កីឡាជាតិ
ស្គីទឹកកកស្នើសុំក្រសួងអប់រំចូលជាសមាជិក ក្រោយបញ្ចប់ការប្រកួតថ្នាក់ជាតិ
× សហព័ន្ធកីឡាស្គីទឹកកកកម្ពុជា ក្រោយពីបញ្ចប់ការប្រកួតជើងឯកថ្នាក់ជាតិប្រចាំឆ្នាំ២០១៦ ដែលរៀបចំ និងទ្រទ្រង់ដោយសហព័ន្ធផ្ទាល់យ៉ាងជោគជ័យកាលពីថ្ងៃទី៧ ខែឧសភា លោក ម៉េង ហៀងប្រធានសហព័ន្ធនេះបានស្នើរសុំគោលការណ៍ពីក្រសួងអប់រំ យុវជន និងកីឡា ដើម្បីដាក់ប្រភេទកីឡានេះចូលក្នុងកម្មវិធីប្រកួតជើងឯកថ្នាក់ជាតិរបស់ក្រសួង ក្នុងគោលបំណងដើម្បីប្រមូលផ្តុំកីឡាករជម្រើសជាតិត្រៀមប្រកួតក្នុងព្រឹត្តិការណ៍អន្តរជាតិផ្សេងៗ។
សហព័ន្ធកីឡាស្គីទឹកកកកម្ពុជាបានស្នើរសុំគោលការណ៍ពីក្រសួងក្រសួងអប់រំ យុវជន និងកីឡា ដើម្បីដាក់បញ្ចូលកីឡាស្គីទឹកកក ក្នុងកម្មវិធីប្រកួតជើងឯកថ្នាក់ជាតិរបស់ក្រសួង ក្នុងគោលបំណងដើម្បីប្រមូលផ្តុំកីឡាករ-កីឡាការិនីជម្រើសជាតិសម្រាប់ធ្វើការហ្វឹកហាត់ត្រៀមប្រកួតក្នុងព្រឹត្តិការណ៍អន្តរជាតិផ្សេងៗ ជាពិសេសការប្រកួតស៊ីហ្គេម ឆ្នាំ២០១៧ នៅប្រទេសម៉ាឡេស៊ី។
ថ្លែងនៅក្នុងកម្មវិធីបិទការប្រកួតជើងឯកថ្នាក់ជាតិប្រចាំឆ្នាំ២០១៦ កាលពីម្សិលមិញ លោក ម៉េង ហៀង ប្រធានសហព័ន្ធកីឡាស្គីទឺកកកកម្ពុជាមានប្រសាសន៍ថា៖«ខ្ញុំបាទសង្ឃឹមយ៉ាងមុតមាំថា ក្រសួងអប់រំ យុវជន និងកីឡា នឹងទទួលសំណើរស្នើសុំគោលការណ៍ពីសហព័ន្ធយើងខ្ញុំ ដើម្បីដាក់បញ្ចូលកីឡាស្គីទឹកកកចូលក្នុងកម្មវិធីប្រកួតជើងឯកថ្នាក់ជាតិឆ្នាំ២០១៧ ក្នុងគោលបំណងបង្កើតឲ្យមានកីឡាករ-កីឡាការិនីជម្រើសជាតិត្រៀមប្រកួតក្នុងព្រឹត្តិការណ៍អន្តរជាតិនានា»។
លោកអគ្គលេខាធិការរូបនេះបន្តថា ប្រសិនបើសហព័ន្ធទទួលបានការអនុញ្ញាតពីក្រសួងអប់រំ យុវជន និងកីឡា ក្នុងការដាក់បញ្ចូលកីឡាស្គីទឹកកកសម្រាប់ការរៀបចំជើងឯកថ្នាក់ជាតិរបស់ក្រសួង សហព័ន្ធនឹងដាក់សំណើរសុំគោលការណ៍ទៅកាន់គណៈកម្មាធិការជាតិអូឡាំពិកកម្ពុជា(NOCC) ក្នុងការបញ្ជូលកីឡាករកីឡាការិនីស្គីទឹកកកកម្ពុជា ចូលរួមប្រកួតកីឡាស៊ីហ្គេម ឆ្នាំ២០១៧ នៅប្រទេសម៉ាឡេស៊ី។ ហើយលោកសង្ឃឹមថា នៅថ្ងៃណាមួយនាពេលអនាគត នឹងមានទង់ជាតិ កម្ពុជា ហោះហើរលើកដំបូង នៅក្នុងការប្រកួតស៊ីហ្គេម អាស៊ានហ្គេម និងកីឡាអូឡាំពិករដូវរងារលើឆាកអន្តរជាតិ។
នាឱកាសនោះដែរ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានកោតសរសើរចំពោះសមត្ថភាព និងទេព្យកោសល្យ របស់កីឡាករកីឡាការិនីស្តីទឹកកក ដែលបានបង្ហាញពីភាពអស្ចារ្យ របស់ខ្លួនយ៉ាងប៉ិនប្រសប់ក្នុងការប្រកួតដែលធ្វើឲ្យការប្រកួតជើងឯកថ្នាក់ជាតិលើកទី២ បញ្ចប់ដោយជោគជ័យ និងទទួលបានការគាំទ្រយ៉ាងច្រើនកុះកររបស់ទស្សនិកជន។
