អន្តរជាតិ
អនុប្រធានាធិបតីអាមេរិកទស្សនកិច្ចឥតប្រកាសជាមុននៅអ៊ីរ៉ាក់
× អនុប្រធានាធិបតីអាមេរិកលោក Joe Biden អញ្ជើញទៅប្រទេសអ៊ីរ៉ាក់ ក្នុងគោលដៅគាំទ្រនិងជំរុញរដ្ឋាភិបាលក្រុងបាដាដឲ្យបង្កើនសមត្ថភាពប្រឆាំងក្រុមភេរវជនរដ្ឋឥស្លាម។ ដំណើរទស្សនកិច្ចដែលគ្មានប្រកាសជាមុននេះ ធ្វើឡើងស្របពេលដែលអ៊ីរ៉ាក់កំពុងប្រឈមវិបត្តិសេដ្ឋកិច្ច និងនយោបាយផង ហើយទស្សនកិច្ចនេះបង្ហាញពីការគាំទ្ររបស់ក្រុងវ៉ាស៊ីនតោនចំពោះរដ្ឋាភិបាលអ៊ីរ៉ាក់ដែរ។
សូមស្ដាប់ព័ត៌មានលម្អិត៖
លោក Joe Biden អនុប្រធានាធិបតីអាមេរិកបានទៅទស្សនកិច្ចនៅប្រទេសអ៊ីរ៉ាក់ នៅថ្ងៃ ២៩ មេសា ម្សិលមិញនេះ ហើយទស្សនកិច្ចរបស់លោកមិនមានប្រកាសឲ្យដឹងជាមុនឡើយ។ វត្តមានរបស់អនុប្រធានអាមេរិកនេះកើតមានឡើងស្របពេលដែលប្រទេសអ៊ីរ៉ាក់ ប្រឈមបញ្ហាសេដ្ឋកិច្ច និងនយោបាយផង។
អាចថានេះជាដំណើរទស្សនកិច្ចលើកទី១ សម្រាប់អនុប្រធានាធិបតីអាមេរិករូបនេះ ចាប់តាំងពីទាហានអាមេរិកត្រូវបានដកចេញពីអ៊ីរ៉ាក់ក្នុងឆ្នាំ ២០១១។ ហើយលោកជាមន្ត្រីជាន់ខ្ពស់អាមេរិកទីបីដែលអញ្ជើញទៅកាន់ប្រទេសអ៊ីរ៉ាក់ ក្នុងខែមេសានេះ ក្រោយដំណើរទស្សនកិច្ចរដ្ឋមន្ត្រីការបរទេស ចន ឃែរី និងរដ្ឋមន្ត្រីការពារជាតិលោក Ashton Carter។
តាមពិតទៅ គោលបំណងសំខាន់នៃការអញ្ជើញទៅកាន់ប្រទេសអ៊ីរ៉ាក់នេះគឺដើម្បីបង្ហាញការគាំទ្រដល់រដ្ឋាភិបាលរបស់លោកនាយករដ្ឋមន្ត្រី Haider al-Abadi ដែលកំពុងប្រយុទ្ធប្រឆាំងក្រុមភេរវជនរដ្ឋឥស្លាមផង និងដោះស្រាយបញ្ហាប្រឈមក្នុងស្រុកផង។
ក្នុងដំណើរទស្សនកិច្ចឥតមានប្រកាសមុននេះ លោក Biden បានទៅកាន់ទីក្រុងបាដាដ និង តំបន់ Erbil ហើយលោកជួបជជែកពិភាក្សាជាមួយនាយករដ្ឋមន្ត្រីអ៊ីរ៉ាក់ខាងលើ និងប្រធានសភាអ៊ីរ៉ាក់ Salim al-Jabouri ដោយប្រធានបទនៃកិច្ចពិភាក្សាគឺទាក់ទងការវិវត្តនៃការប្រយុទ្ធប្រឆាំងក្រុមភេរវជនដែស្ហ ឬក្រុមរដ្ឋឥស្លាម រួមទាំងវាយដណ្តើមយកតំបន់ Mosul មកវិញផងដែរ។
ចលនាប្រឆាំងក្រុមភេរវជនដែស្ហនៅអ៊ីរ៉ាក់ ហាក់មានការថមថយដោយសារអ៊ីរ៉ាក់បច្ចុប្បន្នប្រឈមបញ្ហានយោបាយក្នុងស្រុកផង។ នាយករដ្ឋមន្ត្រី Haider al-Abadi កន្លងមកនេះបានប្រឈមការប្រឆាំងខ្លាំងពីសំណាក់អ្នកនយោបាយក្នុងស្រុក ដោយសាររដ្ឋាភិបាលលោកព្យាយាមបោសសម្អាតអំពើពុករលួយក្នុងស្ថាប័ននយោបាយ។ ហើយទើបតែនៅថ្ងៃអង្គារដើមសប្តាហ៍នេះទេ ដែលរដ្ឋាភិបាលលោកបានទទួលការអនុញ្ញាតនិងគាំទ្រពីសភាដើម្បីផ្លាស់ប្តូររដ្ឋមន្ត្រីមួយចំនួនផង។
វត្តមានលោក Biden និងមន្ត្រីជាន់ខ្ពស់អាមេរិកច្រើនរូបនៅអ៊ីរ៉ាក់បង្ហាញពីនយោបាយឥតងាករេរបស់ក្រុងវ៉ាស៊ីនតោនក្នុងការគាំទ្រដល់រដ្ឋាភិបាលក្រុងបាដាដ បច្ចុប្បន្នទោះក្នុងកាលៈទេសៈណាក៏ដោយ ហើយទោះជាក្រោយអាណត្តិលោក បារ៉ាក់ អូបាម៉ា ដែលចប់នៅខែមករាឆ្នាំក្រោយក្តី។ ហើយអាមេរិកនឹងបន្តផ្តល់ជំនួយ និងការគាំទ្រនានាដល់ដំណើរការរួបរួមជាតិ ផ្សះផ្សាជាតិរបស់រដ្ឋាភិបាលអ៊ីរ៉ាក់ និងឈានទៅកម្ចាត់ក្រុមភេរវជនរដ្ឋឥស្លាមផងដែរ៕
© រក្សាសិទ្ធិដោយ thmeythmey.com