កីឡាជាតិ
ជាតិ
បឹងកេត លត់ ប៉ូលិស ៧-១ មុនពេល ណាហ្គា ចែកគ្នាម្នាក់១ពិន្ទុជាមួយ ថាយហ្គឺរ
×![]()
ការប្រកួតក្របខណ្ឌមិត្តហ្វូនខេមបូឌានលីករដូវកាល ២០១៦ នៃវគ្គប្រកួតវិលជុំ សប្តាហ៍ទី៧ នៅពហុកីឡដ្ឋានជាតិ កាលពីថ្ងៃទី៨ ខែឧសភា ម្សិលមិញ បឹងកេតអង្គរ បានលត់អគ្គស្នងការដ្ឋាននគរបាលជាតិ ៧-១ មុនពេលខេមបូឌានថាយហ្គឺរ និងក្រុមណាហ្គាវើលចែកគ្នាម្នាក់មួយពិន្ទុ បន្ទាប់ពីរក្សាលទ្ធផល ១-១។
ក្រុមបឹងកេតអង្គរ បានលត់ក្រុមប៉ូលិសយ៉ាងចាស់ដៃ ៧-១ នាការប្រកួតពានរង្វាន់ក្របខណ្ឌមិត្តហ្វូនខេមបូឌានលីក កាលពីម្សិលមិញ នៅពហុកីឡដ្ឋានជាតិ។ ជ័យជម្នះនេះបានធើ្វឲ្យបឹងកេតទទួលបាន៣ពិន្ទុបន្ថែមដើម្បីឈរលេខរៀងទី២ បន្ទាប់ពីក្រសួងការពារជាតិដោយមាន១៨ពិន្ទុ ខណៈក្រុមប៉ូលិសនៅតែបន្តមិនស្គាល់ជ័យជម្នះតាំងពីចាប់ផ្តើមការប្រកួតរហូតដល់សប្តាហ៍ទី៧នេះ។
នាការប្រកួតយ៉ាងស្វិតសា្វញនៅពហុកីឡដ្ឋានជាតិកាលពីម្សិលមិញ កីឡាករ ទិត្យ ឌីណាដែលជាប្រធានក្រុមបានរកគ្រាប់បាល់មួយគ្រាប់ជូនក្រុមប៉ូលិសនៅនាទីទី១០ ដោយការទាត់បាល់ពិន័យ ១១ម៉ែត្រ បន្ទាប់ពីខ្សែការពាររបស់បឹងកេតបង្ករកំហុសនៅតំបន់គ្រោះថ្នាក់។ ១០នាទីក្រោយមកខ្សែការពាររបស់ក្រុមប៉ូលិលបានបង្ករកំហុសនៅតំបន់គ្រោះថ្នាក់វិញម្តង ធ្វើឲ្យប្រធានក្រុមបឹងកេត កីឡាការ ឃួន ឡាបូរ៉ាវី សម្រេចបានមួយគ្រាប់ដោយការទាត់បាល់ពិន័យ ដើម្បីតាមស្មើ ១-១ ជាមួយប៉ូលិស។
ជាមួយគ្នានេះ ប្រធានក្រុមដដែលសម្រេចបាន២គ្រាប់បន្ថែមជាបន្តបន្ទាប់នៅនាទីទ៣៣ និងនាទី៣៥ លុះដល់នាទីទី៤២ កីឡាករ DEBIRO DZARMA BAT ទម្លុះសំណាញ់ដោយទាត់ពីចម្ងាយបានមួយគ្រាប់បន្ថែម ធ្វើឲ្យក្រុមបឹងកេតអង្គរអែហ្វស៊ី នាំមុខក្រុមប៉ូលិស ៤-១ ជាបណ្តោះអាសន្នក្រោយបញ្ចប់តង់ទី១។
ទៅមិនឆ្ងាញពីប្រធានក្រុមរបស់បឹងកេត ឃួន ឡាបូរ៉ាវី នៅនាទីទី៥៣ កីឡាកររូបនេះរកបានមួយគ្រាប់ទៀតជូនក្រុម លុះដល់នាទី៥៧ ប្រធានក្រុមរូបនេះត្រូវប្តូរចេញជំនួសដោយកីឡាករ ចាន់ វឌ្ឍនាកា ក្រោយពីដូរបានប្រហែលជាជាង២០នាទី កីឡាកររូបនេះ បានរកគ្រាប់ជូនក្រុម២គ្រាប់បន្ថែមនៅនាទី៨០ និងនាទី៨៩ ជួយឲ្យក្រុមបឹងកេតអង្គរយកឈ្នះលើក្រុមប៉ូលិសក្នុងលទ្ធផល ៧-១ ក្រោយបញ្ចប់តង់ទី២។
ចំណែក ក្រុមខេបូឌាមបូឌានថាយហ្គឺរ និងក្រុមណាហ្គាវើលបានចែកគ្នាម្នាក់មួយពិន្ទុក្រោយបញ្ចប់ការប្រកួតរក្សាលទ្ធផលស្មើ ១-១។ មួយគ្រាប់របស់ក្រុមណហ្គាវើលសម្រេចដោយកីឡាករ Park Yong Jun នៅនាទី៦៥ ដោយការទាត់បាល់ពិន័យ១១ម៉ែត្រ ខណៈមួយគ្រាប់របស់ក្រុមខេមបូឌានថាយហ្គឺរ សម្រេចដោយកីឡាករ សួង វីរៈ នៅនាទី៩០៕
Tag:
បាល់ទាត់
Cambodian League 2016
© រក្សាសិទ្ធិដោយ thmeythmey.com
