សហភាពអឺរ៉ុបប្រចាំកម្ពុជា ក្រោមកិច្ចសហការជាមួយគណៈកម្មការស្ត្រី និងកីឡា នៃគណៈកម្មាធិការជាតិអូឡាំពិកកម្ពុជា (NOCC) នឹងរៀបចំពិធីជិះកង់រួមគ្នានាថ្ងៃទី៧ ខែឧសភា ខាងមុខ ក្រោមប្រធានបទរៀងៗខ្លួន។ សម្រាប់ EU ប្រធានបទនៃការជិះកង់នេះ គឺ «សហភាពអឺរ៉ុប និងកម្ពុជា នាំគ្នារក្សាភពផែនដី» រីឯគណៈកម្មការស្ត្រី និងកីឡារបស់ NOCC ផ្តោតលើ «ការចូលរួមរំលែកសេចក្តីស្រឡាញ់ និងការគោរពប្រតិបត្តិអ្នកម្តាយ!!!» (Bike for Mom)។
ដើម្បីអបអរទិវាអឺរ៉ុប ឆ្នាំ២០១៦ ប្រតិភូសហភាពអឺរ៉ុបប្រចាំកម្ពុជា នឹងរៀបចំព្រឹត្តិការណ៍អឺរ៉ុបលើកកម្ពស់ការជិះកង់ ក្នុងគោលបំណងចូលរួមទិវាប្រវត្តិសាស្ត្រនេះ។ ក្នុងឆ្នាំនេះ កម្មវិធីអឺរ៉ុបលើកកម្ពស់ការជិះកង់ នឹងធ្វើឡើងក្រោមប្រធានបទ«សហភាពអឺរ៉ុប និងកម្ពុជា នាំគ្នារក្សាភពផែនដី» នៅពហុកីឡដ្ឋានជាតិអូឡាំពិក នៅថ្ងៃទី៧ ខែឧសភា។
ទាក់ទិននឹងការប្រារព្ធទិវាអឺរ៉ុប ដែលតែងធ្វើនៅថ្ងៃទី៩ ខែឧសភា លោក George Edgar ឯកអគ្គរដ្ឋទូតអឺរ៉ុបប្រចាំកម្ពុជាបានឲ្យដឹងថា៖«មនុស្សជាច្រើននៅក្នុងប្រទេសកម្ពុជាបានឮអំពីសហភាពអឺរ៉ុប ប៉ុន្តែពួកគេអាចមិនដឹងថា ពួកយើងធ្វើអ្វីខ្លះនោះទេ។ តាមរយៈព្រឹត្តិការណ៍ជាច្រើន យើងព្យាយាមពន្យល់និងចែករំលែកភាពជាគំរូរបស់សហភាពអឺរ៉ុប ដែលផ្ដោតលើ សន្តិភាព ប្រជាធិបតេយ្យ និងសាមគ្គីភាព និងការរួបរួមក្នុងភាពចម្រុះ»។
ជាមួយនឹងកម្មវិធីអឺរ៉ុបលើកកម្ពស់ការជិះកង់ ដែលជាផ្នែកមួយនៃព្រឹត្តិការណ៍អបអរទិវាអឺរ៉ុប ឆ្នាំ២០១៦នេះ ឯកអគ្គរដ្ឋទូតរូបនេះបន្ថែម ក្នុងសន្និសីទកាសែតថ្ងៃទី៥ ខែឧសភាថា កម្មវិធីជិះកង់នេះទទួលបានការគាំទ្រពីសាលារាជធានីភ្នំពេញ និងមានប្រជាពលរដ្ឋរាប់ពាន់នាក់ចូលរួម។
ក្នុងឆ្នាំ២០១៦នេះ កម្មវិធីអឺរ៉ុបលើកកម្ពស់ការជិះកង់ ដោយជិះកង់ដង្ហែតាមវិថីនានាក្នុងរាជធានីភ្នំពេញ ដោយឆ្លងកាត់តាមស្ថានទូតប្រទេសជាសមាជិកសហភាពអឺរ៉ុបដែលមានតាំងនៅកម្ពុជា។ កម្មវិធីឆ្នាំនេះ ប្រារព្ធឡើងក្នុងគោលបំណងដើម្បីបង្កើនការយល់ដឹងអំពីបរិស្ថាន និងពីតម្រូវការក្នុងការការពារប្រព័ន្ធអេកូឡូស៊ី និងបរិស្ថានធម្មជាតិរបស់ប្រទេសកម្ពុជា ក៏ដូចជាភពផែនដីទាំងមូល។
