កីឡាជាតិ
×![]()
សហព័ន្ធកីឡាតេក្វាន់ដូអាយធីអែហ្វ(ITF) កម្ពុជា នាព្រឹកថ្ងៃទី២៣ ខែមេសា នៅមជ្ឈមណ្ឌលយុទ្ធសិល្ប៍បុរាណកម្ពុជា-ជប៉ុន បានរៀបចំសិក្ខាសាលាមួយ ដើម្បីពង្រឹងសមត្ថភាព បច្ចេកទេស ចៅក្រម និងអាជ្ញាកណ្តាល សម្រាប់ត្រៀមរៀបចំការប្រកួតជើងឯកថ្នាល និងជើងឯកថ្នាក់ជាតិនាពេលខាងមុខ។ នេះបើយោងតាមលោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា។ 
សហព័ន្ធកីឡាតេក្វាន់ដូ អាយ ធី អែហ្វ(ITF)កម្ពុជា បានរៀបចំសិក្ខាសាលាមួយ ដើម្បីពង្រឹងសមត្ថភាព និងបច្ចេកទេសក្នុងការដាក់ពិន្ទុ និងកាត់កី្តដល់ចៅក្រម និងអាជ្ញាកណ្តាលសម្រាប់ត្រៀមរៀបចំការប្រកួតជើងឯកថ្នាលអាយុក្រោម១៥ ដែលប្រព្រឹត្តទៅរយៈ២ថ្ងៃចាប់ពីថ្ងៃទី២៨ ដល់ ២៩ ខែឧសភា និងដើម្បីត្រៀមរៀបចំការប្រកួតជើងឯកថ្នាក់ជាតិនៅថ្ងៃទី៨ ដល់ ១២ ខែកញ្ញា ខាងមុខនេះ។
សិក្ខាសាលាមួយថ្ងៃពេញដែលរៀបចំនៅមជ្ឈមណ្ឌលយុទ្ធសិល្ប៍បុរាណកម្ពុជា-ជប៉ុន មានគ្រូបង្វឹក អាជ្ញាកណ្តាល ចៅក្រម និងកីឡាករកីឡាការិនី ចូលរួមជាង ៣០នាក់ ដែលដឹកនាំដោយលោក អ៊ុក រី ប្រធានសហព័ន្ធកីឡាតេក្វាន់ដូ ITF កម្ពុជា និងលោក កែវ រ៉េមី ប្រធានកិត្តិយសសហព័ន្ធកីឡាតេក្វាន់ដូ ITF។
លោកបួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF បានបញ្ជាក់ថា បន្ទាប់ពីបញ្ចប់សិក្ខាសាលា នឹងមានការប្រគល់សញ្ញាប័ត្រដល់កីឡាករកីឡាការិនីផងដែរ។ បច្ចុប្បន្នសហព័ន្ធកីឡាតេក្វាន់ដូ I.T.F កម្ពុជាបច្ចុប្បន្នមានគ្រូបង្វឹកចំនួន២០នាក់ ដែលមានកម្រិតចាប់ពី២ដាន់រហូតដល់៦ដាន់៕
Tag:
តេក្វាន់ដូ ITF
បួន ហ៊ីងសុធីយ៉ា
© រក្សាសិទ្ធិដោយ thmeythmey.com
