ទេរតំណែងរដ្ឋមន្ត្រីក្រសួងសាធារណៈការ និងដឹកជញ្ជូន នៅរសៀលថ្ងៃទី៦ខែមេសា លោក ស៊ុន ចាន់ថុល បានប្រកាសថា លោកមានផែនការ១រយថ្ងៃ ដើម្បីរៀបចំយុទ្ធសាស្ត្រកែទម្រង់សេវាសាធារណៈនៅក្នុងក្រសួងថ្មី ដែលលោកទើបចូលកាន់តំណែងនេះ ឲ្យមានប្រសិទ្ធភាពខ្ពស់។ បញ្ហាឆៀករថយន្ត បណ្ណសម្គាល់យានយន្ត និងបណ្ណបើកបរ គឺជាការងារអាទិភាពរបស់ លោករដ្ឋមន្ត្រីក្រសួងសាធារណការ និងដឹកជញ្ជូនថ្មីរួបនេះ ត្រូវដោះស្រាយមុនគេ។

នៅក្នុងក្រសែភ្នែកអ្នកវិភាគវិញ បានមើលឃើញពីភាពវិជ្ជមានសម្រាប់រដ្ឋមន្ត្រីថ្មីនៃក្រសួងរៀបចំដែនដី និងក្រសួងសាធារណការដែរ។ អ្នកវិភាគនយោបាយ លោក មាស នី យល់ឃើញថា ការផ្លាស់ប្តូរលោក ស៊ុន ចាន់ថុល មកទេសរដ្ឋមន្ត្រី និងជារដ្ឋមន្ត្រីក្រសួងសាធារណៈ និងដឹកជញ្ជូនពេលនេះ ជាចំណុចល្អមួយដែលអាចជួយដោះស្រាយបញ្ហាហេដ្ឋារចនាសម្ព័ន្ធបានច្រើនជាងរដ្ឋមន្ត្រីចាស់ ព្រោះរដ្ឋមន្ត្រីរូបនេះ មានបទពិសោធន៍ច្រើនក្នុងការដឹកនាំក្រសួងនេះ។ អ្នកវិភាគរូបនេះ ក៏បានសម្លឹងឃើញលោក ជា សុផារ៉ា ដែលបច្ចុប្បន្នជារដ្ឋមន្ត្រីក្រសួងអភិវឌ្ឍជនបទ ត្រូវតែងតាំងជាទេសរដ្ឋមន្ត្រី និងជារដ្ឋមន្ត្រីក្រសួងដែនដីនគរូបនីយកម្មនិងសំណង់ដែរ។ លោកថា លោក ជា សុផារ៉ា នឹងអាចជួយដោះស្រាយបញ្ហាជម្លោះដីធ្លី និងផ្ទះសម្បែងប្រ ជាពលរដ្ឋបានច្រើន ព្រោះរដ្ឋមន្ត្រីរូបនេះក៏ជាអតីតអភិបាលក្រុង ដែលបានរៀបចំរបៀបរៀបរយ និងដោះស្រាយបញ្ហាសង្គមបានល្អកន្លងមកដែរ៕