កីឡាជាតិ
ជាតិ
លោក អូន ព័ន្ធមុន្នីរ័ត្ន ប្រកាសកាន់កីឡាការ៉ាតេដូ ជាមួយនឹងលក្ខខណ្ឌមួយចំនួន
× ដើម្បីឲ្យស្របតាមគោលការណ៍របស់ក្រសួងអប់រំ យុវជន និងកីឡា ដែលបានដាក់ចេញកាលពីពេលកន្លងទៅថា ក្រសួងមួយយ៉ាងហោចណាស់ត្រូវដឹកនាំកីឡាមួយប្រភេទ ដើម្បីអភិវឌ្ឍន៍ត្រៀមការប្រកួតស៊ីហ្គេមដែលកម្ពុជានឹងធ្វើជាម្ចាស់ផ្ទះ។ ជាមួយគ្នានេះ លោក អូន ព័ន្ធមុន្នរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានប្រកាសថា ខ្លួននឹងកាន់កីឡាការ៉ាតេដូ ប៉ុន្តែទាមទារលក្ខខណ្ឌមួយចំនួន។
លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានប្រកាសថា ក្រសួងសេដ្ឋកិច្ច និងហិរញ្ញវត្ថុនឹងកាន់កាប់កីឡាការ៉ាតេដូ ប៉ុន្តែជាមួយគ្នានេះ លោក បានទាមទារនូវលក្ខខណ្ឌមួយចំនួន គឺតម្រូវឲ្យសហព័ន្ធ កិ្លប-សមាគមន៍ទាំងអស់ត្រូវចេះរួបរួមគ្នា នឹងសាមគ្គីគ្នាជាមុនសិន។ ការធ្វើបែបនេះដើម្បីឲ្យស្របទៅតាមគោលការណ៍របស់ក្រសួងអប់រំ យុវជន និងកីឡា ដែលនបានដាក់ចេញនាពេលកន្លងមកថា ក្រសួងមួយត្រូវកាន់កីឡាមួយប្រភេទ។
លោករដ្ឋមន្ត្រីថ្លែងដូចនេះថា៖«ខ្ញុំគាំទ្រ ប៉ុន្តែខ្ញុំសុំដាក់លក្ខខណ្ឌមួយ គឺតម្រូវឲ្យគ្រប់ក្លិបសមាគមន៍ទាំងអស់ត្រូវរៀបចំរចនាសម្ព័ន្ធគ្រប់គ្រង និងចាត់តាំងឡើងវិញឲ្យបានល្អនៅក្នុងរង្វង់ខេមរសហព័ន្ធកីឡាការ៉ាតេដូ ដោយមានការឯកភាពគ្នា សាមគ្គីគ្នា យោគយល់គ្នា រួបរួមគ្នា និងត្រូវចូលរួមលើកស្ទួយកីឡានេះដោយមិនប្រកាន់ក្រុម មិនប្រកាន់សាលា មិនប្រកាន់គ្នាយើងឬគ្នាគេ រួមចលនារៀបចំការគ្រប់គ្រងមួយដ៏រឹងមាំ ច្បាស់លាស់ ឲ្យអន្តរជាតិគេទទួលស្គាល់ ហើយគេអាចជួយគាំទ្រយើងបាន ធ្វើបែបននេះបានក្រសួងសេដ្ឋកិច្ច និងហិរញ្ញវត្ថុ នឹងគាំទ្រកីឡាមួយ គឺកីឡាការ៉ាតេដូ»។
លោករដ្ឋមន្ត្រីរូបនេះបានសន្យាថា ប្រសិនបើមានការរួមគ្នា ឯកភាពគ្នា នៅក្នុងផ្ទៃក្នុងនៃរង្វង់ខេមរសហព័ន្ធកីឡាការ៉ាតេដូ លោក នឹងជួយផ្គត់ផ្គង់ នឹងស្វែងរកជំនួយពីបរទេសបន្ថែមទាំងផ្នែកបច្ចេកទេស និងហិរញ្ញវត្ថុ សម្រាប់ជួយពង្រឹងសមត្ថភាព និងបច្ចេកទេសឲ្យកាន់តែមានភាពរីកចម្រើន។ ទន្ទឹមនឹងនេះ លោកក៏សន្យាផងដែរថា យ៉ាងយូរមួយឆ្នាំ លោក នឹងរៀបចំឲ្យមានការប្រកួតជ្រើសរើសជើងខ្លាំងនៅតាមបណ្តាក្លិប សមាគមន៍នីមួយៗ ដើម្បីធ្វើការប្រមូលផ្តុំកីឡាករ កីឡាការិនីជម្រើសជាតិ ថ្នាលហ្វឹកហាត់ សម្រាប់ត្រៀមប្រកួតស៊ីហ្គេម ប្រសិនបើមានការឯកភាពផ្ទៃក្នុង និងមានឆន្ទៈ។
ជាមួយគ្នានេះ លោក ថោង ខុន រដ្ឋមន្ត្រីក្រសួងទេសចរណ៍បានរៀបរាប់ពីប្រវត្តិរបស់ក្បាច់គុនការ៉ាតេដូថា កីឡាការ៉ាតេដូដែលគេស្គាល់ថា ជាកីឡាមួយប្រភេទដែលមានប្រភពមកពីប្រទេសជប៉ុន បានហូរចូលមកប្រទេសកម្ពុជានៅទស្សវត្សទី៦០។ ហើយការតាមការស្រាវជ្រាវកីឡាមួយនេះមានប្រភពចេញពីក្បាច់គុនចិន នៅអំឡុងសតវត្សទី១៧ ទី១៨ ដោយអ្នកជំនួយចិនមករកស៊ីនៅលើកោះអុកស៊ីនណូវ៉ា ពេលនោះជនជាតិជប៉ុនក៏បានបង្កើតឲ្យមានក្បាច់គុនផ្ទាល់របស់ខ្លួនដែលមានឈ្មោះថា ការ៉ាតេដូ ដែលមានន័យថា ក្បាច់គុនដែលប្រើតែកណ្តាប់ដៃទទេ៕
Tag:
អូន ព័ន្ធមុន្នីរ័ត្ន
ការ៉ាតេដូ
ថោង ខុន
© រក្សាសិទ្ធិដោយ thmeythmey.com