វីរកីឡាការិនីតេក្វាន់ដូ ស៊ន សៀវម៉ី ទទួលបានប្រាក់ឧបត្ថម្ភចំនួន ១ម៉ឺនដុល្លារពីក្រុមហ៊ុនណាហ្គាវើល សម្រាប់ការចេញទៅហ្វឹកហាត់នៅប្រទេសកូរ៉េខាងត្បូងរយៈពេលជាង២ខែ ដើម្បីពង្រឹងសមត្ថភាព និងបច្ចេកទេស សម្រាប់ត្រៀបចូលរួមប្រកួតកីឡាអូឡាំពិកអន្តរជាតិ នៅទីក្រុងរីយ៉ូ ប្រទេសប្រេស៊ីល នាខែសីហា ខាងមុខនេះ។ ការប្រគល់ប្រាក់ឧបត្ថម្ភនេះធ្វើឡើងក្រោមវត្តមានរបស់ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) និងលោក Pern Chen នាយកប្រិតបត្តរបស់ណាហ្គាវើល។
វីរកីឡាការិនីតេក្វាន់ដូ ស៊ន សៀវម៉ី ក្រោយពីទទួលបានសិទ្ធក្នុងការចូលរួមប្រកួតកីឡាអូឡាំពិកនៅប្រទេសប្រេស៊ីល រូបគេនឹងចេញទៅហ្វឹកហាត់នៅប្រទេសកូរ៉េខាងត្បូងរយៈពេលជាង២ខែ ដើម្បីពង្រឹងសមត្ថភាព និងបច្ចេកទេស សម្រាប់ត្រៀមចូលរួមប្រកួតកីឡាអូឡាំពិកអន្តរជាតិ នៅទីក្រុងរីយ៉ូប្រទេសប្រេស៊ីល នាខែសីហា ខាងមុខនេះ។ ការចេញទៅហ្វឹកហាត់នៅប្រទេសកូរ៉េនេះដែរ វីរៈកីឡាការិនី ស៊ន សៀវម៉ី ទទួលបានប្រាក់ឧបត្ថម្ភពីក្រុមហ៊ុនណាហ្គាវើល ចំនួន ១ម៉ឺនដុល្លារផងដែរ។
នាពិធីប្រគល់ប្រាក់ដែលធ្វើនៅអគារពាណិជ្ជកម្មណាហ្គាវើល លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានមានប្រសាសន៍ថា សម្រាប់ការចូលរួមកីឡាអូឡាំពិក ក្រៅពីវីរៈកីឡាការិនី ស៊ន សៀវម៉ី កម្ពុជាទទួលបានសិទ្ធអនុគ្រោះចំនួន៤នាក់បន្ថែមទៀត គឺកីឡាករហែលទឺកចំនួន២នាក់(ស្រីម្នាក់) និងផ្នែករត់ពាក់កណ្តាលម៉ារ៉ាតុនចម្ងាយ ៤២គីឡូម៉ែត្រ ២នាក់(ស្រីម្នាក់) ប៉ុន្តែចំនួននេះអាចមានការប្រែប្រួល ព្រោះសហព័ន្ធកីឡាចំបាប់កម្ពុជា បាននិងកំពុងបញ្ជូនកីឡាករកីឡាការិនីចូលរួមប្រកួតជម្រុះកីឡាអូឡាំពិកនៅប្រទេសតួកគី។
លោកអគ្គលេខាធិការរូបនេះបានបន្ថែមថា វីរៈកីឡាការិនីតេក្វាន់ដូ ស៊ន សៀវម៉ី នឹងចេញទៅហ្វឹកហាត់នៅប្រទេសកូរ៉េ នៅថ្ងៃទី១៦ ខែឧសភា ហើយកីឡាការិនីរូបនេះនឹងមកដល់កម្ពុជានៅថ្ងៃទី២៧ ខែកក្កដា ឆ្នាំ២០១៦។ ថ្នាក់ដឹកនាំគណៈប្រតិភូកម្ពុជា នឹងដឹកនាំកីឡាការិនីរូបនេះ ទៅចូលរួមប្រកួតកីឡាអូឡាំពិកនៅថ្ងៃទី២៩ ខែកក្កដា មុនថ្ងៃប្រកួតប្រហែលមួយសប្តាហ៍ទៅពីរសប្តាហ៍ ដើម្បីយកពេលវេលាសម្រាប់ធ្វើការហ្វឹកហាត់ឲ្យស៊ាំទៅនឹងអាកាសធាតុនៅទីនោះ។
