ពីនេះ ពីនោះ
ចូលឆ្នាំខ្មែរ កូនបែរធ្វើឲ្យឪពុកអ្នកម្ដាយស្រក់ទឹកភ្នែក
× ភ្នំពេញ៖ មាតាបិតាគឺជាព្រះរស់សម្រាប់កូនប្រុសស្រីទាំងឡាយ។ កូនប្រុសស្រីទាំងឡាយមានជីវិត មានសុខភាពល្អ រស់នៅក្នុងភាពថ្លៃថ្នូរ មានសុខសុភមង្គល មានស្នាមញញឹមក្នុងជីវិតក៏អាស្រ័យលើគុណរបស់លោកទាំងពីរ។ ចុះតើលោកបានផ្ដល់អ្វីខ្លះដល់កូនៗទាំងឡាយ? តើកូនៗទាំងឡាយចាំបាច់ទេក្នុងការតបស្នងនូវគុណោបការៈរបស់លោកទាំងទ្វេរ?
កូនប្រុសស្រីទាំងឡាយអ្នកត្រូវដឹងថា មាតាបិតា គឺជាអ្នកដែលបានផ្ដល់កំណើតឲ្យកូនប្រុសស្រីមានជីវិតនៅលើលោកនេះ ហើយក៏ជាបុគ្គលដែលស្ម័គ្រចិត្ត ចូលខ្លួនមកធ្វើជាអ្នកបម្រើកូនៗប្រុសស្រីរបស់លោកដែរ។ មាតាបិតាគឺជាអ្នកដែលផ្ដល់នូវកិត្តិយសគ្រប់បែបយ៉ាងដល់កូន ព្រោះថា អ្វីគ្រប់យ៉ាងប្រសិនបើគ្មានការរៀបចំពីមាតាបិតា ទេកូនៗមិនអាចទទួលបានកិត្តិយសនោះដែរ គឺចាប់តាំងពីការចាប់ផ្ដើមជីវិតរបស់កូនប្រុសស្រីទាំងឡាយទាំងពួង គឺលោកបានរៀបចំគ្រប់បែបយ៉ាង ទៅតាមលទ្ធភាពរបស់លោកអាចធ្វើបាន។ មាតាបិតាគឺជាព្រះរបស់កូន ដែលកូនប្រុសស្រីត្រូវតែគោរពប្រណិប័តន៍។
មាតាបិតាគឺជាកងការពាររបស់កូន ចិញ្ចឹមកូន ថ្នាក់ថ្នមរក្សាកូន មិនថានៅក្នុងកាលៈទេសៈយ៉ាងណាក៏ដោយ គឺលោកទាំងពីរមានមុខចេញជានិច្ចក្នុងកិច្ចការទាំងនេះ។ មាតាបិតាជាឃ្លាំងប្រាក់សម្រាប់កូនប្រុសស្រីទាំងឡាយ។ លោកគឺជា ជាគ្រូពេទ្យ ព្យាបាលជំងឺដួងចិត្ត ជំងឺឯការ ជំងឺខ្វះភាពកក់ក្ដៅ ជំងឺបាក់ទឹកចិត្ត យ៉ាងមានប្រសិទ្ធភាព។ មិនតែប៉ុណ្ណោះមាតាបិតាជាគ្រូអាចារ្យ ដែលតែងតែអប់រំ បង្ហាត់បង្ហាញ ដល់កូនប្រុសស្រីទាំងឡាយឱ្យចេះនិយាយ ឱ្យចេះដើរ ចេះឈរ ចេះស្លៀកពាក់ ទៅតាមសភាពនៃវ័យរបស់កូនៗ។
លោកសុខចិត្តលះបង់សេចក្ដីសុខផ្ទាល់ខ្លួន ក្នុងជីវិតជាអ្នកតាមបម្រើថែរក្សាកូន ប៉ុន្តែលោកទាំងទ្វេរមិនដែលថ្ងូរថាលំបាក និងបាត់បង់សេចក្ដីសុខខ្លួនឯងឡើយ ឲ្យតែកូនរបស់លោកមានសេចក្ដីសុខ បើទោះបីលោកត្រូវស្ថិតនៅកណ្ដាលថ្ងៃក្ដៅហួតហែងយ៉ាងណា ភ្លៀងផ្គររន្ទះ ទោះលោកត្រូវសម្រក់ទឹកភ្នែករាប់លានដំណក ញើសលោកហ៊ូរដូចទឹក ក៏លោកមិនរុញរាក្នុងតួនាទីជាមាតាបិតាឡើយ។
