ស៊ន សៀវម៉ី មិនហ៊ានដាក់ក្តីរំពឹងខ្ពស់សម្រាប់ការប្រកួតកីឡាអូឡាំពិក ប៉ុន្តែតាំងចិត្ត

កីឡាជាតិ

ស៊ន សៀវម៉ី មិនហ៊ានដាក់ក្តីរំពឹងខ្ពស់សម្រាប់ការប្រកួតកីឡាអូឡាំពិក ប៉ុន្តែតាំងចិត្ត

23, Apr 2016 , 9:40 am

រូបភាព

ដោយ:

ស៊ន សៀវម៉ី ជាកីឡាការិនីដំបូងរបស់កម្ពុជាដែលទទួលបានសិទ្ធិចូលរួមប្រកួតកីឡាអូឡាំពិកនៅទីក្រុងរីយ៉ូប្រទេសប្រេស៊ីល នាខែសីហា ខាងមុខ បន្ទាប់ពីទទួលបានមេដាយមាសក្នុងវគ្គប្រកួតជម្រុះកីឡាអូឡាំពិកនៅប្រទេសហ្វីលីពីន ប៉ុន្តែកីឡាការិនីម្នាក់នេះមិនហ៊ានដាក់ក្តីសង្ឃឹមខ្ពស់នោះទេ ដោយសារសមត្ថភាព និងបច្ចេកទេសនៅមានកម្រិត។

វីរៈកីឡាការិនី ស៊ន សៀវម៉ី មិនបានដាក់ក្តីសង្ឃឹមខ្ពស់នោះទេសម្រាប់ការប្រកួតកីឡាអូឡាំពិកនៅទីក្រុងរីយ៉ូ ប្រទេសប្រេស៊ីល នាខែសីហា ខាងមុខនេះ ដោយសារកីឡាការិនីម្នាក់នេះគិតថា ការប្រកួតមិនទៀងនោះឡើយ ហើយសមត្ថភាព និងបច្ចេកទេសរបស់ខ្លួននៅមានកម្រិត ទោះបីជាកម្ពស់មានប្រៀបលើគូប្រកួត១០ភាគរយរួចហើយក៏ដោយ។

វីរៈកីឡាការិនីរូបនេះបញ្ជាក់ដូច្នេះថា៖«សង្ឃឹមដែរបងតែអត់សូវសង្ឃឹមខ្លាំងនោះទេ ព្រោះថាការប្រកួតយើងមិនអាចមានទំនុកចិត្តលើខ្លួនឯងខ្ពស់ពេក ហើយមិនអាចមើលងាយគូប្រកួតរបស់យើងនោះទេព្រោះថាការប្រកួតតេក្វាន់ដូមិនមែនជាការប្រកួតឯកត្តជន ហើយក៏មិនមែនឡើងទៅសម្តែង គឺឡើងទៅវាយ ប្រសិនបើយើងធ្វេសប្រហែសតែមួយនាទីអាចសន្លប់បាន អ៊ីចឹងហើយខ្ញុំមានសង្ឃឹមលើខ្លួនឯងដែរតែមិនសង្ឃឹមខ្លាំង»។

កត្តាដែលធ្វើឲ្យ ស៊ន សៀវម៉ី មិនហ៊ានដាក់ក្តីសង្ឃឹមខ្ពស់មួយទៀតនោះ ដោយសារកីឡាការិនីដែលនឹងត្រូវចូលរួមប្រកួតក្នុងព្រឹត្តិការណ៍កីឡាអូឡាំពិក សុទ្ធសឹងតែមានសមត្ថភាពខ្ពស់ហើយអ្វីដែលសំខាន់នោះរូបគេមិនធ្លាប់បានឃើញការប្រកួតរបស់កីឡាការិនីទាំងនោះឡើយ។

