ជាតិ
សង្គមជាតិ
ក្រសួងសាធារណការនឹងរៀបចំគំនូសចរាចរណ៍ថ្មី និងចំណែកផ្លូវសម្រាប់អ្នកជិះកង់
×![]()
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានឲ្យដឹងថា ក្រសួងនឹងរៀបចំអ៊ុតគំនូសចរាចរណ៍ថ្មីដែលមានគុណភាពជាប់បានយូ មិនឆាប់រលុបដូចគំនូសផ្លូវចាស់ឡើយ។ ការបញ្ជាក់របស់លោក ស៊ុន ចាន់ថុល នេះធ្វើឡើងនៅពេលចុះពិនិត្យការអ៊ុតគំនូសចរាចរណ៍ នៅលើមហាវិថីសុរាម្រិត ចាប់ពីមហាវិថីសម្តេចសុធារស រហូតដល់រង្វង់មូលវិមានឯករាជ្យកាលពីយប់ថ្ងៃទី២៣ មេសាក្រោមជំនួយឧបត្ថម្ភពីក្រុមហ៊ុន សាជីវកម្ម-ស្ពានថ្នល់ចិន ។
លោក ស៊ុន ចាន់ថុល បានបញ្ជាក់ថា គំនូសចរាចរណ៍ថ្មីនេះនឹងអាចប្រើប្រាស់បានយ៉ាងតិច១ឆ្នាំ ដែលមានគុណភាពល្អជាងគំនូសចរាចរណ៍ចាស់ អាចប្រើប្រាស់តែ៣ប៉ុណ្ណោះ។ ថ្លែងចំពោះមុខអ្នកកាសែតលោក ស៊ុន ចាន់ថុល បន្ថែមថា មន្ទីរសាធារណការ នឹងសាកល្បងអ៊ុតគំនូសចរាចរណ៍ថ្មីនេះ លើមហាវិថីសំខាន់ៗចំនួន៥សិន រួមមាន មហាវិថីព្រះនរោត្តម មហាវិថីសហព័ន្ធរុស្ស៊ី មហាវិថីព្រះសីហនុ មហាវិថីម៉ៅសេងទុង និងមហាវិថីកម្ពុជាក្រោម។
ក្រៅពីអ៊ុតគំនូសចរាចរណ៍ថ្មី ក្រសួងសាធារណការ ក៏នឹងរៀបចំចំណែកផ្លូវ(Lane) សម្រាប់អ្នកជិះកង់ផងដែរ ដើម្បីធានាសុវត្ថិភាពដល់ពួកគេ ក្នុងពេលធ្វើដំណើរដោយជិះកង់នេះ។
បើតាមរដ្ឋមន្ត្រីក្រសួងសាធារណការរូបនេះ មន្ទីរសាធារណការ និងដឹកជញ្ជូនរាជធានី ក៏នឹងរៀបចំភ្លើងស្តុបចំនួន១០០បន្ថែមទៀត និងដាក់ស្លាកសញ្ញាចរាចរណ៍៥០០០ស្លាកសញ្ញាទៀត ដែលគម្រោងនេះនឹងបញ្ចប់នៅចុងឆ្នាំ២០១៦៕
© រក្សាសិទ្ធិដោយ thmeythmey.com
