ក្រោយបានសិទ្ធិចូលរួមអូឡាំពិក ស៊ន សៀវម៉ី ឈ្នះមេដាយប្រាក់មួយទៀតនៅហ្វីលីពីន

កីឡាជាតិ

ជាតិ

ក្រោយបានសិទ្ធិចូលរួមអូឡាំពិក ស៊ន សៀវម៉ី ឈ្នះមេដាយប្រាក់មួយទៀតនៅហ្វីលីពីន

19, Apr 2016 , 11:10 am

រូបភាព

ដោយ:

កីឡាការិនីតេក្វាន់ដូជម្រើសជាតិ ស៊ន សៀវម៉ី បន្ទាប់ពីឈ្នះមេដាយមាស និងទទួលបានសិទ្ធចូលរួមប្រកួតក្នុងព្រឹត្តិការណ៍កីឡាអូឡាំពិក (Olympic Games 2016) នៅប្រទេសប្រេស៊ីល កីឡាការិនីរូបនេះ បានឈ្នះមេដាយប្រាក់មួយទៀត នាការប្រកួតកីឡាតេក្វាន់ដូជើងឯកទី្វបអាស៊ីឆ្នាំ២០១៦ នៅប្រទេសហ្វីលីពីន កាលពីរាត្រីថ្ងៃទី១៨ ខែមេសា ឆ្នាំ២០១៦ ។

កីឡាការិនីតេក្វាន់ដូជម្រើសជាតិកម្ពុជា ស៊ន សៀវម៉ី បានឈ្នះមេដាយប្រាក់មួយគ្រឿងទៀត ក្រោយពីចាញ់កីឡាការិនីកូរ៉េខាងត្បូងក្នុងវគ្គផ្តាច់ព្រ័ត្រ នាការប្រកួតកីឡាតេក្វាន់ដូជើងឯកទ្វីបអាស៊ី ( ASIAN TAEKWONDO CHAMPIONSHIPS 2016 ) ក្នុងទីក្រុង Manila ប្រទេសហ្វីលីពីន កាលពីយប់មិញនេះ។

នេះជាមេដាយទីពីរហើយសម្រាប់កីឡាការិនីតេក្វាន់ដូជម្រើសជាតិម្នាក់នេះដែលដណ្តើមបានពីការប្រកួតជើងឯកទ្វីបអាស៊ី ក្នុងទីក្រុង Manila ប្រទេសហ្វីលីពីននេះ ដោយកាលពីថ្ងៃទី១៦ ខែមេសា រូបគេបានឈ្នះមេដាយមួយក្រោយពីយកឈ្នះកីឡាការិនីតាហ្ស៊ីគីស្ថាន Mokhru Khalimova ដោយពិន្ទុ ២-១ ក្នុងវគ្គពាក់កណ្តាលផ្តាច់ព្រ័ត្រ រួចបានបន្តយកឈ្នះលើកីឡាការិនីជើងខ្លាំងរបស់ម្ចាស់ផ្ទះហ្វីលីពីន Kirstie Alora ដោយពិន្ទុ ៥-០ នៅវគ្គផ្តាច់ព្រ័ត្រ។

គួរបញ្ជាក់ថា ការឈ្នះមេដាយមាស របស់កីឡាការិនីតេក្វាន់ដូ ស៊ន សៀវម៉ី នេះ គឺជាការសាងប្រវត្តិសាស្ត្រថ្មីមួយទៀតជូនមាតុភូមិកម្ពុជា ព្រោះកម្ពុជាទទួលបានសិទ្ធពេញលេញសម្រាប់ការចូលរួមប្រកួតក្នុងព្រឹត្តិការណ៍ Olympic Games 2016 នៅប្រទេសប្រេស៊ីល ដោយមិនបាច់ប្រើ Wild Card៕