សហព័ន្ធកីឡាចំបាប់កម្ពុជាបានស្នើរសុំក្រសួងអប់រំ យុវជន និងកីឡា យកអគារដំបូលទូកស្លាបខាងស្តាំសម្រាប់ជាកន្លែងស្នាក់នៅរបស់កីឡាករកឡាការិនីជម្រើសថ្នាល ក្នុងរយៈពេលនៃការប្រមូលផ្តុំកីឡាករកីឡាការិនីជម្រើសជាតិ ដើម្បីហ្វឹកហាត់សម្រាប់ត្រៀមប្រកួតក្នុងព្រឹត្តិការណ៍ជាតិ និងអន្តរជាតិធំៗ ជាពិសេសការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាបានឲ្យដឹងថាសហព័ន្ធបានដាក់កោលការណ៍ស្នើរសុំក្រសួងអប់រំ យុវជន និងកីឡា យកអគារដំបូលទូកស្លាបខាងស្តាំ ដើម្បីជួសជុលកែលម្អរធ្វើជាកន្លែងស្នាក់នៅរបស់កីឡាករកីឡាការិនីជម្រើសជាតិថ្នាល។ ការស្នើរសុំធ្វើឡើងបន្ទាប់ពីទទួលបានការអនុញ្ញាតពីក្រសួងអប់រំ យុវជន និងកីឡា ក្នុងការប្រមូលផ្តុំកីឡាករកីឡាការិនីជម្រើសជាតិថ្នាលដើម្បីហ្វឹកហាត់ត្រៀមប្រកួតកីឡាស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ កាលពីដើមខែមេសា កន្លងមកនេះ។
ពាក់ព័ន្ធទៅនឹងការស្នើរសុំនេះត្រូវបានក្រសួងអប់រំ យុវជន និងកីឡា បានចេញជាគោលការណ៍អនុញ្ញាតរួចហើយ ប៉ុន្តែនៅរង់ចាំការពិភាក្សាជាមួយប្រធាននាយកដ្ឋានអប់រំកាយ និងកីឡា អំពីចំណុចដែលត្រូវកែលម្អរ និងប្រើប្រាស់។
លោក ធិន វិចិត្រ បញ្ជាក់ដូច្នេះថា៖«យើងបានដាក់ចេញគោលការណ៍មួយទៀតគឺស្នើរសុំក្រសួងអប់រំ យុវជន និងកីឡាប្រើប្រាស់សាលដំបូលទូកស្លាបខាងស្តាំជាកន្លែងស្នាក់នៅរបស់កីឡាករកីឡាការិនីជម្រើសជាតិថ្នាលរបស់យើង ពេលនេះក្រសួងអប់រំបានសម្រេចជាគោលការណ៍រូចហើយ ប៉ុន្តែយើងបានលឺដំណឹងពីលោកប្រធាននាយកដ្ឋានអប់រំកាយ និងកីឡាថា នឹងមានការកោះហៅប្រជុំមួយពាក់ព័ន្ធនឹងការជួសជុល និងប្រើប្រាស់»។
លោកបានបន្តទៀតថា ទោះបីជាមានកន្លែង និងកម្រាលសម្រាប់ហ្វឹកហាត់គ្រាប់គ្រាន់ក៏ពិតមែន ប៉ុន្តែបច្ចុប្បន្ននៅមានការខ្វះខាតនូវឧបករណ៍ហាត់សាច់ដុំមួយចំនួន បើទោះបីជាមជ្ឈមណ្ឌលហ្វឹកហ្វឺនកីឡាមានឧបករណ៍នេះទាំងឈុតធំ និងឈុតតូចក៏ដោយ ប៉ុន្តែចំបាប់ជាកីឡាមួយប្រភេទដែលប្លែកជាងគេ គឺតម្រូវឲ្យមានឧបករណ៍ហាត់កម្លាំងកាយ និងសាច់ដុំនៅក្នុងកន្លែងហ្វឹកហាត់ផ្ទាល់តែម្តង។
ដោយឡែក នៅក្នុងសំណើរនៃការស្នើរសុំរបស់សហព័ន្ធកីឡាចំបាប់កម្ពុជាពីក្រសួងអប់រំគឺគ្រាន់តែឲ្យជួយជុលប្រព័ន្ធទឹក និងភ្លើងតែប៉ុណ្ណោះ សម្រាប់គ្រែ និងម៉ាស៊ីនត្រជាក់ជាបន្ទុករបស់សហព័ន្ធ ប៉ុន្តែទោះជាយ៉ាងនេះកី្ត លោក ធិន វិចិត្រអគ្គលេខាធិការសហព័ន្ធកីឡាចំបាប់កម្ពុជា បានចាត់ទុកថា វាមិនជាបញ្ហានោះទេ ព្រោះលោក Casey Barnettបានឧបត្ថម្ភគ្រែដេកពីរជាន់ចំនួន ៨ ម៉ាស៊ីនត្រជាក់ពីរគ្រឿង និងសម្ភារៈជាច្រើនទៀត ដែលចំណាយថវិការអស់ប្រមាណជាជាង ៣ពាន់ដុល្លារ។
ពាក់ព័ន្ធទៅនឹងការចំណាយថវិការផ្តាល់ខ្លួនរបស់លោក Casey Barnett ក្នុងការឧបត្ថម្ភនេះ លោកអគ្គលេខាធិការចំបាប់បានរៀបរាប់ថា ដោយសារ លោក Casey Barnett ជាអតីតកីឡាករចំបាប់នៅសហរដ្ឋអាមេរិកតាំងពីថ្នាក់វិទ្យាល័យ ហើយលោកធ្លាប់ជាកូនសិស្សដែលហាត់នៅសហព័ន្ធចំបាប់នេះថែមទៀតផង ដូច្នេះប្រហែលជាគាត់ដឹងពីសុខទុក្ខរបស់កីឡាករកីឡាការិនីក្នុងរយៈពេលហ្វឹកហាត់។
គួរបញ្ជាក់ថា សហព័ន្ធកីឡាចំបាប់កម្ពុជាទទួលបានការអនុញ្ញាតពីក្រសួងអប់រំយុវជន និងកីឡាក្នុងការប្រមូលផ្តុំ ដើម្បីហ្វឹកហាត់ត្រៀមប្រកួតស៊ីហ្គេមមានកីឡាករ ៥នាក់ កីឡាការិនី៥នាក់ និងគ្រូបង្វឹកចំនួន២នាក់ ហើយការប្រមូលផ្តុំធ្វើឡើងរយៈពេល ៦ខែ ចាប់ពីខែមេសា ដល់ខែកញ្ញា៕