លោករដ្ឋមន្ត្រីបញ្ជាក់ដូច្នេះថា៖«ខ្ញុំសូមអបអរសាទរចំពោះសហព័ន្ធកីឡាស្គីទឺកកក ដែលបានរៀបចំការប្រកួតជើងឯកនេះជាលើកទី២។ ហើយយើងឃើញថា កីឡាករកីឡាការិនីរបស់របស់កម្ពុជា បានខិតខំប្រឹងប្រែងសម្តែងអស់ពីកម្លាំងកាយចិត្ត ដើម្បីបង្ហាញយុវជន ក៏ដូចជាបង្ហាញសមត្ថភាពរបស់ខ្លួន ថ្វីដ្បិតតែកីឡាស្គីទឹកកកនេះជាកីឡាមួយថ្មីនៅក្នុងព្រះរាជាណាចក្រកម្ពុជា ប៉ុន្តែកីឡាករកីឡាការិនីអាចសម្តែងបានយ៉ាងស្ទាត់ជំនាញ»។
សហព័ន្ធកីឡាស្គីទឺកកកកម្ពុជា បានបង្កើតឡើងនៅថ្ងៃទី១១ ខែឧសភា ឆ្នាំ២០១៥ ដែលទទួលបានការទទួលស្គាល់ពីគណៈកម្មាធិការជាតិអូឡាំពិកកម្ពុជា(NOCC) នៅថ្ងៃទី២ ខែមិថុនា ឆ្នាំ២០១៥ និងដោយក្រសួងអប់រំ យុវជន និងកីឡា នៅថ្ងៃទី២៣ ខែកញ្ញា ឆ្នាំ២០១៥។ កីឡាស្គីទឹកកកនេះមានពីរប្រភេទគឺ កីឡារត់ល្បឿនលើទឹកកក(Speed Skating) និងកីឡាស្គីទឹកកកសម្តែង(Figure Skating)។
គួររំលឹកផងដែរថា កីឡាស្គីទឹកកកជាប្រភេទកីឡារដូវរងារ និងចាត់ចូលសមាជិកកីឡាអូឡាំពិកនៅឆ្នាំ១៩០៨ និងជាកីឡាដែលកំពុងមានការពេញនិយមនៅលើសកលលោកនាពេលបច្ចុប្បន្ន។ កីឡានេះទើបតែបង្ហាញវត្តមានក្នុងព្រះរាជាណាចក្រកម្ពុជាក្នុងរយៈពេល២ប៉ុណ្ណោះ ហើយសម្រាប់ការបង្ហាញវត្តមាននេះមិនត្រឹមតែ ទទួលបានការគាំទ្រ និងទាក់ទាញយុវជន យុវនារី ជាតិ និងអន្តរជាតិ មកជិះលេងកម្សាន្ត ប៉ុណ្ណោះទេ ប៉ុន្តែវាជាការឆ្លុះបញ្ចាំងពីភាពរីកចម្រើនខាងផ្នែកវិស័យកីឡារបស់កម្ពុជា។
គួរបញ្ជាក់ថា សម្រាប់ប្រកួតកីឡាស្គីទឹកកកជើងឯកថ្នាក់ជាតិកាលពីម្សិលមិញ មានកីឡាករកីឡាការិនីចូលរួមប្រកួតចំនួន២៣នាក់(ស្រី១៣នាក់) មកពីក្លិបចំនួនចំនួន៥។ ពួកគេទាំងនេះប្រកួតលើវិញ្ញាសាចំនួន៧ គឺ កម្រិតមូលដ្ឋានទី១, កម្រិតមូលដ្ឋានទី២, ស្តារឡេឌីស, ព្រី ព្រីលែមិនរី បុរស, ព្រីលែមិនរី បុរស, ព្រីលែមិនរី ឡាឌីស និងអ៊ីលែមិនធែរីបុរស។ អាជ្ញាកណ្តាល និងចៅក្រមកាត់សេចក្តី មកពីប្រទេសថៃ ម៉ាឡេស៊ី និងឥណ្ឌូនេស៊ី។
ការប្រកួតនោះដែរ ដោយមានការអញ្ជើញចូលរួមពីសំណាក់លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា លោក សុខ ពុទ្ធីវុធ ប្រធានប្រឹក្សាភិបាលនៃមជ្ឈមណ្ឌលកម្សាន្ត Ice Park និងអ្នកស្រី ហ៊ុន ម៉ាលី ព្រមទាំងភ្ញៀវកិត្តយសជាតិ និងអន្តរជាតិជាច្រើនរូបទៀត៕
© រក្សាសិទ្ធិដោយ thmeythmey.com