កីឡាជាតិ
ជាតិ
កំពង់ឆ្នាំងតាមប្រកៀកពិន្ទុថាយហ្គឺរ ខណៈស្ទឹងត្រែងស្ទើរតែធ្វើឲ្យបឹងកេតខកចិត្ត
×
ការប្រកួតពានរងា្វន់សមេ្តច ហ៊ុន សែន លើកទី១០ នៃវគ្គជម្រុះដំណាក់កាលផ្តាច់ព្រ័ត្រកាលពីថ្ងៃទី៤ ខែឧសភា ម្សិលមិញ ក្រសួងការពារជាតិ បានលត់ក្រុមឡើងពីវគ្គជម្រុះបឋម កងរាជអាវុធហត្ថខេត្តកំពង់ធំ ១២-១ ខណៈក្រុមបឹងកេតអង្គរអែហ្វស៊ី យកឈ្នះលើក្រុមឡើងពីវគ្គជម្រុះបឋម ខេត្តស្ទឺងត្រែង យ៉ាងប្រផិតប្រផើយ ៥-៤។ ចំណែកខេត្តកណ្តាលចាញ់ខេត្តកំពង់ឆ្នាំង ៣-១, ព្រះខ័នរាជស្វាយរៀង ស៊ី យុវជនបឹងកេតកំពង់ចាម ៣-១, ខេមបូឌានថាយហ្គឺរ លត់ កំពង់ផែស្វយ័តខេត្តព្រះសីហនុ ៥-០ ចំណែក អាស៊ីអឺរ៉ុប ស៊ី ខេត្តព្រៃវែង ៣-០។
ក្រុមនៅក្នុងក្របខណ្ឌមិត្តហ្វូនខេមបូឌានលីក ក្រសួងការពារជាតិ បានលត់ក្រុមម្ចាស់ផ្ទះ កងរាជអាវុធហត្ថខេត្តកំពង់ធំយ៉ាងចាស់ដៃ ១២-១ បានធ្វើឲ្យក្រុមមួយនេះទទួលបាន៣ពិន្ទុបន្ថែម ដើម្បីឈរចំណាត់ថ្នាក់លេខ១ ពូល B ជាបណ្តោះអាសន្ន។ ចំណែកក្រុមកងរាជអាវុធហត្ថខេត្តកំពង់ធំ បន្តឈរបាតតារាងក្នុងពូល។
ជាមួយគ្នានេះ ក្រុមបឹងកេតអង្គរអែហ្វស៊ី បានយកឈ្នះលើក្រុមឡើងមកពីវគ្គជម្រុះបឋម ខេត្តស្ទឹងត្រែងយ៉ាងប្រផិតប្រផើយ ៥-៤ នៅពហុកីឡដ្ឋានជាតិ។ ជ័យជម្នះ ៥-៤ របស់បឹងកេត លើ ខេត្តស្ទឹងត្រែង នេះ សម្រេចដោយកីឡាករ ចាន់ វឌ្ឍនាកា ម្នាក់ឯង ជ័យជម្នះនេះបានធ្វើឲ្យក្រុមនេះឡើងឈរនៅលំដាប់ទី២ក្នុងពូល B បន្ទាប់ពីក្រសួងការពារជាតិ។ ចំណែកក្រុមអាស៊ីអឺរ៉ុបយូណាយធីត បានលត់ម្ចាស់ផ្ទះ ខេត្តព្រៃវែង ៣-០។
ដោយឡែក សម្រាប់ការប្រកួតក្នុងពូល A ក្រុមម្ចាស់ផ្ទះខេត្តកណ្តាល ត្រូវបាន ខេត្តកំពង់ឆ្នាំង ដណ្តើមបាន៣ពិន្ទុ ក្នុងការឈរលំដាប់ទី២ ពូល A បន្ទាប់ពីក្រុមនេះយកឈ្នះ ៣-១ នៅលើទឹកដីរបស់ខ្លួន។ ចំណែកក្រុមនៅក្នុងក្របខណ្ឌលីក ព្រះខ័នរាជស្វាយរៀង បានយកឈ្នះលើក្រុមម្ចាស់ផ្ទះ យុវជនបឹងកេតកំពង់ចាម ៣-១ ខណៈក្រុមខេមបូឌានថាយហ្គឺរ បានប្រើពហុកីឡដ្ឋានជាតិ លត់ក្រុមឡើងពីវគ្គជម្រុះ កំពង់ផែស្វយ័តខេត្តព្រះសីហនុ ៥-០ ដើម្បីទទួលបាន៣ពិន្ទុសម្រាប់ឈរលំដាប់លេខ១ក្នុងពូល៕
© រក្សាសិទ្ធិដោយ thmeythmey.com