ការប្រកួតពានរង្វាន់សម្តេច ហ៊ុន សែន លើកទី១០ បានឈានដល់សប្តាហ៍ទី៥ នៃដំណាក់កាលផ្តាច់ព្រ័ត្រ ដោយនៅថ្ងៃទី៤ ខែឧសភា នេះ មានការប្រកួតចំនួន៣ក្នុងពូល A និង៣គូនៅក្នុងពូល B។ ដោយខេត្តកណ្តាលស្វាគមន៍ខេត្តកំពង់ឆ្នាំង និងក្រុមដែលនៅក្នុងក្របខណ្ឌមិត្តហ្វូនខេមបូឌានលីកចំនួន៥ ប៉ះក្រុមឡើងពីវគ្គជម្រុះបឋម។
ក្នុងពូល A នៃការប្រកួតពានរង្វាន់សម្តេច ហ៊ុន សែន លើកទី១០ ក្រុមលេខ២ពូល A ឡើងពីវគ្គជម្រុះបឋមខេត្តកណ្តាល នឹងបើកទ្វារកីឡដ្ឋាន ខេត្តកណ្តាល ស្វាគមន៍ក្រុមភ្ញៀវដែលឈរចំណាត់ថ្នាក់លេខ២ ក្នុងពូលC ខេត្តកំពង់ឆ្នាំង ក្រោយរងការបំបាក់របស់ក្រុមខេមបូឌានថាយហ្គឺរ ១៨-០ កាលពីសប្តាហ៍ទី៣ នៅកីឡដ្ឋានវេស្ទើន។
ក្នុងពូល A ដដែល ក្រុមយុវជនបឹងកេតកំពង់ចាម ក្រោយពីចាញ់ ខេត្តកំបង់ឆ្នាំង ១-០ នឹងប្រើកីឡដ្ឋានរបស់ខ្លួន ដើម្បីស្វាគមន៍ក្រុមភ្ញៀវ ព្រះខ័នរាជស្វាយរៀង ខណៈក្រុមកំពង់ឈរចំណាត់លេខ១ក្នុងពូល A ខេមបូឌានថាយហ្គឺរ នឹងប្រើពហុកីឡដ្ឋានជាតិ ដើម្បីស្វាគមន៍ក្រុមឡើងពីវគ្គជម្រុះបឋមកំពង់ផែស្វយ័តខេត្តព្រះសីហនុ។
ដោយឡែកក្នុងពូល B ក្រុមលេខ២ពូលBក្នុងវគ្គជម្រុះបឋម ខេត្តព្រៃវែង នឹងបើកទា្វរកីឡដ្ឋានរបស់ខ្លួន ស្វាគមន៍ក្រុមនៅក្នុងក្របខណ្ខមិត្តហ្វូនខេមបូឌានលីក អាស៊ីអឺរ៉ុបយូណាយធីត ខណៈក្រុមកងរាជអាវុធហត្ថខេត្តកំពង់ធំ នឹងប្រើកីឡដ្ឋានរបស់ខ្លួនដើម្បីស្វាគមន៍ក្រុមជើងខ្លាំងដែលកំពុងឈរចំណាត់ថ្នាក់លេខ១ក្នុងពូល ក្រសួងការពារជាតិ។ ចំណែកក្រុមកំពុងឈរចំណាត់លេខ២ ក្នុងពូល បឹងកេតអង្គរអែហ្វស៊ី នឹងប្រើពហុកីឡដ្ឋានជាតិ ដើម្បីទទួលក្រុមលេខ១ពូល F ឡើងពីវគ្គជម្រុះខេត្តស្ទឹងត្រែង៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី៤ ខែឧសភា នេះ៖
ពូល A៖
-ម៉ោង៣:៣០-ខេត្តកណ្តាល ជួប ខេត្តកំពង់ឆ្នាំង នៅកីឡដ្ឋានខេត្តកណ្តាល
-ម៉ោង៣:៣០-យុវជនបឹងកេតកំពង់ចាម ជួប ព្រះខ័នរាជស្វាយរៀង នៅកីឡដ្ឋានចំការកៅស៊ូកំពង់ចាម
-ម៉ោង៣:៣០-ខេមបូឌានថាយហ្គឺរ ជួប កំពង់ផែស្វយ័តខេត្តព្រះសីហនុ នៅពហុកីឡដ្ឋានជាតិ
ពូល B៖
-ម៉ោង៣:៣០-ខេត្តព្រៃវែង ជួប អាស៊ីអឺរ៉ុបយូណាយធីត នៅពហុកីឡដ្ឋានខេត្តព្រៃវែង
-ម៉ោង៣:៣០-កងរាជអាវុធហត្ថខេត្តកំពង់ធំ ជួប ក្រសួងការពារជាតិ នៅកីឡដ្ឋានខេត្តកំពង់ធំ
-ម៉ោង១៨:០០-បឹងកេតអង្គរអែហ្វស៊ី ជួប ខេត្តស្ទឹងត្រែង នៅពហុកីឡដ្ឋានជាតិ។