កីឡាជាតិ
ជាតិ
ខេត្តកំពង់ឆ្នាំងស្វាគមន៍យុវជនបឹងកេត ខណៈក្រុមនៅលីកកំពូលចំនួន៥ជួបក្រុមឡើងពីវគ្គជម្រុះ
×
ការប្រកួតតាមពូលនៃដំណាក់កាលផ្តាច់ព្រ័ត្រពានរង្វាន់សម្តេច ហ៊ុន សែន ឆ្នាំ២០១៦ បានឈានដល់សប្តាហ៍ទី៣ ហើយ សម្រាបា់ការប្រកួតនៅថ្ងៃពុធ ទី២០ ខែមេសា នេះ ដោយមានជំនួប៣គូនៅក្នុងពូល A និង៣គូនៅក្នុងពូល B។ ខេត្តកំពង់ឆ្នាំង ស្វាគមន៍ ក្រុមយុវជនបឹងកេតកំពង់ចាម ខណៈក្រុមចំនួន៥នៅក្របខណ្ឌកំពូលមិត្តហ្វូនខេមបូឌានលីក ជួបក្រុមឡើងមកពីវគ្គជម្រុះបឋម។
ក្នុងពូល A ជាជំនួបរវាងក្រុមដែលឡើងមកពីវគ្គជម្រុះបឋមដូចគ្នា ដោយខេត្តកំពង់ឆ្នាំង នឹងបើកទ្វារកីឡដ្ឋានរបស់ខ្លួន ស្វាគមន៍ក្រុមភ្ញៀវ យុវជនបឹងកេតកំពង់ចាម ក្រោយពីយកស្មើជាមួយក្រុមនៅក្នុងក្របខណ្ឌមិត្តហ្វូនខេមបូឌានលីក ខេមបូឌានថាយហ្គឺរ ២-២ កាលពីសប្តាហ៍ទីមួយ។
ចំណែកនៅក្នុងពូល A ដដែល ក្រុមខេមបូឌានថាយហ្គឺរ ត្រូវជួបប្រកួតជាមួយក្រុមលេខ២ក្នុងពូល A នៃវគ្គជម្រុះបឋម ខេត្តកណ្តាល នៅកីឡដ្ឋានវេស្ទើន ខណៈក្រុមព្រះខ័នរាជស្វាយរៀង បើកកីឡដ្ឋានរបស់ខ្លួនលើកដំបូងស្វាគមន៍ក្រុមកំពង់ផែស្វយ័តខេត្តព្រះសីហនុ។
នាការប្រកួតក្នុងពូល B ពហុកីឡដ្ឋានជាតិ នឹងក្លាយជាទីតាំងនៃជំនួបរវាងក្រុមបឹងកេតអង្គរអែហ្វស៊ី និងក្រុមលេខ២ ពូល B នៃវគ្គជម្រុះបឋម ខេត្តព្រៃវែង ខណៈកីឡដ្ឋានកងយោធពលខេមរភូមិន្ទជាទីតាំងនៃជំនួបរវាងក្រុម ក្រសួងការពារជាតិ និងក្រុមលេខ១ពូល F នៃវគ្គជម្រុះបឋម ខេត្តស្ទឹងត្រែង។ ចំណែកក្រុមអាស៊ីអឺរ៉ុបយូណាយធីត ជួបក្រុមលេខ២ពូល C ដែលឡើងពីវគ្គជម្រុះបឋម កងរាជអាវុធហត្ថខេត្តកំពង់ធំ នៅកីឡដ្ឋានជាតិ៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី២០ ខែមេសា នេះ៖
ពូល A៖
-ម៉ោង៣:៣០-ខេមបូឌានថាយហ្គឺរ ជួប ខេត្តកណ្តាល នៅកីឡដ្ឋានវេស្ទើន
-ម៉ោង១៨:០០-ព្រះខ័នរាជស្វាយរៀង ជួប កំពង់ផែស្វយ័តខេត្តព្រះសីហនុ នៅកីឡដ្ឋានខេត្តស្វាយរៀង
-ម៉ោង៣:៣០-ខេត្តកំពង់ឆ្នាំង ជួប យុវជនបឹងកេតកំពង់ចាម នៅកីឡដ្ឋានខេត្តកំពង់ឆ្នាំង
ពូល B៖
-ម៉ោង៣:៣០-បឹងកេតអង្គរអែហ្វស៊ី ជួប ខេត្តព្រៃវែង នៅពហុកីឡដ្ឋានជាតិ
-ម៉ោង៣:៣០-ក្រសួងការពារជាតិ ជួប ខេត្តស្ទឹងត្រែង នៅកីឡដ្ឋានកងយោធពលខេមរភូមិន្ទ
-ម៉ោង១៨:០០-អាស៊ីអឺរ៉ុបយូណាយធីត ជួប កងរាជអាវុធហត្ថខេត្តកំពង់ធំ នៅពហុកីឡដ្ឋានជាតិ
© រក្សាសិទ្ធិដោយ thmeythmey.com