បទ៖ កាកគតិ
កំណាព្យ៖ ថ្មីៗ(គង្គ ប៊ុនឈឿន)
ចាស់ហើយមិនគិត ចង់តែស្នេហ៍ស្និទ្ធ ជាមួយស្រីក្មេង
លបលាក់ចិញ្ចឹម ទុកគ្រាន់បន្លែង មួយនៅព្រែកឯង
ខ្លាចជំទាវដឹង លោកតាខំប្រឹង ដើរកលឧបាយ
លួចឆ្មក់ដូចឆ្នា លបចេញនាយអាយ ព្រោះចង់សប្បាយ
មុនចូលរណ្តៅ។
លោកតាវង្វេង ឆ្ងាញ់តែក្មេងៗ យកធ្វើថ្នាំប៉ូវ
កិបកេងលុយកាក់ លាក់ច្រើនហោប៉ៅ ទុកទិញប្រេងម្សៅ
ឲ្យពៅស្រីស្នេហ៍។
ជំងឺល្មោភស្រី មានច្រើនពេកក្រៃ ពេញដីស្រុកខ្មែរ
ក្រមុំជនបទ កំសត់ក្តាមស្រែ ត្រូវពួកថៅកែ
ទិញភ្លក្សព្រហ្មចារ្យ។
គេចង់បានតែ ក្មេងស្រីស្រុកស្រែ ស្ទើរមិនគ្រប់ការ
យកមកចិញ្ចឹម ធ្វើជាអាហារ លុះឆ្អែតកាលណា
ធ្វើពេស្យាទៀត។
ចាស់ក្បាលទំពែក នៅតែឃ្លានស្រេក ត្រេកមិនចេះឃ្លាត
បន្លែបន្លំ ផ្សំលួចលុយជាតិ លោតតាត្រីងៀត
ឆ្លៀតចិញ្ចឹមស្រី។
ចាស់ហើយគួរតែ លាងចិត្តកែប្រែ ពីកាមលោកីយ៍
នាំខូចកិត្តិយស ព្រោះរឿងអប្រីយ៍ ហ៊ានធ្វើអ្វីៗ
ដើម្បី«សាច់ញ៉ើយ»!។
១០.១០.០១
ប្រភព៖ កម្រងកំណាព្យទស្សនៈ«ជំងឺខ្មែរ»របស់ លោក គង្គ ប៊ុនឈឿន (កវីដងស្ទឹងសង្កែ)