ចំពោះការជ្រើសរើសប្រធានបទ «រួមគ្នាដើម្បីផែនដី» លោក George Edgar បានឲ្យដឹងដែរថា យើងជ្រើសរើសប្រធានបទនេះ ដោយសារការជិះកង់ គឺជាមធ្យោបាយធ្វើដំណើរដ៏ល្អ គ្មានផ្សែង និងដោយសារតែបញ្ហាធំបំផុតមួយចំនួនដែលយើងប្រឈមមុខទាក់ទងនឹងបរិស្ថាន។ លោកបន្តថា កម្ពុជា គឺជាប្រទេសសម្បូរដោយជីវចម្រុះ ហើយសហភាពអឺរ៉ុបបានប្ដេជ្ញាចិត្តក្នុងការគាំទ្រដល់ប្រទេសកម្ពុជា ក្នុងការគ្រប់គ្រងធនធានធម្មជាតិរបស់ខ្លួន និងដើម្បីសម្របខ្លូនទៅនឹងការប្រែប្រួលអាកាសធាតុ។
ដោយឡែក គណៈកម្មការស្ត្រី និងកីឡា នៃគណៈកម្មាធិការជាតិអូឡាំពិកកម្ពុជា (NOCC) ក៏ចូលរួមដឹកនាំព្រឹត្តិការណ៍នេះផងដែរ តាមរយៈប្រធានបទ «Bike for Mom» (ចូលរួមចែករំលែកសេចក្តីស្រឡាញ់ និងការគោរពប្រតិបត្តិអ្នកម្តាយ)។
ការជិះកង់ដើម្បីរំលឹកគុណម្តាយនេះ ធ្វើឡើងក្រោមពាក្យស្លោក ៦ គឺស្ត្រីជាមាតានៃពិភពលោក, ជិះកង់ដើម្បីព្រះគុណម្តាយ, កីឡា និងស្ត្រីទទួលបានជោគជ័យក៏ព្រោះម្តាយ, ទិវាម្តាយជាទិវាស្ត្រី និងកីឡា, កូនភ្លេចគុណរបស់ម្តាយត្រូវអន្តររាយមួយជីវិត និងគុណធម៌របស់ម្តាយជាពន្លឺ នៃជីវិតកូនៗ។
គួរបញ្ជាក់ថា កីឡាករកីឡាការិនីដែលមានបំណងចង់ចូលរួមជិះកង់លេងកម្សាន្តអាចមកចុះឈ្មោះនៅទីស្នាក់ការគណៈកម្មាធិការជាតិអូឡាំពិកកម្ពុជា និងហាងលក់កង់ហោះ ហើយការចុះឈ្មោះមិនមានការបង់ប្រាក់នោះទេ។
មនុស្សជាង៤ពាន់នាក់ ត្រូវបានរំពឹងថា នឹងចូលរួមកម្មវិធីនេះ ។ ពហុកីឡដ្ឋានជាតិអូឡាំពិក គឺជាកន្លែងចេញដំណើរ និងទីផ្ដាច់ព្រ័ត្រ ខណៈការជិះកង់ចាប់ផ្ដើមពីម៉ោង៦ព្រឹក ដល់ម៉ោង១០ព្រឹក។ ទោះជាការកំសាន្តក៏ដោយ អ្នកចូលរួមទាំងអស់ត្រូវពាក់មួកការពារសុវត្ថិភាពរៀងខ្លួន ហើយអ្នកចូលរួមទាំងអស់ ត្រូវប្រុងប្រយ័ត្នដាច់ខាត៕