ជាតិ
នយោបាយជាតិ
ក្រសួងការបរទេសរង់ចាំចម្លើយពីលោក កុយ គួង លើករណីលក់ថ្នាំជក់ និងស្រាខុសច្បាប់
× ក្រសួងការបរទេសកម្ពុជា កំពុងរង់ចាំចម្លើយបំភ្លឺពីលោក កុយ គួង ឯកអគ្គរាជទូតខ្មែរប្រចាំអូស្ត្រាលី ជុំវិញព័ត៌មានដែលបានផ្សព្វផ្សាយថា លោក កុយ គួង បានលក់ថ្នាំជក់ និងលក់ស្រា ឥតបង់ពន្ធនៅប្រទេសអូស្ត្រាលី។ នេះបើតាមលោក ជុំ សុន្ទរី អ្នកនាំពាក្យក្រសួងការបរទេស។
ថ្លែងចំពោះមុខអ្នកកាសែតនៅព្រឹកនេះ លោក ជុំ សុន្ទរី បានអះអាងថា ក្រសួងការបរទេសបានដឹងពីដំណឹងនេះហើយ ដោយក្រសួងបានចេញលិខិតណែនាំឲ្យលោក កុយ គួង ធ្វើការបកស្រាយពីព័ត៌មានលក់ថ្នាំជក់ និងលក់ស្រា ខុសច្បាប់នេះឲ្យបានច្បាស់លាស់។
មានសំឡេង
មន្ត្រីទូតបរទេសជាច្រើននាក់រួមទាំងមន្រ្តីទូតកម្ពុជាប្រចាំ អូស្ត្រាលីផងដែរនោះ កំពុងស្ថិតក្រោមការស៊ើបអង្កេត ពាក់ព័ន្ធការជួញដូរគ្រឿងស្រវឹងនិងថ្នាំជក់ក្នុងទីផ្សារងងឹត។ នេះបើតាមសារព័ត៌មាន Sydney Morning Herald។
អ្នកការទូត និងស្ថានទូតបរទេសមានបុព្វសិទ្ធពិសេសក្នុងនាំចូលទំនិញដូចជាបារី និងគ្រឿងស្រវឹងមិនបាច់បង់ពន្ធក្នុងបរិមាណច្រើន។
បើយោងសារព័ត៌មាន Sydney Morning Herald មន្ត្រីទូតម្នាក់អាចនាំស្រាបៀ ៥០០ លីត្រ ស្រា ១២០លីត្រ និងបារី ១០០០០ ដើមសម្រាប់ការប្រើប្រាស់ផ្ទាល់ខ្លួន ពីរដងក្នុងរយៈពេលមួយឆ្នាំ។ តែបើស្ថានទូតអាចនាំចូលទំនិញខាងលើក្នុងបរិមាណទ្វេដង។
យ៉ាងណាមិញ វាជារឿងខុសច្បាប់ សម្រាប់អ្នកការទូត និងស្ថានទូតបរទេសដែលលក់គ្រឿងស្រវឹងនិងបារី ដោយមិនបង់ពន្ធត្រឹមត្រូវដល់រដ្ឋាភិបាលអូស្ត្រាលី៕
Tag:
កុយ គួង
ក្រសួងការបរទេស
© រក្សាសិទ្ធិដោយ thmeythmey.com