រដ្ឋាភិបាលបន្តពិភាក្សាពីផែនការមេឆ្ពោះទៅធ្វើម្ចាស់ស៊ីហ្គេមឆ្នាំ២០២៣

កីឡាជាតិ

ជាតិ

រដ្ឋាភិបាលបន្តពិភាក្សាពីផែនការមេឆ្ពោះទៅធ្វើម្ចាស់ស៊ីហ្គេមឆ្នាំ២០២៣

22, Apr 2016 , 11:24 am

រូបភាព

ដោយ: រួបរួម

ក្នុងកិច្ចប្រជុំគណៈរដ្ឋមន្ត្រីនៅថ្ងៃសុក្រ ទី២២ ខែមេសា នេះ សម្តេចនាយករដ្ឋមន្ត្រី ដឹកនាំការពិភាក្សាបន្តលើសេចក្តីព្រាងស្តីពីផែនការមេឆ្ពោះទៅធ្វើជាម្ចាស់ផ្ទះការប្រកួតកីឡាអាស៊ីអាគ្នេយ៍ (SEA GAMES) លើកទី៣២ ឆ្នាំ២០២៣ ។ នេះបើតាមការលើកឡើងរបស់លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី។

ខ្លឹមសាររួមនៃផែនការមេឆ្ពោះទៅធ្វើជាម្ចាស់ផ្ទះការប្រកួតកីឡាអាស៊ីអាគ្នេយ៍ (SEA GAMES) លើកទី៣២ ត្រូវបានកំណត់ផែនទីបង្ហាញផ្លូវលើការកំណត់ប្រភេទកីឡា ការកសាងហេដ្ឋារចនាសម្ព័ន្ធកីឡា ការអភិវឌ្ឍធនធានមនុស្ស និងការរៀបចំផែនការមុនព្រឹត្តិការណ៍ អំឡុងពេលព្រឹត្តិការណ៍ និងក្រោយព្រឹត្តិការណ៍កីឡាអាស៊ីអាគ្នេយ៍(SEA GAMES)។

ក្នុងតួនាទីជាម្ចាស់ផ្ទះលើកដំបូងសម្រាប់ព្រឹត្តិការណ៍ថ្នាក់តំបន់នេះ កម្ពុជានឹងយករាជធានីភ្នំពេញ និងខេត្តមួយចំនួនទៀត ធ្វើជាទីតាំងនៃការប្រកួត ដែលអាចប្រព្រឹត្តទៅនាអំឡុងខែធ្នូ (គ្មានភ្លៀង និងធាតុអាកាសកម្រិតមធ្យម)។

តាមរយៈហ្វេសប៊ុករបស់ខ្លួន លោក ផៃ ស៊ីផាន បានសរសេរឲ្យដឹងថា អត្តពលិកប្រមាណ៧០០០នាក់ នឹងចូលរួមប្រកួតប្រជែង ហើយនឹងមានមន្ត្រីកីឡាជាតិ និងអន្តរជាតិប្រមាណ៣០០០នាក់ផងដែរ។ ជាមួយនេះ កម្ពុជាត្រូវការថវិកាប្រមាណ៤០លានដុល្លារអាមេរិក សម្រាប់តែសម្ភារៈឧបករណ៍បច្ចេកទេសនិងមន្ត្រីបច្ចេកទេសជាតិ អន្តរជាតិ ប្រម្រើការប្រកួតកីឡាតែប៉ុណ្ណោះដោយមិនគិតពីការចំណាយផ្សេងៗនោះឡើយ។

កីឡាពី៣០ ទៅ៣៥ប្រភេទ នឹងមានវត្តមាននៅក្នុងព្រឹត្តិការណ៍នាឆ្នាំ២០២៣ ដែលមាន ប្រភេទកីឡាអូឡាំពិកមានចំនួន២៣ ប្រភេទកីឡាមិនអូឡាំពិក ឫកីឡាក្នុងតំបន់មានចំនួន៧ រួមទាំង ប្រភេទកីឡាអត្តសញ្ញាណជាតិខ្មែរ”គុនខ្មែរ-ល្បុក្កតោ” និង “អុកចត្រង្គ”។

ទីតាំងនៃការប្រកួតសំខាន់ៗរួមមាន ពហុកីឡដ្ឋានមរតកតេជោ ពហុកីឡដ្ឋានជាតិអូឡាំពិក កីឡដ្ឋានកងយោធពលខេមរភូមិន្ទ និង សាលសាធារណៈគាំទ្រធំៗដទៃទៀតរួមទាំងកីឡាលើទឹកនៅតាមខេត្តមួយចំនួន ពិសេសខេត្តជាប់ឆ្នេរសមុទ្រ និងដងទន្លេមេគង្គ ជាដើម៕