អន្តរជាតិ
លោកប្រាយុទ្ធ ចោទ លោកថាក់ស៊ីន ថានៅពីក្រោយនៃការតវ៉ាក្រុងបាងកក
× ប្រមុខរដ្ឋាភិបាលរបបសឹកថៃ លោក ឧត្តមសេនីយ៍ ប្រាយុទ្ធ ច័ន្ទ អូចា បានចោទអតីតនាយករដ្ឋមន្ត្រីថៃ និរទេសក្រៅប្រទេសលោក ថាក់ស៊ីន ស៊ីនណាវ៉ាត់ត្រា ថាជាអ្នកនៅពីក្រោយនៃការតវ៉ាប្រឆាំងរបបសឹកនៅដើមសបា្តហ៍នេះ។ តែអតីតអ្នកប្រឹក្សាលោកថាក់ស៊ីន បានច្រានចោលការចោទប្រកាន់នោះ។
« អ្នកបញ្ចុះបញ្ចូល កំពុងរស់នៅក្រៅប្រទេស និងលោក ថាក់ស៊ីន»។ នេះគឺជាចម្លើយរបស់លោកប្រាយុទ្ធ ច័ន្ទ អូចា ដែលបានឆ្លើយទៅនឹងសំណួររបស់អ្នកសារព័ត៌មានដែលបានសួរថាតើអ្នកណានៅពីក្រោយនៃការតវ៉ាដែលបានដកស្រង់ដោយភ្នាក់ងារព័ត៌មាន Reuters នៅថ្ងៃទី២១ ខែមេសានេះ ។
សូមបញ្ជាក់ផងដែរថានៅថ្ងៃទី១៨ ខែមេសាកន្លងទៅ មានក្រុមសកម្មជន បានប្រមូលផ្តុំគ្នាជាច្រើនកន្លែងក្នុងក្រុងបាងកកដើម្បីប្រឆាំងទៅនឹងសេចក្តីព្រាងរដ្ឋធម្មនុញ្ញដែលធ្វើឡើងក្រោមការដឹកនាំដោយរបបសឹក និងប្រឆាំងចំពោះការឃុំខ្លួនអតីតរដ្ឋមន្ត្រីដែលបាននិយាយប្រឆាំងនឹងសេចក្តីព្រាងនោះដែរ។ ការប្រមូលផ្តុំនេះ បានបំពានទៅនឹងបម្រាមរបស់របបសឹកដែលហាមមិនឲ្យមានការប្រមូលផ្តុំ ឬយុទ្ធនាការណាមួយមុនថ្ងៃធ្វើប្រជាមតិសេចក្តីព្រាងរដ្ឋធម្មនុញ្ញនាថ្ងៃទី០៧ ខែសីហា ខាងមុខ។
ជុំវិញការចោទនេះ មិនទាន់មានប្រតិកម្មពីអតីតនាយករដ្ឋមន្ត្រីថៃ លោក ថាក់ស៊ីន ស៊ីនណាវ៉ាត់ត្រា នៅឡើយនោះទេ។ តែ Noppadon Pattama អតីតអ្នកប្រឹក្សាផ្នែកច្បាប់លោកថាក់ស៊ីន បានអះអាងថា លោកថាក់ស៊ីន មិនបានជួលនណាម្នាក់នៅក្រៅប្រទេសនោះទេ ហើយលោក ក៏មិនបាននៅពីក្រោយខ្នងនៃការតវ៉ានោះដែរ។
សូមរម្លឹកផងដែរថា រយៈពេលប៉ុន្មានសប្តាហ៍ចុងក្រោយនេះ គេសង្កេតឃើញថា ការឆ្លើយឆ្លងគ្នារវាង រដ្ឋាភិបាលរបបសឹកដែលបានឡើងកាន់តំណែងតាមរយៈរដ្ឋប្រហារយោធា ជាមួយនឹងអតីតនាយករដ្ឋ មន្ត្រីថៃ លោក ថាក់ស៊ីន បាននិងកំពុងឡើងកម្តៅជាថ្មី។ ក្នុងនោះលោក ថាក់ស៊ីន បានរិះគន់ និងវាយ ប្រហាររដ្ឋាភិបាលលោកប្រាយុទ្ធតាមរយៈកិច្ចសម្ភាសន៍ជាមួយនឹងកាសែតបរទេសធំៗ ជាពិសេស នោះលើបញ្ហាសេដ្ឋកិច្ច និងសេចក្តីព្រាងរដ្ឋធម្មនុញ្ញថ្មី៕
© រក្សាសិទ្ធិដោយ thmeythmey.com