ទោះបីជាយ៉ាងនេះក្តី ម្ចាស់មេដាយប្រាក់កីឡាតេក្វាន់ដូជើងឯកទ្វីបអាស៊ីរូបនេះបានប្តេជ្ញាថា ក្នុងរយៈពេល៣ខែរូបគេនឹងព្យាយាមកែតម្រូវចំណុចដែលខ្វះខាតទាំងនោះឲ្យអស់ ហើយនឹងព្យាយាមហ្វឹកហាត់និងប្រកួតឲ្យអស់ពីសមត្ថភាពក្នុងការដណ្តើមយកមេដាយជូនជាតិ។

ពាក់ព័ន្ធទៅនឹងបញ្ហាដែលសមត្ថភាព និងបច្ចេកទេសនៅមានកម្រិតត្រូវបានកីឡាការិនីម្ចាស់មេដាយប្រាក់រូបនេះចាត់ទុកថា ដោយសារប្រទេសកម្ពុជាពុំមានឧបករណ៍ទំនើបៗក្នុងការប្រកួត នេះជាហេតុធ្វើរូបគេមិនបានដឹងពីបច្ចេកទេសក្នុងការហ្វឹកហាត់។

វីរៈកីឡាការិនី ស៊ន សៀវម៉ី សម្រាប់ការដណ្តើមបានកៅអីពេញសិទ្ធិក្នុងការចូលរួមប្រកួតកីឡាអូឡាំពិក និងការដណ្តើមបានមេដាយប្រាក់កីឡាតេក្វាន់ដូជើងឯកទ្វីបអាស៊ីមិនមែនជាក្តីស្រមៃនោះឡើយ ទោះបីជាក្នុងរយៈជាង៦០ឆ្នាំមកនេះមិនមានកីឡាករកីឡាការិនីណាដណ្តើមបានក៏ដោយ ប៉ុន្តែអ្វីដែលជាក្តីស្រមៃធំបំផុតរបស់គេគឺការដណ្តើមបានមេដាយពីព្រឹត្តិការណ៍កីឡាអូឡាំពិក។

កីឡាការិនីរូបនេះរៀបរាប់ដូច្នេះថា៖«ការដណ្តើមបានកៅអីក្នុងការចូលរួមប្រកួតកីឡាអូឡាំពិក ខ្ញុំពិតជាសប្បាយចិត្ត ហើយក៏មានមោទនភាពលើខ្លួនឯងសម្រាប់ការចូលរួមនេះ ប៉ុន្តែការសប្បាយចិត្តរបស់ខ្ញុំមិនទាន់ដល់កម្រិតខ្ពស់ដូច ASIAN GAME នោះទេ ប៉ុន្តែអ្វីដែលជាក្តីស្រមៃរបស់ខ្ញុំខ្ពស់បំផុតនោះ គឺការដណ្តើមបានមេដាយកីឡាអូឡាំពិក នេះជាក្តីស្រមៃរបស់ខ្ញុំ»។

នាពិធីទទួលស្វាគមន៍ការវិលត្រឡប់របស់វីរៈកីឡាការិនី ស៊ន សៀវម៉ី កាលពីថ្ងៃទី២១ ខែមេសា នៅទីស្នាក់ការ NOCC លោក ថោង ខុន រដ្ឋមន្ត្រីក្រសួងទេសចរណ៍ បានចាត់ទុកការទទួលបានសិទ្ធចូលរួមប្រកួតក្នុងព្រឹត្តិការណ៍កីឡារបស់ សៀវម៉ី ថា ជាព្រឹត្តិការណ៍ប្រវត្តិសាស្ត្រមួយដែលកម្ពុជាមិនធ្លាប់មានក្នុងរយៈជាង៦០ឆ្នាំកន្លងមកនេះ ទោះបីជាការប្រកួតមិនទាន់មកដល់ ឬទទួលបានលទ្ធផលយ៉ាងណាក៏ដោយ។

នាឱកាសនោះដែរ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា បានប្រគល់ប្រាក់រង្វាន់លើកទឹកដល់កីឡាការិនី ស៊ន សៀវម៉ី និងកីឡាការិនី ឈឿង ពុទ្ធារីម ព្រមទាំងគ្រូបង្វឹក ម្នាក់ ១ពាន់ដុល្លារផងដែរ៕