ជាតិ
អ្នកកាសែតនឹងរួមគ្នាវិភាគទៅលើអនាគតនយោបាយកម្ពុជា
× ក្លិប អ្នកកាសែត កម្ពុជានឹងរៀបចំការពិភាក្សាក្រោម ប្រធានបទ «អនាគត នយោបាយ កម្ពុជា ឆ្ពោះទៅ ការ បោះ ឆ្នោត ឆ្នាំ ២០១៨» នៅ ម៉ោង៩ព្រឹក ថ្ងៃ ទី ២២ មេសា ២០១៦ នៅ សណ្ឋាគារ សាន់វ៉េ ក្បែរ វត្តភ្នំ ក្នុងរាជធានីភ្នំពេញ ។
លោក ប៉ែន បូណា ប្រធានក្លិបអ្នកកាសែតកម្ពុជានិយាយថា ការពិភាក្សានេះមានគោលបំណងធ្វើការវិភាគ និងការប្រមើលមើលអំពីនិន្នាការនយោបាយនៅកម្ពុជាឆ្ពោះទៅកាន់ការបោះឆ្នោតនាពេលខាងមុខ។ លោក បន្ថែមទៀតថា អ្នកកាសែតក៏នឹងផ្លាស់ប្តូរយោបល់ផងដែរដើម្បីពង្រឹងតួនាទីសារព័ត៌មាននៅក្នុងការធ្វើសេចក្តីរាយការណ៍អំពីនយោបាយនៅកម្ពុជា។ ការចូលរួមកាន់តែសកម្មរបស់សារព័ត៌មាននៅក្នុងការផ្តល់ព័ត៌មានពិត ត្រឹមត្រូវ និង មានប្រយោជន៍ នឹងធ្វើឲ្យសារព័ត៌មានកម្ពុជាចូលរួមកាន់តែច្រើននិងកាន់តែមានប្រសិទ្ធភាពនៅក្នុងការពង្រឹងលទ្ឋិប្រជាធិនតេយ្យនៅកម្ពុជា។
នៅក្នុងការពិភាក្សានេះ លោកប៉ែន បូណាប្រធានក្លិបអ្នកកាសែតកម្ពុជា និង លោក ពុយ គា អគ្គលេខាធិការក្លិបអ្នកកាសែតកម្ពុជានឹងធ្វើការវិភាគដោយផ្អែកលើទស្សន:ផ្ទាល់ខ្លួនដើម្បីប្រមើលមើលអនាគតនយោបាយនៅកម្ពុជា និងនិន្នាការរបស់គណបក្សនយោបាយនៅកម្ពុជាចាប់ពីឆ្នាំ ១៩៩៣ រហូតដល់ឆ្នាំ ២០១៨ ខាងមុខ។
វាគ្មិនទាំងពីរក៏នឹងបញ្ចេញទស្សន:ផងដែរថាតើសារព័ត៌មាននឹងមានតួនាទីបែបណាខ្លះនៅក្នុងការបោះឆ្នោតឆ្នាំ២០១៧និង២០១៨ខាងមុខនេះ។ អ្នកចូលរួមក៏អាចចែករម្លែក និងបង្ហាញទស្សនៈយល់ឃើញរបស់ខ្លួនផងដែរទាក់ទងនឹងប្រធានបទខាងលើ៕
© រក្សាសិទ្ធិដោយ thmeythmey.com