បដិសណ្ឋារកិច្ចអារ៉ាប៊ីសាអូឌីតសម្រាប់លោក អូបាម៉ា បង្ហាញថាទំនាក់ទំនងទ្វេភាគីល្អក់កករ

អន្តរជាតិ

បដិសណ្ឋារកិច្ចអារ៉ាប៊ីសាអូឌីតសម្រាប់លោក អូបាម៉ា បង្ហាញថាទំនាក់ទំនងទ្វេភាគីល្អក់កករ

21, Apr 2016 , 8:59 pm

រូបភាព

ដោយ: ថ្មីៗ

លោក បារ៉ាក់ អូបាម៉ា បានអញ្ជើញទៅដល់អារ៉ាប៊ីសាអូឌីតថ្ងៃពុធទី ២០ ម្សិលមិញ តែមិនមានការទទួលស្វាគមន៍អធិកអធមនិងពិសេសដូចឆ្នាំមុនឡើយ។ វាខុសប្លែកត្រង់ឆ្នាំមុនមាន មេដឹកនាំអារ៉ាប៊ីសាអូឌីតច្រើនចាំស្វាគមន៍ និងមានបដិសណ្ឋារកិច្ចពិសេស សម្រាប់ទស្សនកិច្ចរបស់ប្រមុខរដ្ឋអាមេរិក ។ ការប្រែប្រួលនៃការទទួលបដិសណ្ឋារកិច្ចនេះក៏បង្ហាញថាទំនាក់ទំនងអាមេរិកនិងអារ៉ាប៊ីសាអូឌីតមិនសូវល្អដែរ។

ប្រធានាធិបតីអាមេរិក បារ៉ាក់ អូបាម៉ា ចូលជួបជជែកពិភាក្សាជាមួយមហាក្សត្រ Salmanក្រោយពេលអញ្ជើញទៅដល់អារ៉ាប៊ីសាអូឌីតថ្ងៃពុធម្សិលមិញនេះ។ នៅថ្ងៃព្រហស្បតិ៍នេះលោក អូបាម៉ា ក៏ចូលរួមកិច្ចប្រជុំកំពូលក្រុមប្រឹក្សាសហប្រតិបត្តិការរដ្ឋឈូងសមុទ្រ ដោយកិច្ចប្រជុំនេះផ្តោតសំខាន់លើការប្រឆាំងក្រុមរដ្ឋឥស្លាម ឬក្រុមដែស្ហ និងការរក្សាស្ថិរភាពនៅមជ្ឈិមបូព៌ាដោយបញ្ចប់ជម្លោះនៅយេម៉ែន ស៊ីរី និងអ៊ីរ៉ាក់ ជាដើម។

យ៉ាងណាក៏ដោយចុះ បើយោងតាមទីភ្នាក់ងារព័ត៌មាន AFP អ្វីដែលគួរឲ្យកត់សម្គាល់ នោះគឺការធ្វើបដិសណ្ឋារកិច្ចស្វាគមន៍ប្រមុខរដ្ឋអាមេរិកតែម្តង ដែលវាមានលក្ខណៈតូចតាច មិនសូវសមមុខសមមាត់ប្រមុខរដ្ឋអាមេរិកសោះ។ ម្សិលមិញ មានតែវត្តមានអភិបាលក្រុង រីយ៉ាដ រាជ្យបុត្រ Faisal bin Abdulaziz និងរដ្ឋមន្ត្រីការបរទេសលោក Adel al-Jubeir ប៉ុណ្ណោះនៅចាំទទួលលោក អូបាម៉ា នៅអាកាសយាន្តដ្ឋានអន្តរជាតិ Khalid។

