ស្គីទឹកកករៀបចំប្រកួតជើងឯកថ្នាក់ជាតិទាំងគ្មានការជួយជ្រោមជ្រែងពីក្រសួង

កីឡាជាតិ

ស្គីទឹកកករៀបចំប្រកួតជើងឯកថ្នាក់ជាតិទាំងគ្មានការជួយជ្រោមជ្រែងពីក្រសួង

07, May 2016 , 9:19 am

រូបភាព

ដោយ:

ទោះបីជាគ្មានការជួយជ្រោមជ្រែងពីក្រសួងអប់រំ យុវជន និងកីឡាក៏ដោយ សហព័ន្ធកីឡាស្គីទឹកកកដែលទើបនឹងបង្កើតថ្មោងថ្មីមួយនេះ នឹងចំណាយថវិកាផ្ទាល់ខ្លួនប្រមាណជាជាង១ម៉ឺនដុល្លារ ដើម្បីរៀបចំការប្រកួតជើងឯកថ្នាក់ជាតិប្រចាំឆ្នាំ២០១៦ ដើម្បីជ្រើសរើសកីឡាករកីឡាការិនីជើងខ្លាំងសម្រាប់ធ្វើការប្រមូលផ្តុំជម្រើសជាតិ ត្រៀមចូលរួមប្រកួតក្នុងព្រឹត្តិការណ៍អន្តរជាតិធំៗនាពេលខាងមុខ។ នេះបើយោងតាមការបញ្ជាក់របស់កញ្ញា ឡុង សុធាវី អគ្គលេខាធិការសហព័ន្ធកីឡាស្គីទឹកកកកម្ពុជា។

សហព័ន្ធកីឡាស្គីទឹកកកកម្ពុជា គ្រោងនឹងចំណាយថវិកាផ្ទាល់ខ្លួនប្រមាណជាជាង១ម៉ឺនដុល្លារ សម្រាប់រៀបចំការប្រកួតជើងឯកថ្នាក់ជាតិប្រចាំឆ្នាំ២០១៦ ដើម្បីជ្រើសរើសកីឡាករដែលមានសមត្ថភាពសម្រាប់ធ្វើការប្រមូលផ្តុំជម្រើសជាតិ ដើម្បីហ្វឹកហាត់ត្រៀមចូលរួមប្រកួតក្នុងព្រឹត្តិការណ៍អន្តរជាតិនានា ដូចជាការប្រកួតស៊ីហ្គេមនៅប្រទេសម៉ាឡេស៊ីក្នុងឆ្នាំ២០១៧ និងកម្មវិធី Asian Winter Games នៅប្រទេសជប៉ុន។ ការរៀបចំកម្មវិធីប្រកួតជើងឯកថ្នាក់ជាតិនេះពុំមានការជួយជ្រោមជ្រែងពីក្រសួងអប់រំ យុវជន និងកីឡានោះទេ ពោលគឺ រាល់ការចំណាយទាំងអស់ជាបន្ទុករបស់សហព័ន្ធមួយនេះ។

ទន្ទឹមនឹងនេះ ដើម្បីចូលរួមប្រកួតក្នុងព្រឹត្តិការណ៍អន្តរជាតិខាងលើនេះបាន លុះត្រាសហព័ន្ធមួយនេះបានក្លាយជាសមាជិករបស់សហព័ន្ធកីឡាស្គីទឹកកកពិភពលោកជាមុនសិន ពាក់ព័ន្ធទៅនឹងបញ្ហានេះ កញ្ញា ឡុង សុធាវី បានបញ្ជាក់ថា ដើម្បីបានក្លាយជាសមាជិកកីឡាស្គីទឺកកកពិភពលោក លុះត្រាតែសហព័ន្ធទទួលបានសិទ្ធពីក្រសួងអប់រំ ក្នុងការរៀបចំការប្រកួតជើងឯកថ្នាក់ជាតិ និងមានទីលានស្តង់ដារអន្តរជាតិ ដែលមានទំហំ ៣០ម៉ែត្រ គុណនឹង ៦០ម៉ែត្រជាមុនសិន ទោះបីជាបច្ចុប្បន្នសហព័ន្ធនេះមានទីលានដ៏ស្រស់ស្អាតនៅផ្សារទំនើបអ៊ីអនក៏ដោយ។

សម្រាប់ការរៀបចំការប្រកួតជើងឯកថ្នាក់ជាតិរបស់សហព័ន្ធដែលទើបនឹងបង្កើតថ្មោងថ្មីមួយនេះ ហាក់ដូចជាខុសប្លែកពីសហព័ន្ធជាតិនានា ព្រោះរាល់ការរៀបចំការប្រកួតជើងឯកថ្នាក់ជាតិម្តងៗរបស់សហព័ន្ធដទៃ តែងតែមានការជួយជ្រោមជ្រែង និងទំនុកបម្រុងពីក្រសួងអប់រំ យុវជន និងកឡា។ ពាក់ព័ន្ធទៅនឹងបញ្ហាកានេះ កញ្ញា ឡុង សុធាវី អគ្គលេខាធិការសហព័ន្ធកីឡាស្គីទឹកកកកម្ពុជាបានរៀបរាប់ថា ដោយសារតែសហព័ន្ធរបស់ខ្លួននៅមានចំណុចខ្វះខាតមួយចំនួន មិនទាន់បានបំពេញគ្រប់លក្ខខណ្ឌដែលក្រសួងតម្រូវឲ្យបំពេញ។

