ជាតិ
សម្តេច ហ៊ុន សែន អាចនឹងជួបលោក ពូទីន នៅ រុស្ស៊ី ក្រៅកិច្ចប្រជុំរុស្ស៊ី-អាស៊ាន
×
រដ្ឋាភិបាលរស្ស៊ី កំពុងស្នើសុំជួបទ្វេភាគីជាមួយប្រមុខរដ្ឋាភិបាលកម្ពុជា ដែលត្រូវមានវត្តមាននៅក្នុងជំនួបកំពូល រុស្ស៊ីអាស៊ាន ដែលនឹងត្រូវរៀបចំឡើងនៅក្នុងទីក្រុង Sochi ប្រទេសរុស្ស៊ី។ គេនៅមិនទាន់ដឹងច្បាស់នៅឡើយថា តើសម្តេច ហ៊ុន សែន នឹងឆ្លើយតបយ៉ាងណាចំពោះសំណើរនេះ?
រដ្ឋាភិបាលរុស្ស៊ី បានស្នើសុំរៀបចំជំនួបទ្វេភាគី រវាងសម្តេចនាយករដ្ឋមន្ត្រី ហ៊ុន សែន និងលោកប្រធានាធិបតី វ្ល៉ាឌីមៀរ ពូទីន (Vladimir Putin) នៅក្រៅកិច្ចប្រជុំកំពូល រុស្ស៊ី-អាស៊ាន។ រុស្ស៊ី នឹងធ្វើម្ចាស់ផ្ទះរៀបចំកិច្ចប្រជុំកំពូល រុស្ស៊ី អាស៊ាន នៅថ្ងៃទី១៩ និង២០ ឧសភា នៅក្នុងទីក្រុងទេសចរណ៍ Sochi។
ការស្នើរបស់រដ្ឋាភិបាលរុស្ស៊ីត្រូវបានធ្វើឡើងតាមរយៈស្ថានទូតរុស្ស៊ីប្រចាំកម្ពុជា និងក្រសួងការបរទេសកម្ពុជា។ នេះបើយោងតាមលិខិតផ្លូវការមួយរបស់ក្រសួងការបរទេសកម្ពុជា ដែលសារព័ត៌មានថ្មីៗទទួលបាន។
លិខិតផ្លូវការដែលមានចុះហត្ថលេខាដោយរដ្ឋមន្ត្រីការបរទេសស្តីទី គឺលោក ឡុង វីសាលោ បានសរសេរជូនដំណឹងទៅសម្តេចនាយករដ្ឋមន្ត្រីអំពីបំណងស្នើសុំប្រជុំទ្វេភាគីរបស់វិមានក្រេមឡាំង។ លោក ឡុង វិសាលោ បានសរសេរជម្រាបសម្តេច ហ៊ុន សែន យ៉ាងដូច្នេះថា៖«ខ្ញុំមានកិត្តិយសសូមជម្រាបជូន សម្តេចអគ្គមហាសេនាបតីតេជោ នាយករដ្ឋមន្ត្រី មេត្តាជ្រាបថា ឧត្តម ឌីមីទ្រី ស្វេតកូវ ឯកអគ្គរដ្ឋទូតរុស្ស៊ីនៅភ្នំពេញ បានជូនដំណឹងថា ភាគីរុស្ស៊ីស្នើរៀបចំជំនួបទ្វេភាគីរវាងសម្តេចតេជោនាយករដ្ឋមន្ត្រី និងឯកឧត្តម វ្ល៉ាឌីមៀរ ពូទីន ប្រធានាធិបតីសហព័ន្ធរុស្ស៊ីនៅរសៀលថ្ងៃទី១៩ខែឧសភា វេលាម៉ោង១៤ និង៤៥នាទី»។
យោងតាមលិខិតដដែលនេះ ជំនួបទ្វេភាគីនោះត្រូវប្រព្រឹត្តទៅនៅសណ្ឋាគារ Radisson Blu Resort and Congress Center នៅទីក្រុង Sochi ។
សម្តេច ហ៊ុន សែន បានទទួលលិខិតរបស់លោក ឡុង វិសាលោ នៅថ្ងៃទី២៩មេសាកន្លងទៅ។ ប៉ុន្តែគេមិនទាន់បានទទួលព័ត៌មានស្តីការឆ្លើយតបរបស់សម្តេច ហ៊ុន សែន នៅឡើយទេ៕
Tag:
កម្ពុជា-រុស្ស៊ី
សម្តេច ហ៊ុន សែន
ពូទីន
© រក្សាសិទ្ធិដោយ thmeythmey.com