កីឡាអន្តរជាតិ
អន្តរជាតិ
Bayern ទិញបាន Hummels និង Sanches ជាផ្លូវការមុនបើករដូវកាលថ្មី
×
ម្ចាស់ជើងឯក Bundesliga អាល្លឺម៉ង់ Bayern Munich បានចុះហត្ថលេខាទិញយកខ្សែការពារ Mats Hummels របស់ក្រុម Borussia Dortmund និងខ្សែបម្រើក្លិប Benfica កីឡាករ Renato Sanches ជាផ្លូវការហើយដើម្បីជួយក្រុមនៅរដូវកាលក្រោយក្រោមការដឹកនាំរបស់គ្រូបង្វឹកថ្មីលោក Carlo Ancelotti ។
Hummels វ័យ ២៧ឆ្នាំ នឹងចូលរួមជាមួយក្រុម Bayern នៅលើកិច្ចសន្យារយៈពេលប្រាំឆ្នាំប៉ុន្តែមិនបានបង្ហាញពីតម្លៃផ្ទេរនោះឡើយ។ កីឡាករសញ្ជាតិអាល្លឺម៉ង់រូបនេះក៏ធ្លាប់ផ្តើមអាជីពរបស់ខ្លួននៅ Bayern ផងដែរកាលពីឆ្នាំ២០០៧ មុនផ្លាស់ទៅក្រុម Dortmund។ ហើយការបង្ហាញខ្លួនរបស់ Hummels លើកចុងក្រោយសម្រាប់ Dortmund នៅពេលប៉ះជាមួយ Bayern Munich ក្នុងវគ្គផ្តាច់ព្រ័ត្រពាន German Cup នៅថ្ងៃសៅរ៍ ទី២១ ឧសភា ខាងមុខនេះ។
សម្រាប់ខ្សែបម្រើ Sanches វ័យ១៨ឆ្នាំ ត្រូវបានក្រុម Bayern យកមកកាន់ទឹកដី Allianz Arena ក្នុងតម្លៃផ្ទេរ២៧.៥ លានផោន ជិត ៤០លានដុល្លារអាមេរិក លើកិច្ចសន្យារយៈពេល៥ឆ្នាំ។ ហើយកីឡាករអន្តរជាតិព័រទុយហ្គាល់រូបនេះក៏មានការចាប់អារម្មណ៍ខ្លាំងពីសំណាក់ក្លិប Manchester United ផងដែរដោយហ៊ានថ្លៃដល់ទៅជាង៥០លានដុល្លារឯណោះ។
កីឡាករឆ្នើមទាំងពីរនឹងត្រូវរួមក្រុមជាមួយគ្នានៅរដូវកាលក្រោយក្រោមការដឹកនាំរបស់គ្រូបង្វឹកថ្មីលោក Carlo Ancelotti ដែលត្រូវជំនួសគ្រូបង្វឹកចាស់លោក Pep Guardiola ដែលចាកចេញដើម្បីទៅដឹកនាំក្រុម Manchester City ៕
© រក្សាសិទ្ធិដោយ thmeythmey.com