ទោះបីជាវិរៈកីឡាការិនី ស៊ន សៀវម៉ី ដណ្តើមបានកៅអីពេញសិទ្ធសម្រាប់ការចូលរួមប្រកួតកីឡាអូឡាំពិកក៏ដោយ ប៉ុន្តែសមត្ថភាពខាងដម្លាំងកាយនៅមានកម្រិត និងមានការខ្វះខាតនូវចំណុចមួយចំនួន ដែលជាហេតុធ្វើឲ្យកីឡាការិនីរូបនេះ។ ហើយសម្រាប់ការចេញទៅហ្វឹកហាត់ជាង២ខែនៅប្រទេសកូរ៉េ លើកនេះ ត្រូវបាន លោក វ៉ាត់ ចំរើន អះអាងថា មានខុសប្លែកពីលើកមុន ដោយលើកនេះ សៀវម៉ី នឹងធ្វើការហ្វឹកហាត់ដោយផ្តោតទៅលើផ្នែកកម្លាំងកាយ និងចិត្តសាស្ត្រ ខណៈលើកមុនផ្តោតសំខាន់ទៅលើបច្ចេកទេស និងសមត្ថភាពប្រកួតប៉ុណ្ណោះ។
លោក វ៉ាត់ ចំរើន បានវាយតម្លៃថា សមត្ថភាពរបស់កម្ពុជាបច្ចុប្បន្នបើប្រៀបធៀបទៅនឹងប្រទេសនៅលើពិភពលោក គឹនៅចាញ់តែប្រទេសកូរ៉េតែមួយប៉ុណ្ណោះ ប្រសិនបើកម្ពុជាអាចសិក្សាពីចំណុចខ្សោយរបស់ប្រទេសកូរ៉េបាន នោះកម្ពុជា នឹងអាចឈរលំដាប់ពិភព។ ការវាយតម្លៃបែបនេះដោយសារប្រទេសកូរ៉េសម្បូរទៅដោយធនធានកីឡាការិនីដែលមានសមត្ថភាព ពោលគឺរាល់ការប្រកួតប្រទេសនេះតែងតែដាក់កីឡករឲ្យចូលរួមប្រកួតផ្សេងៗគ្នា ជាហេតុធ្វើឲ្យកម្ពុជាពិបាកក្នុងការស្វែងយល់ពីកម្រិតបច្ចេកទេស និងយុទ្ធសាស្ត្ររបស់ពួកគេទាំងនោះ។
នាឱកាសនៃការប្រគល់រង្វាន់របស់ណាហ្គាវើលនោះដែរ លោក Pern Chen បានមានប្រសាសន៍ថា សាទរដល់វីរៈកីឡាការិនី ស៊ន សៀវម៉ី និងគណៈកម្មាធិការជាតិអូឡាំពិកកម្ពុជា ដែលបាននាំស្នាដៃដ៏ត្រចះត្រចង់ជូនកម្ពុជា ហើយ លោក ទន្ទឹងរង់ចាំដំណឹងរបស់កីឡាការិនី ស៊ន សៀវម៉ី ក្នុងការដណ្តើមបានមេដាយមាសពីការប្រកួតកីឡាអូឡាំពិកនៅទីក្រុងរីយ៉ូ ប្រទេសប្រេស៊ីល។
គួរបញ្ជាក់ថា វីរកីឡាការិនី ស៊ន សៀវម៉ី បានឈ្នះមេដាយមាសពីការប្រកួតជម្រុះកីឡាអូឡាំពិកក្នុងប្រភេទទម្ងន់ ៦៧គីឡូក្រាម នៅទីក្រុងម៉ានីល ប្រទេសហ្វីលីពីន កាលពីថ្ងៃទី១៦ ខែមេសា រួចបន្តឈ្នះមេដាយប្រាក់ពីការប្រកួតកីឡាតេក្វាន់ដូជើងឯកទ្វីបអាស៊ី ទៀតផង។ វីរៈកីឡាការិនី ស៊ន សៀវម៉ី នឹងធ្ធ្វើការហ្វឹកហាត់នៅប្រទេសកូរ៉េរយៈពេលជាង២ខែ សម្រាប់ត្រៀមប្រកួតកីឡាអូឡាំពិក នៅទីក្រុងរីយ៉ូ ប្រទេសប្រេស៊ីល ក្នុងប្រភេទទម្ងន់លើស ៦៧គីឡូក្រាម៕