រញ្ជួយដីអេក្វាឌ័រ៖ ប្រជាជនខឹងក្រុមសង្គ្រោះព្រោះ ជិត២ពាន់នាក់បន្តបាត់ខ្លួន

អន្តរជាតិ

រញ្ជួយដីអេក្វាឌ័រ៖ ប្រជាជនខឹងក្រុមសង្គ្រោះព្រោះ ជិត២ពាន់នាក់បន្តបាត់ខ្លួន

20, Apr 2016 , 9:39 pm

រូបភាព

ដោយ: ថ្មីៗ

អាជ្ញាធរអេក្វាឌ័របានអះអាងថា មនុស្ស ជិត ២ពាន់នាក់ទៀតនៅបាត់ខ្លួននៅឡើយក្រោយគ្រោះមហន្តរាយរញ្ជួយដីកើតឡើងកាលពីសប្តាហ៍មុន។ មនុស្សស្លាប់កើនដល់៤៨០ ហើយប្រជាជនជាច្រើនបង្ហាញការខឹងសម្បារចំពោះក្រុមសង្គ្រោះដែលយឺតយ៉ាវក្នុងការសង្គ្រោះមនុស្សកប់ក្រោមអាគារ។

គ្រោះមហន្តរាយរញ្ជួយដីកម្រិត ៧.៨ រ៉ិចទ័រ កាលពីសប្តាហ៍មុនបានឆក់យកជីវិតប្រជាជនអេក្វាឌ័រអស់ជិត៥០០នាក់ទៅហើយរាប់ថ្ងៃអង្គារទី ១៩ មេសាម្សិលមិញនេះ។

យោងតាមទីភ្នាក់ងារព័ត៌មាន AFP មនុស្សជាង ២៥០០នាក់បានរងរបួស ហើយ១៧០០នាក់ផ្សេងទៀតនោះនៅបន្តបាត់ខ្លួននៅឡើយ ហើយពួកអាចកប់នៅក្រោមសំណង់បាក់បែកទាំងនោះផង។ គេមិនហ៊ានរំពឹងទេថា អ្នកដែលបាត់ខ្លួនទាំងនោះមានអ្នកនៅមានជីវិតប៉ុន្មាននាក់នោះ ព្រោះប្រតិបត្តិការសង្គ្រោះហាក់បីដូចជាយឺតយ៉ាវណាស់។

ក្រោយករណីរញ្ជួយដីនេះកើតឡើង រដ្ឋាភិបាលអេក្វាឌ័របានដាក់ចេញបញ្ជាឲ្យក្រុមសង្គ្រោះចេញប្រតិបត្តិការស្វែងរកជនរងគ្រោះនិងរុករកអ្នកដែលបាត់ខ្លួនដែរ។ ប៉ុន្តែក្រុមគ្រួសារជនរងគ្រោះចាត់ទុកថា ក្រុមសង្គ្រោះមិនរហ័សរហួនសង្គ្រោះនិងរុករកមនុស្សឲ្យបានទាន់ចិត្តពួកគេសោះ។ ពួកគេក៏បង្ហាញការខឹងសម្បារជាខ្លាំងព្រោះតែបាត់បង់ការអត់ធ្មត់និងមិនអាចរង់ចាំក្រុមសង្គ្រោះដើម្បីជួយជីវិតបងប្អូនក្រុមគ្រួសារពួកគេទៀតដែរ។

Luis Felipe Navarro ដែលជាប្រជាជនម្នាក់នៅក្នុងទីក្រុង Manta បានអះអាងថា មានមនុស្សច្រើននាក់នៅមានជីវិតនិងនៅកប់ក្រោមគំនរសំណង់បាក់បែក ហើយពួកគេកំពុងរង់ចាំការសង្គ្រោះផង។ Luis Felipe Navarro អះអាងបែបនេះក្រោយពេលគេទទួលបានសារមួយពីអ្នកដែលនៅជាប់ក្រោមបន្ទប់ក្រោមដីផង ហើយលោកក៏បានប្រាប់ក្រុមសង្គ្រោះផងដែរពាក់ព័ន្ធបញ្ហានេះ តែក្រុមសង្គ្រោះមិនស្តាប់ឡើយ។

តាមពិតទៅ រដ្ឋាភិបាលអេក្វាឌ័រ មានបានត្រៀមខ្លួនឲ្យបានត្រឹមត្រូវនិងរួចរាល់ឡើយសម្រាប់ឆ្លើយស្ថានភាពគ្រោះមហន្តរាយបែបនេះ។ គេឃើញប្រទេសជិតខាង និងប្រទេសជាមិត្តអេក្វាឌ័រជាច្រើនមានមិចស៊ីកូ កូឡុំប៊ី អេស្ប៉ាញ និងប្រទេសជាច្រើនទៀតបានបញ្ជូនក្រុមសង្គ្រោះបន្ទាន់ច្រើនរយនាក់មកកាន់ប្រទេសអេក្វាឌ័រផងដែរ។

ក្រៅពីមនុស្សបន្តបាត់ខ្លួនរឿងស្មុគស្មាញមួយទៀតគឺ ប្រជាជនបាត់បង់ជម្រក ត្រូវការជំនួយសង្គ្រោះ និងប្រឈមការកើតជំងឺព្រោះខ្វះទឹកស្អាតនិងត្រូវមូសខាំជាដើមផង។ គេវាយតម្លៃថា មនុស្សជាង ១សែននាក់ត្រូវការជំនួយសង្គ្រោះបន្ទាន់ ហើយក្នុងនោះមានក្មេងៗរាប់ម៉ឺននាក់ទៀតផង។

ស្ថាប័នអន្តរជាតិច្រើនដែរបានប្រកាសផ្តល់ជំនួយដល់ប្រទេសអេក្វាឌ័រ ជាពិសេសជំនួយស្បៀងអាហារនិងសម្ភារៈសង្គ្រោះសម្រាប់ជនរងគ្រោះនិងប្រជាជនរងផលប៉ះពាល់ដោយគ្រោះរញ្ជួយដី។ Oxfam បានផ្តល់ឧបករណ៍មានទម្ងន់ ២ពាន់គីឡូក្រាមសម្រាប់ចែកចាយទឹកស្អាតដល់ប្រជាជនរងគ្រោះផង។ ហើយទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួន ក៏ត្រៀមដឹកជញ្ជូនសម្ភារៈ មានតង់ និងឧបករណ៍ប្រើប្រាស់ផ្សេងទៀតតាមផ្លូវអាកាសដើម្បីទៅចែកចាយដល់ប្រជាជននៅតំបន់ដែលរថយន្តហោះដឹកសម្ភារៈសង្គ្រោះមិនអាចទៅដល់។

ចំណែក ប្រធានាធិបតីអាមេរិក បារ៉ាក់អូបាម៉ា បានទូរស័ព្ទទៅកាន់ប្រធានាធិបតីអេក្វាឌ័រ Rafael Correa ដោយថ្លែងប្រាប់ថា អាមេរិកធ្វើគ្រប់បែបយ៉ាងដើម្បីជួយអេក្វាឌ័រកសាងប្រទេសឡើងវិញក្រោយគ្រោះរញ្ជួយដីនេះ។ រដ្ឋាភិបាលអេក្វាឌ័រថា រដ្ឋត្រូវការថវិកា ៣ពាន់លានដុល្លារអាមេរិកឯណោះដើម្បីស្តារនិងសាងសង់ឡើងវិញអ្វីដែលខូចខាត៕