វាប្លែកត្រង់ មហាក្សត្រ Salman មិនយាងទៅទទួលលោក អូបាម៉ា ដោយផ្ទាល់ទេ តែទ្រង់ទៅទទួលស្វាគមន៍ក្សត្រនិងមេដឹកនាំរដ្ឋឈូងសមុទ្រឯណោះ។ ហើយទីភ្នាក់ងារព័ត៌មានរដ្ឋមិនបានចាក់ផ្សាយផ្ទាល់នៃការអញ្ជើញមកដល់របស់លោក អូបាម៉ាទេ តែមានការផ្សាយផ្ទាល់ពីការមកដល់របស់បណ្តារដ្ឋឈូងសមុទ្រទៅវិញ។ កាលពីឆ្នាំមុន នៅពេលដែលលោក អូបាម៉ា ទៅចូលរួមបុណ្យសពក្សត្រ Abdullah នៅពេលនោះ ស្តេច Salman និងរាជ្យបុត្ររបស់ទ្រង់ចេញមកស្វាគមន៍លោក អូបាម៉ាដោយផ្ទាល់ ហើយក៏មានក្រាលកម្រាលព្រំក្រហម និងមានកងកិត្តិយស និងក្បួនត្រែទ័ពស្វាគមន៍យ៉ាងអធិកអធមបំផុតដែរ។

ភាពខុសបែ្លកគ្នានេះបង្ហាញកាន់តែច្បាស់ថា ទំនាក់ទំនងសម្ព័ន្ធមិត្តចាស់អាមេរិកនិងអារ៉ាប៊ីសាអូឌីត មានការប្រែប្រួល និងកាន់តែល្អក់កករខ្លាំងដែរ។ ទំនាក់ទំនងសម្ព័ន្ធមិត្តទាំងពីរធ្លាក់ចុះព្រោះនយោបាយការបរទេសរដ្ឋបាលលោក អូបាម៉ា ចំពោះអ៊ីរ៉ង់ដោយបង្កើតកិច្ចព្រមព្រៀងនុយក្លេអ៊ែរអ៊ីរ៉ង់ និងការថ្លែងរិះគន់សម្ព័ន្ធមិត្តនៅមជ្ឈិមបូព៌ារបស់លោក អូបាម៉ា កន្លងមកផង។

តែក្នុងដំណើរ ទស្សនកិច្ចលើកនេះ ក្រៅពីផ្តោតលើការរឹតបន្តឹងកិច្ចសហប្រតិបត្តិការកម្ចាត់ក្រុមភេរវជនដែស្ហ លោក អូបាម៉ា ក៏ព្យាយាមកាត់បន្ថយភាពតានតឹងនិងលុបចោលភាពល្អក់កករដែលកើតមានកន្លងមកដែរ។ គេឃើញមានការឯកភាពគ្នារវាងភាគីទាំងពីរអាមេរិកនិងអារ៉ាប៊ីសាអូឌីតដើម្បីយាមល្បាតនិងប្រឆាំងការជួញដូរអាវុធរបស់អ៊ីរ៉ង់ផង។ ដែលនេះជាសញ្ញាវិជ្ជមានមួយសម្រាប់ស្តារឡើងវិញនៃទំនាក់ទំនងនេះ។ តិចឬច្រើនវាជួយកែប្រែស្ថានការណ៍ និងបន្ទន់ចិត្តមេដឹកនាំមជ្ឈិមបូព៌ាដែរព្រោះពួកគេត្រូវការអាមេរិកជាខ្នងបង្អែក និងជាអ្នកផ្គត់ផ្គង់អាវុធធំបំផុតដែរ។

យ៉ាងណាក៏ដោយ ទំនាក់ទំនងនេះរងការប៉ះពាល់ខ្លាំងព្រោះបញ្ហាចម្រូងចម្រាសមួយទៀតគឺសេចក្តីព្រាងច្បាប់ថ្មីដែលអនុញ្ញាតឲ្យប្រជាជនអាមេរិកប្តឹងអារ៉ាប៊ីសាអូឌីតនៅតុលាការអាមេរិកពាក់ព័ន្ធព្រឹត្តិការណ៍ ១១ខែកញ្ញា។ គេចោទប្រកាន់ថា អារ៉ាប៊ី សាអូឌីតនៅពីក្រោយករណីវាយប្រហារសម្លាប់មនុស្សប្រហែល ៣ពាន់នាក់នេះ ក៏ដោយសារ ក្នុងចំណោមជនប្លន់យន្តហោះនិងធ្វើអត្តឃាតទាំង១៩នាក់នោះមាន ១៥នាក់ជាជនជាតិអារ៉ាប៊ីសាអូឌីត។ តែលោកអូបាម៉ា បានប្រកាសជាស្រេចហើយថា លោកនឹងប្រើសិទ្ធិជំទាស់ទាត់ចោលច្បាប់ថ្មីនេះ៕