ផ្ទុយទៅវិញ ក្នុងកំឡុងពេលបុណ្យចូលឆ្នាំថ្មីប្រពៃណីជាតិខ្មែរ មានកូនខ្មែរច្រើនណាស់ដែលបានធ្វើឲ្យឪពុកម្ដាយខ្លួនស្រក់ទឹកភ្នែក ព្រួយបារម្ភ និងទទួលបានពាក្យតិះដៀលថា មានកូនឥតពូជជាដើម។ ការទទួលបានពាក្យបែបនេះព្រោះតែកូនៗខ្មែរមួយចំនួនបានយកថ្ងៃបុណ្យចូលឆ្នាំខ្មែរជាថ្ងៃផឹកគ្រឿងស្រវឹង បើកបរគ្មានគិតគោរពច្បាប់ ឈ្លោះប្រកែកគ្នា កាប់ចាក់គ្នា ជាពិសេសនៅតាមស្រុកស្រែចំការ។ អ្វីដែលធ្វើឪពុកម្ដាយមួយចំនួនកាន់តែឈឺចាប់នោះគឺ មានយុវជនខ្លះមានចំណេះដឹងតិចតូច ចាប់ផ្ដើមមើលងាយឪពុកម្ដាយខ្លួនឯង យុវជនខ្លះមិនស្ដាប់សម្ដីទូន្មានឪពុកម្ដាយ រហូតមានអ្នកខ្លះជេប្រមាថឪពុកម្ដាយខ្លួនឯងទៅទៀត។
តាមពិតទៅ គ្រប់អ្នកមានគុណទាំងអស់ប្រហែលមិនទាមទារឲ្យកូនខ្លួនឯងមកតបស្នងគុណរបស់លោកដែលបានបូជាទាំងកម្លាំងកាយចិត្តទៅលើកូនៗទេ។ លោកគ្រាន់តែចង់ឃើញកូនលោកជាមនុស្សល្អ មានតម្លៃ នោះប្រហែលជាក្ដីប្រាថ្នាដ៏សំខាន់សម្រាប់លោក។ ប៉ុន្តែជាក់ សូម្បីតែបំណងតូចមួយរបស់លោក ក៏កូនខ្មែរមួយចំនួនធំមិនអាចធ្វើបាន។
ហេតុនេះចូលកុលបុត្រកុលធីតាទាំងឡាយ មេត្តាកុំធ្វើឲ្យទឹកភ្នែកអ្នកមានគុណរបស់អ្នក ស្រក់ចុះព្រោះតែអំពើបាបរបស់អ្នក។ ចូលអ្នកកុំធ្វើឲ្យលោកទាំងពីរដេកព្រួយព្រោះតែទង្វើនិងសកម្មភាពរបស់អ្នក។ ចូលកុំធ្វើឲ្យលោកទាំងពីរខ្មាស់គេព្រោះតែឥរិយាបថនិងពាក្យសម្ដីរបស់អ្នក។ ចូលអ្នកកុំធ្វើឲ្យការលះបង់ របស់លោកក្លាយទៅជាការលះបង់ដែលគ្មានន័យ។ ជាពិសេសទៅទៀតនោះ គឺចូលកុំឲ្យជីវិតចុងក្រោយរបស់ឪពុកម្ដាយអ្នក ធ្វើដំណើរទៅទាំងមិនដែលបានស្គាល់ថា អ្វីទៅជាភាពសប្បាយរីករាយក្នុងជីវិត និងការលាចាកលោកទៅទាំងបិទភ្នែកមិនជិត។ ផ្ទុយទៅវិញ ចូលកូនប្រុសស្រីទាំងឡាយត្រូវធ្វើការតបស្នងគុណរបស់លោកវិញ ទៅតាមលទ្ធភាពដែលខ្លួនអាចធ្វើបាន សំខាន់គឺមិនធ្វើឲ្យលោកស្រក់ទាំងភ្នែក។ ប៉ុន្តែត្រូវធ្វើឲ្យលោកសប្បាយចិត្ត និងមានមោទនភាពចំពោះការលះបង់របស់លោក។
© រក្សាសិទ្ធិដោយ thmeythmey.com