ជាតិ
លោកស្រី ខ្លូត ធីតា ចង់ឲ្យអ្នកនិពន្ធនាំគ្នាលើកពីមន្តស្នេហ៍របស់ប្រុសមិនសូវស្អាត និងក្រីក្រ
× បុរសក្រីក្រ ឬប្រុសមិនសូវស្អាត សូមកុំអស់សង្ឃឹមឲ្យសោះ! អ្នកនិពន្ធអាចជួយអ្នកឲ្យមានមន្តស្នេហ៍ ប្រសិនពួកគាត់ធ្វើតាមសំណូមពររបស់លោកស្រីបណ្ឌិតសភាចារ្យ ខ្លូត ធីតា ប្រធានរាជបណ្ឌិត្យសភាកម្ពុជា។ លោកស្រី ខ្លូត ធីតា បានអះអាងថា ស្នាដៃរបស់អ្នកនិពន្ធបានទាញចិត្តលោកស្រី ឲ្យលង់ស្នេហ៍បុរសក្រីក្រដូចជាចៅចិត្រ ហើយលោកស្រីបានសំណូមពរដល់អ្នកនិពន្ធបច្ចុប្បន្នចេះប្រើស្នាដៃខ្លួនដើម្បីទាញអារម្មណ៍នារីទាំងឡាយឲ្យចាប់ចិត្តបុរសក្រីក្រ រូបសម្បត្តិមិនស្អាត ប៉ុន្តែមានសមត្ថភាព។
យោងតាមឃ្លីបវីដេអូមួយដែលបង្ហោះនៅលើគណនីហ្វេសប៊ុករបស់ព្រះមហា ប៉ែន វិបុល នាយកប្រតិបត្ដិនៃសមាគមទ្រទ្រង់ការបោះពុម្ពនិងអប់រំ លោកស្រី ខ្លូត ធីតា បាននិយាយបែបកំប្លែងថា លោកស្រី បានកើតក្នុងត្រកូលគហបតី ប៉ុន្តែបន្ទាប់ពីបានអានរឿងកូលាបប៉ៃលិន លោកស្រីបានចាប់ស្រឡាញ់បុរសដូចជាចៅចិត្រ ដែលពីមុនលោកស្រីមើលអត់សូវឃើញឡើយ។
លោកស្រី ខ្លូត ធីតា បានលើកឡើងថា៖ «ដល់ពេលខ្ញុំមើលរឿងកូលាបប៉ៃលិន ខ្ញុំដូរចិត្តភ្លែត ចង់កូនសេដ្ឋីទាក់ទងម៉ែខ្ញុំ ក៏ខ្ញុំគ្រវីក្បាលដែរ ខ្ញុំស្រឡាញ់តែអ្នកណាដូចចៅចិត្រ ហើយក្រ…»។ ប្រធានរាជបណ្ឌិត្យសភាកម្ពុជា ដែលបានចាត់ទុកខ្លួនឯងជា «ឃុននារី» នោះ បានលើកឡើងថា ស្វាមីរបស់លោកស្រី គឺជាអ្នកបើកបររថយន្តផ្ទាល់សម្រាប់លោកស្រី ដោយគាត់ជាវិស្វករចូលនិវត្តន៍ដែលមានសម្បុរខ្មៅ មកពីខេត្តស្វាយរៀង។
ជាមួយនឹងការសរសើរថា អ្នកនិពន្ធរឿង កូលាបប៉ៃលិន (លោក ញ៉ុក ថែម) រឿងផ្តាស្រពោន (លោក នូ ហាច) ជាដើម ចេះប្រើស្នាដៃទាញចិត្តនារីឲ្យលះបង់គ្រប់បែបយ៉ាងដើម្បីត្រៀមរកតែអ្នកក្រនោះ លោកស្រី ខ្លូត ធីតា ចង់ឲ្យអ្នកនិពន្ធបច្ចុប្បន្ននាំគ្នាទាញអ្នកនយោបាយ ជាពិសេសស្រីៗដែលឃើញតែវីឡា លុយ ឡាន ឲ្យវិលមកវិញ ។
បើតាមលោកស្រី បុរសក្រីក្រ ឬមិនសូវស្អាត មួយចំនួនមានលក្ខណៈសម្បត្តិប្រសើរជាងបណ្ឌិតមួយចំនួនដែលមានតែសញ្ញាបត្រ តែសញ្ញាឃើញ មិនសូវមានការអនុវត្ត។ «បណ្ឌិតសភាចារ្យមានអីអស្ចារ្យ កុំជឿបណ្ឌិតពេក ពេលខ្លះក៏ខុសដែរ»។ នេះជាការលើកឡើងរបស់លោកស្រី ខ្លូត ធីតា។
សូមទស្សនា និងស្តាប់ប្រសាសន៍លោកស្រី ខ្លូត ធីតា ដូចខាងក្រោម៖
Tag:
អ្នកនិពន្ធ
ខ្លូត ធីតា
© រក្សាសិទ្ធិដោយ thmeythmey.com