ការប្រកួតពានរង្វាន់សម្តេច ហ៊ុន សែន ប្រចាំ២០១៦ បានឈានដល់សប្តាហ៍ទី៦ នៃវគ្គប្រកួតវិលជុំដំណាក់កាលផ្តាច់ព្រ័ត្រ ដោយល្ងាចនេះមានការប្រកួតចំនួន៣គូនៅក្នុងពូល C និង៣គូនៅក្នុងពូល D នៅតាមកីឡដ្ឋានរៀងផ្សេងគ្នា។ ក្រុមឡើងមកពីវគ្គជម្រុះ ខេត្តស្វាយរៀង ស្វាគមន៍ ខេត្តព្រះវិហារ មុនក្រុមទាំង៥ នៅក្នុងក្របមិត្តហ្វូនខេមបូឌានលីក ជួប ក្រុមឡើងមកពីវគ្គជម្រុះតាមខេត្ត។ ចំណែកក្រុមសៀមរាបអង្គរ ត្រូវការឈ្នះដើម្បីឈរលំដាប់លេខ១ក្នុងពូល។
ក្រុមលេខ១ពូល B ឡើងពីវគ្គជម្រុះ ខេត្តស្វាយរៀង ក្រោយពីយកស្មើជាមួយក្រុមនៅក្នុងក្របខណ្ឌលីក អគ្គស្នងការនគរបាលជាតិ ៣-៣ កាលពីសប្តាហ៍ទី៤ នឹងបើកកីឡដ្ឋានខេត្តស្វាយរៀង ដើម្បីស្វាគមន៍ក្រុមភ្ញៀវខេត្តព្រះវិហារ នៅក្នុងពូល D។
នៅក្នុងពូល D ដដែល ក្រុមឈរលំដាប់ទី១ក្នុងពូល ណាហ្គាវើល នឹងធ្វើដំណើរទៅកាន់ខេត្តសៀមរាប ដើម្បីជួបប្រកួតជាមួយក្រុមម្ចាស់ផ្ទះឈរលំដាប់ទី២ សៀមរាបអង្គរ ដើម្បីរកជ័យជម្នះសម្រាប់បន្តឈរលំដាប់លេខ១ ខណៈក្រុមសៀមរាបអង្គរត្រូវការឈ្នះ ដើម្បីឈរលំដាប់លេខ១។ ពហុកីឡដ្ឋានជាតិនឹងក្លាយជាទីតាំងប្រកួតកាត់ក្តីរវាងក្រុមនៅក្នុងលីកកំពូល អគ្គស្នងការនគរបាលជាតិ និងក្រុមឡើងមកពីវគ្គជម្រុះ ខេត្តក្រចេះ។
ដោយឡែក ក្នុងពូល C ខេត្តប៉ៃលិន ក្រោយពីរងការបំបាក់របស់ក្រុមភ្នំពេញក្រោន ១៦-០ កាលពីសប្តាហ៍ទី៤ នឹងបើកីឡដ្ឋានខេត្តប៉ៃលិន ស្វាគមន៍ក្រុមភ្ញៀវ វេស្ទើនភ្នំពេញ ខណៈក្រុមខេត្តកំពត ស្វាគមន៍ក្រុមឈរលំដាប់លេខរៀងទី២ មជ្ឈមណ្ឌលកំចាត់មីនកម្ពុជា។ ចំណែកក្រុមដែលឈរលំដាប់លេខ១ក្នុងពូល ភ្នំពេញក្រោន នឹងប្រើកីឡដ្ឋាន RSN ដើម្បីស្វាគមន៍ក្រុមភ្ញៀវ ខេត្តកំពង់ស្ពឺ៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី១១ ខែឧសភា នេះ៖
ពូល C៖
-ម៉ោង៣:៣០-ខេត្តប៉ៃលិន ជួប វេស្ទើនភ្នំពេញ នៅកីឡដ្ឋានខេត្តប៉ៃលិន
-ម៉ោង៣:៣០-ខេត្តកំពត ជួប មជ្ឈមណ្ឌលកំចាត់មីនកម្ពុជា នៅកីឡដ្ឋានខេត្តកំពត
-ម៉ោង១៨:០០-ភ្នំពេញក្រោន ជួប ខេត្តកំពង់ស្ពឺ នៅកីឡដ្ឋាន RSN
ពូល D៖
-ម៉ោង៣:៣០-សៀមរាបអង្គរ ជួប ណាហ្គាវើល នៅពហុកីឡដ្ឋានខេត្តសៀមរាប
-ម៉ោង៣:៣០-ខេត្តស្វាយរៀង ជួប ខេត្តព្រះវិហារ នៅកីឡដ្ឋានខេត្តស្វាយរៀង
-ម៉ោង១៨:០០-អគ្គស្នងការនគរបាលជាតិ ជួប ខេត្តក្រចេះ នៅពហុកីឡដ្ឋានជាតិ។