ការប្រណាំងកង់លើភ្នំឆ្នាំនេះមានការខុសប្លែក និងកើនឡើងជាងឆ្នាំមុន

កីឡាជាតិ

ការប្រណាំងកង់លើភ្នំឆ្នាំនេះមានការខុសប្លែក និងកើនឡើងជាងឆ្នាំមុន

24, Apr 2016 , 9:40 am

រូបភាព

ដោយ:

ក្នុងសន្និសីទសារព័ត៌មានកាលពីព្រឹកថ្ងៃទី២២ ខែមេសា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) លោក Pierre Yves Catryអ្នករៀបចំការប្រកួតកីឡាជិះកង់លើភ្នំបានអះអាងថា ការប្រណាំងកង់លើកទី១០ ដណ្តើមពានរង្វាន់ឆ្នាំនេះមានការខុសប្លែកជាងឆ្នាំមុនទាំងលក្ខខណ្ឌនៃការចូលរួមប្រកួតប្រាក់រង្វាន់ និងជម្រើសក្រុម ហើយការប្រកួតនេះមាន ៥ជុំ និងធ្វើឡើងពេញមួយឆ្នាំ។

លោក Pierre Yves Catryអ្នករៀបចំការប្រកួតកីឡាជិះកង់លើភ្នំបានអះអាងថា ការប្រកួតឆ្នាំនេះមានការខុសប្លែកពីឆ្នាំមុន ដោយឆ្នាំនេះមានការផ្លាស់ប្តូរនូវលក្ខខណ្ឌនៃការចូលរួមមួយចំនួនដូចជាអ្នកចូលរួមប្រកួតអាចជ្រើសរើសនូវប្រភេទជុំដែលខ្លួនគិតថាមានសមត្ថភាពគ្រប់គ្រាន់ ហើយកម្រិតសម្រាប់កុមារមានការបែងចែកជាពីរកម្រិត ដែលកំណត់តាមអាយុ និងកម្ពស់។

ពាក់ព័ន្ធទៅនឹងការបែងចែកដោយមានការកំណត់អាយុ និងកម្ពស់នេះ ត្រូវបានអ្នករៀបចំការប្រកួតបកស្រាយថា ដោយសារតែឆ្នាំមុនមានឪពុកម្តាយដែលមានកូនចូលរួមប្រកួតបានមកតវ៉ារឿងដែលអនុញ្ញាតឲ្យអ្នកដែលមានកម្ពស់ខ្ពស់ មកប្រកួតជាមួយកូនរបស់គាត់ដែលមានកំពស់ទាប។ ម្យ៉ាងទៀតការធ្វើដូច្នេះ វាជាការទាក់ទាញចំណាប់អារម្មណ៍របស់ក្មេងៗឲ្យមកចូលរួមប្រកួតផងដែរ។

ការប្រណាំងកង់នៅលើកំពូលភ្នំដែលរៀបចំដោយក្លិបកង់ហោះ សហការជាមួយ Camboនេះ មានការប្រកួត៥ដំណាក់កាល ដោយដំណាក់កាលទី១ធ្វើឡើងនៅកោះដាច់ នៅថ្ងៃទី២៤ ខែមេសា ឬឯទី២ ព្រែកលាប នៅថ្ងៃទី១៩ ខែមិថុនា ចំណែកទី៣ ខេត្តកំពង់ស្ពឺ នៅថ្ងៃទី៣១ កក្កដា ខណៈទី៤ ភ្នំបាសិត នៅថ្ងៃទី៣០ ខែតុលា និងដំណាក់កាលទី៥ធ្វើនៅគីរីរម្យ នាថ្ងៃទី២៧ ខែវិច្ឆិកា ពោលគឺការប្រកួតនេះធ្វើឡើងក្នុងរយៈពេលមួយឆ្នាំពេញតែម្តង។

ការប្រកួតនេះមាន៩វិញ្ញាសាចូលរួមគឺ វិញ្ញាសា A1, A2, B1, B2, C1, C2, C3, W និង VIP ដោយ A1 ក្រុមដែលមានជំនាញបំផុត(មិនគិតអាយុ),A2 ជាក្រុមជំនាញ(អាយុចាប់ពី៣០ឆ្នាំ ឬលើសពីនេះ),B1 ក្រុមកម្រិតមធ្យម(អាយុ ១៦-៣០ឆ្នាំ), B2 ក្រុមកម្រិតធម្យម(អាយុ៣០ឆ្នាំឡើងទៅ),C1 ក្រុមវ័យក្មេង(អាយុ១៥-១៦ឆ្នាំ មានកម្ពស់លើស១៥៥សង់ទីម៉ែត្រ), C2 ក្រុមទើបជិះថ្មី(អាយុ១៧-៣៣ឆ្នាំ), C3 ក្រុមទើបជិះថ្មី(អាយុ ៣៤-៣៩ឆ្នាំ), W កម្រិតក្រុមសម្រាប់ស្ត្រី និង VIP ជាក្រុមកម្រិតអាយុចាប់ពី៤០ឆ្នាំឡើងទៅ។

សម្រាប់ប្រាក់រង្វាន់ម្ចាស់កម្រិតA1 លេខ១ទទួលបាន១០០ដុលា្លរ, លេខ២ បាន៧៥ដុល្លារ, លេខ៣ បាន៥០ដុល្លារ, លេខ៤ បាន៣០ដុល្លារ, លេខ៥ បាន២០ដុល្លារ និងលេខ៦ បាន១៥ដុល្លារឫឯ A2 លេខ១ បាន៥០ដុល្លារ, លេខ២ បាន៣៥ដុល្លារ, លេខ៣ បាន៣០ដុល្លារ, លេខ៤ បាន២៥ដុល្លារ និងលេខ៥ បាន១០ដុល្លារ។

កម្រិត B1 និង B2 លេខ១ទទួលបាន៣០ដុលា្លរ, លេខ២បាន២៥ដុល្លារ, លេខ៣ បាន២០ដុល្លារ, លេខ៤ បាន១៥ដុល្លារ និងលេខ៥ទទួលបាន១០ដុល្លារ។ ចំណែក កម្រិតស្ត្រី លេខ១ទទួលបាន២០ដុល្លារ លេខ២បាន១៥ដុល្លារ និងលេខ៣បាន១០ដុល្លារ និងកម្រិត C1, C2, C3, VIP និងក្មេងៗ ទទួលគ្រឿងបរិក្ខាកង់ផ្សេងៗ៕