ក្នុងបទសម្ភាសន៍ជាមួយសារព័ត៌មានថ្មីៗ កាលពីពេលកន្លងទៅ អគ្គលេខាធិការសហព័ន្ធកីឡាស្គីទឹកកកកម្ពុជាបានប្រាប់ពីមូលហេតុ និងគោលបំណងសម្រាប់ឆ្នាំ២០១៦ដូច្នេះថា៖«គោលដៅសម្រាប់សហព័ន្ធយើងនៅក្នុងឆ្នាំ២០១៦នេះ គឺបង្កើតការប្រកួតជ្រើសរើសជើងឯកថ្នាក់ជាតិ ដើម្បីប្រមូលផ្តុំកីឡាករជម្រើសជាតិ ត្រៀមទៅប្រកួតនៅក្រៅប្រទេស ហើយការប្រកួតនេះទ្រទ្រង់ដោយសហព័ន្ធផ្ទាល់ និងចំណាយដោយសហព័ន្ធផ្ទាល់»។

អគ្គលេខាធិការដដែលបានបន្ថែមថា ពេលនេះសហព័ន្ធបានបញ្ជូនសំណុំឯកសារទៅកាន់ក្រសួងអប់រំ យុវជន និងកីឡារួចរាល់ហើយ ប៉ុន្តែពុំទទួលបានការឆ្លើយតបយ៉ាងណានោះទេ ដោយសារតែសហព័ន្ធនៅមានចំណុចខ្វះខាតមួយចំនួន ពោលគឺខាងក្រសួងតម្រូវឲ្យខាងសហព័ន្ធបញ្ជូនឯកសារពាក់ព័ន្ធទៅនឹងចំនួនកីឡាករកីឡាការិនី និងគ្រូបង្វឹកដែលត្រូវប្រមូលផ្តុំជម្រើសជាតិ។ យ៉ាងណាមិញ សម្រាប់ការប្រមូលផ្តុំសហព័ន្ធដែលទើបតែបង្កើតថ្មោងថ្មីមួយនេះបានបង្ហើបឲ្យដឹងថា សហព័ន្ធត្រូវការកីឡាករ៤រូប កីឡាការិនី៤រូប គ្រូបង្វឹកមួយរូប និងគ្រូជំនួយមួយរូប។

គួរបញ្ជាក់ផងដែរថា ការប្រកួតជើងឯកថ្នាក់ជាតិប្រចាំឆ្នាំ២០១៦ នេះ នឹងប្រព្រឹត្តទៅនៅថ្ងៃទី៧ ខែឧសភា ដោយមានកីឡាករកីឡាការិនីចូលរួមប្រកួតចំនួន២៧រូបក្នុងនោះក៏មានកីឡាករបរទេសផងដែរ។ ពួកគេទាំងនេះមកពីបណ្តាក្លិបចំនួន៥ នៅក្នុងរាជធានីភ្នំពេញ ហើយពួកគេនឹងធ្វើការប្រកួតលើ៧ប្រភេទវិញ្ញាសា។

ទោះបីជាសហព័ន្ធកីឡាស្គីទឹកកកកម្ពុជាមិនទាន់បានការទទួលស្គាល់ពីក្រសួងអប់រំក៏ដោយ ប៉ុន្តែសហព័ន្ធមួយនេះហាក់ដូចជាមានផែនការយុទ្ធសាស្ត្រ និងសកម្មភាពច្រើន ពោលគឹបន្ទាប់ពីបញ្ចប់ការប្រកួតជើងឯកថ្នាក់ជាតិ នៅថ្ងៃទី៣០ ខែមិថុនា សហព័ន្ធនឹងរៀបចំការប្រកួតជ្រើសរើសជើងឯកថ្នាលអាយុក្រោម១៨ឆ្នាំ និងការប្រកួតនៅចុងខែធ្នូខាងមុខនេះ។ ជាមួយគ្នានេះ សហព័ន្ធស្គីទឹកកក នឹងបញ្ជូនកីឡាករចូលរួមប្រកួតក្នុងកម្មវិធី Skate Bangkok 2016 នៅប្រទេសថៃ និងព្រឹត្តិការណ៍ Skate Asian 2016 ក្នុងខែសីហា នៅប្រទេសម៉ាឡេស៊ី។

គួរបញ្ជាក់ថា សម្រាប់ការរៀបចំការប្រកួតជើងឯកថ្នាក់ជាតិប្រចាំឆ្នាំ២០១៦ ដែលប្រព្រឹត្តិទៅនៅថ្ងៃទី៧ ខែឧសភាចុងសប្តាហ៍នេះ សហព័ន្ធកីឡាស្គីទឹកកកកម្ពុជា នឹងអញ្ជើចៅក្រម និងអាជ្ញាកណ្តាលអន្តរជាតិដែលមកពីបណ្តាប្រទេសនៅក្នុងតំបន់អាស៊ានដូចជា ឥណ្ឌូនេស៊ី ម៉ាឡេស៊ី និងថៃ។ ស្របពេលនេះសហព័ន្ធកីឡាស្គីទឹកកកបានអះអាងថា ខ្លួននឹងរៀបចំឲ្យមានវគ្គបណ្តុះបណ្តាលអាជ្ញាកណ្តាល និងចៅក្រមនៅក្នុងខែកក្កដាខាងមុខនេះ៕