ជាតិ
សង្គមជាតិ
ពលរដ្ឋបន្តទាមទារឲ្យក្រុមហ៊ុន ING កាត់ដីសហគមន៍ចេញពីគម្រោងអភិវឌ្ឍន៍ក្រុងរណប
×
ភ្នំពេញ៖ ប្រជាពលរដ្ឋប្រមាណ ១៥០ នាក់មកពីសហគមន៍ព្រែកតាគង់១ និងខ្វា នៅថ្ងៃទី២៨ខែមេសានេះ ទាមទារឲ្យក្រុមហ៊ុន ING Holding កាត់ដីសហគមន៍ចេញពីគម្រោងអភិវឌ្ឍន៍ទីក្រុងរណបនៅតំបន់បឹងទំពុន និងបឹងជើងឯក។ ឆ្លើយតបនឹងការទាមទាររបស់ពលរដ្ឋ លោក ឡុង ង៉ែត អភិបាលរងខណ្ឌមានជ័យ សន្យាបង្កើតគណៈកម្មការ ដើម្បីដោះស្រាយបញ្ហាដីធ្លីនេះដល់ពលរដ្ឋ។
ពលរដ្ឋប្រមាណ ១៥០ នាក់បន្តទាមទារសាជាថ្មី នៅថ្ងៃទី២៨ខែមេសានេះ ដើម្បីឲ្យក្រុមហ៊ុន ING Holding កាត់ដីសហគមន៍ចេញពីគម្រោងអភិវឌ្ឍន៍ទីក្រុងរណបក្នុងតំបន់បឹងទំពុន និងបឹងជើងឯក។
បន្ទាប់ពីមានការតវ៉ា លោក កែវ សុខា តំណាងក្រុមហ៊ុន ING Holding ចេញមុខឆ្លើយតបនឹងពលរដ្ឋថា ខាងក្រុមហ៊ុនរបស់លោកមិនមានសមត្ថកិច្ចកាត់ដី ឬដោះស្រាយជូនពលរដ្ឋនៅតំបន់នោះឡើយ។ លោកបន្ថែមថា ពលរដ្ឋគួរស្នើសុំទៅអាជ្ញាធរ ទើបជាអ្នកមានសមត្ថកិច្ចដោះស្រាយ។
ប៉ុន្តែពលរដ្ឋមកពីសហគមន៍ព្រែកតាគង់១ និងខ្វា ដែលចូលរួមតវ៉ាទាំងនេះ ហាក់មិនពេញចិត្តនឹងការឆ្លើយតបរបស់តំណាងក្រុមហ៊ុនឡើយ ដោយពួកគាត់តបវិញថា ខាងក្រុមហ៊ុនជាអ្នកអនុវត្តគម្រោងនេះដោយផ្ទាល់ ដូច្នេះគួរតែផ្តល់ដំណោះស្រាយដល់ពលរដ្ឋ។
អ្នកតវ៉ា បន្តទៀតថា ការអភិវឌ្ឍន៍គួរតែមានការចូលរួមសហការពីប្រជាពលរដ្ឋនៅក្នុងតំបន់នោះ មិនគួរក្រុមហ៊ុនធ្វើអ្វីតែឯង ដូចខាងក្រុមហ៊ុនកំពុងបូមខ្សាច់ ចាក់លុបបឹងនោះទេ។ តែយ៉ាងណាពលរដ្ឋទាំងនោះស្នើដល់ក្រុមហ៊ុនជួយសហការជាមួយអាជ្ញាធររាជធានី ដើម្បីផ្តល់ការអភិវឌ្ឍន៍នៅនិងកន្លែងជូនដល់ពួកគាត់។
លោក ឡុង ង៉ែត អភិបាលរងខណ្ឌមានជ័យ សន្យានឹងពលរដ្ឋថា លោកនឹងបង្កើតគណៈកម្មការមួយ ក្នុងពេលយ៉ាងខ្លីខាងមុខ ដែលមានសមាសភាពពីអាជ្ញាធរខណ្ឌ និងមន្ទីសុរិយោដី ដើម្បីដោះស្រាយបញ្ហាដីធ្លីជូនប្រជាពលរដ្ឋដែលរងផលបះពាល់ក្នុងតំបន់បឹងទំពុន។ តែការទាមទារដំណោះស្រាយរបស់ពលរដ្ឋសហគមន៍ខ្វា តំបន់បឹងជើងឯកលោក ឡុង ង៉ែត ថា មិនស្ថិតក្នុងសមត្ថកិច្ចរបស់អាជ្ញាធរខណ្ឌមានជ័យនោះទេ៕
Tag:
ដីធ្លី
បឹងទំពុន
ING Holding
© រក្សាសិទ្ធិដោយ thmeythmey.com