សៀមរាបអង្គរបានជោគជ័យធំធេង ដូចជាណាហ្គាវើល និងភ្នំពេញក្រោនផងដែរ

កីឡាជាតិ

ជាតិ

សៀមរាបអង្គរបានជោគជ័យធំធេង ដូចជាណាហ្គាវើល និងភ្នំពេញក្រោនផងដែរ

28, Apr 2016 , 10:57 am

រូបភាព

ដោយ:

នាការប្រកួតពានរង្វាន់សម្តេច ហ៊ុន សែន ឆ្នាំ២០១៦ សប្តាហ៍ទី៤ កាលពីម្សិលមិញ ក្រុមចំនួន៣ បានស៊ុតបាល់បញ្ចូលទីលើគូប្រកួតលើសពី១០គ្រាប់ ដែលក្នុងនោះ ក្រុមថ្នាក់ខេត្ត សៀមរាបអង្គរ បានលត់ខេត្តព្រះវិហារ ១១-០ ណាហ្គាវើលស៊ីក្រចេះ ១៦-១ ភ្នំពេញក្រោនបំបាក់ បំបាក់ប៉ៃលិន ១៦-០ ។ ជាមួយគ្នានេះផងដែរ ស៊ីម៉ាក់ឈ្នះកំពង់ស្ពឺ ៨-៣ វេស្ទើនស៊ី កំពត ៩-១ ខណៈនគរបាលជាតិ បានត្រឹមស្មើ ៣-៣ ជាមួយស្វាយរៀង។

នាការប្រកួតក្នុងពូល D ក្រុមលេខ១ពូល C នៅក្នុងវគ្គជម្រុះ សៀមរាបអង្គរ បានលត់ក្រុម ខេត្តព្រះវិហារ យ៉ាងចាសដៃ ១១-០ នៅក្នុងទឹកដីនៃកីឡដ្ឋានរបស់ខ្លួន ខណៈក្រុមលេខ១ពូល C នៅក្នុងវគ្គជម្រុះខេត្តស្វាយរៀង បានតាមស្មើជាមួយក្រុមនៅក្នុងក្របខណ្ឌលីក អគ្គស្នងការនគរបាលជាតិ ៣-៣ នៅក្នុងទឹកដីនៃពហុកីឡដ្ឋានជាតិ។

ក្នុងការប្រកួតនៅពូល D ដដែល ណាហ្គាវើល បានបំបាក់ក្រុមលេខ២ ពូល F ឡើងមកពីវគ្គជម្រុះ ខេត្តក្រចេះ ១៦-១ នៅក្នុងទឹកដីនៃពហុកីឡដ្ឋានជាតិ។ សម្រាប់ជ័យជម្នះរបស់ក្រុមណាហ្គាវើល នេះ កីឡាករ សារី ម៉ាត់ណូរ៉ូទីន ជាអ្នករកគ្រាប់បាល់ ១គ្រាប់បើកឆាកដំបូងជូនក្រុមនៅនាទីទី២ បន្ទាប់មកនៅនាទីទី៤ កីឡាករ ប្រាក់ ចាន់រតនា រកបានគ្រាប់បាល់មួយគ្រាប់ទៀត ហើយកីឡាកររូបនេះរកបាន៣គ្រាប់បន្ថែមនៅនាទី(២៥, ៤៤ និង៧៦)។

ជាមួយគ្នានេះ កីឡាករ ថន ដារាពេជ្រ សម្រេចបានគ្រាប់បាល់ ៨គ្រាប់ម្នាក់ឯង នៅនាទី(២០, ២៩, ៣៥, ៣៨, ៤២, ៥១, ៥២ និងនាទី៨៦) និងមានការចូលរួមចំណែករបស់កីឡាករ សុះ សូហាណា ១គ្រាប់នៅនាទី៥៥។ កីឡាករ ទុំ សារាយ សម្រេចបានពីរគ្រាប់នៅនាទីទី៦ និងទី២២។ ចំណែក មួយគ្រាប់របស់ខេត្តក្រចេះសម្រេចដោយកីឡាករ កូយ សុលីតា នៅនាទីទី២៧។

រីឯការប្រកួតនៅក្នុងពូល C ក្រុមនៅក្នុងក្របខណ្ឌមិត្តហ្វូនខេមបូឌានលីក ភ្នំពេញក្រោន បានប្រើកីឡដ្ឋាន RSN របស់ខ្លួនលត់ក្រុមលេខ២ពូលD ឡើងពីវគ្គជម្រុះ ខេត្តប៉ៃលិន ១៦-០ ខណៈក្រុមមជ្ឈមណ្ឌលកំចាត់មីនកម្ពុជា បានយកកីឡដ្ឋានកងយោធពលខេមរភូមិន្ទលត់ក្រុមខេត្តកំពង់ស្ពឺ ៨-៣។ ចំណែកក្រុមវេស្ទើន បានសម្រេចក្នុងលទ្ធផលមួយយ៉ាងល្អលើក្រុមខេត្តកំពត ៩-១ នៅលើទឹកដីនៃកីឡដ្ឋានរបស់ខ្លួនវេស្ទើន៕