លោកគ្រូ យ៉ាន បង្ហាត់រត់ចំងាយ

កីឡាជាតិ

ជាតិ

លោកគ្រូ យ៉ាន បង្ហាត់រត់ចំងាយ

27, Apr 2016 , 4:51 pm

រូបភាព

ដោយ: នាយយ៉ាន

ពាក្យណែនាំលេខ១៖ ការចាប់ផ្ដើមហាត់ប្រាណ

កាលពី ១០ឆ្នាំកន្លងមកនៅប្រទេសកម្ពុជា មានព្រឹត្តិការណ៍រត់ប្រណាំងប្រចាំឆ្នាំតែ ១គត់ គឺពាក់កណ្ដាលម៉ារ៉ាតុងអន្តរជាតិអង្គរ។ នៅពេលបច្ចុប្បន្ននេះ ក្នុង១ឆ្នាំ មានការប្រកួតរត់ចំងាយចំនួនប្រមាណ ២០ទូទាំងប្រទេសខ្មែរ។ ច្បាស់ហើយគឺមានប្រជាពលរដ្ឋកាន់តែច្រើន ដែលរត់កីឡា ដើម្បីមានសុខភាពល្អ អាយុវែង និងដើម្បីសប្បាយ។

ប្រសិនបើលោកអ្នកមានបំណងចង់ចាប់ផ្ដើមហាត់ប្រាណយ៉ាងទៀងទាត់ សូមកុំហាត់ខ្លាំងពេក! គ្មានជើងឯកណាម្នាក់ ដែលមិនមានបទពិសោធន៍រត់ចំងាយតាំងពីយូរឆ្នាំនោះទេ។ មុនដំបូងត្រូវចេញហាត់ ១ឬ២ដងក្នុង ១សប្ដាហ៍ អាស្រ័យតាម ចំងាយ ពេលវេលា រាងកាយ អាយុ និងសុខភាពរបស់លោកអ្នក។ ពេលដែលយើងរត់កីឡាដំបូង យើងគិតថាហត់ណាស់។ យើងមានអារម្មណ៍ថា យើងមិនអាចរត់ដូចគេទេ។ នេះជាការធម្មតា ចូរទុកជាជំហានទី១។ យូរៗទៅកាយរបស់យើងមានសភាពស៊ាំ។ យើងរត់ឆ្ងាយទៅៗ យូរទៅៗ លឿនទៅៗ។

ទើបអាចចេញទៅហាត់ប្រាណ ៣ឬ៤ដងក្នុង ១សប្ដាសហ៍។ បន្ទាប់ពីរយៈពេល ៣ឬ៤ខែ ភាកច្រើនមានអារម្មណ៍ថាខ្លួនឯងខ្លាំងទៅៗ និងការរត់វាស្រួលទៅៗ។ ពេលនោះយើងយល់ថាកាយរបស់យើងមានសមត្ថភាព ដែលយើងស្មានមិនដល់។ ក៏ប៉ុន្តែសូមប្រុងប្រយ័ត្ន! មុននឹងចេញហាត់ប្រាណជារៀងរាល់ថ្ងៃ ខ្ញុំបានហ្វឹកហ្វឺនរយៈពេល ១០ឆ្នាំ! ខ្ញុំចង់និយាយថាបើលោកអ្នកចង់រត់កីឡារាល់ថ្ងៃ កុំអាល ចាំយ៉ាងតិច ៥ឬ៦ខែទៀត។

ម្យ៉ាងទៀតបើសិនជាលោកអ្នកមិនមែនជាកីឡាករកំពូល ក្នុង១អាទិត្យគួរទុក ១ថ្ងៃសំរាប់សំរាកកាយ។ សរុបមក រាងកាយយើងអាចរីកចម្រើននដោយសារកីឡាមែន ទោះចាស់ ទោះពិការក៏ដោយ។ ប៉ុន្តែកាយមនុស្សត្រូវការមានពេលគ្រប់គ្រាន់ ឲ្យស៊ាំជាមួយនឹងសកម្មភាពថ្មី។ ហេតុនេះហើយត្រូវកុំបង្ខំកាយខ្លាំងពេក ជាពិសេសពេលដំបូង។ កុំភ្លេចថាមានដំណាក់កាល។ ហើយត្រូវស្គាល់ខ្លួនឯង៖ រាងកាយខ្លះអាចស៊ូទ្រាំបានច្រើន រាងកាយខ្លះឆាប់មានបញ្ហា។ តែកីឡាជួយឲ្យស្គាល់ខ្លួនឯង និងយល់ពីកាយរបស់ខ្លួន…