ការប្រកួតកីឡាបាល់បោះក្របខណ្ឌអង្គរលីក ឆ្នាំ២០១៦ នឹងប្រព្រឹត្តទៅចាប់ពីថ្ងៃទី២៥ ខែមិថុនា រហូតដល់ថ្ងៃទី២៤ ខែកញ្ញា នៅវិមានពហុកីឡដ្ឋានជាតិអូឡាំពិក។ នាអំឡុងពេលនៃការប្រកួតដណ្តើមពានរង្វាន់ដែលមានទឹកប្រាក់៣ពាន់ដុល្លារអាមេរិកនេះ កម្ពុជាក៏ នឹងទទួលបានបទពិសោធន៍ពីកីឡាករល្បីៗមួយចំនួនលេងនៅក្របខណ្ឌ NBA របស់អាមេរិកផងដែរ។
នៅក្នុងសន្និសីទសារព័ត៌មានកាលពីព្រឹកថ្ងៃទី១២ ខែឧសភា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) ថ្នាក់ដឹកនាំ NOCC និងសហព័ន្ធកីឡាបាល់បោះកម្ពុជា បានអះអាងថា កីឡាករដែលលេងនៅក្របខណ្ឌ NBA របស់អាមេរិក នឹងមកចែករំលែកបទពិសោធន៍របស់ខ្លួននៅកម្ពុជា។
ដោយមិនបានបញ្ជាក់ពីឈ្មោះ និងក្រុមរបស់កីឡាករ លោក វ៉ាត់ ចំរើន អគ្គលេខាធិការ NOCC បានអះអាងថា ស្ថានទូតអាមេរិកប្រចាំប្រទេសកម្ពុជា បានជួយជ្រោមជ្រែងឲ្យមានការចូលរួមបង្ហាញសមត្ថភាពរបស់ក្រុមកីឡាករនៅក្នុងក្របខណ្ឌ NBA នៅកម្ពុជា ចន្លោះពីថ្ងៃទី១១ ដល់ថ្ងៃទី១៨ ខែកក្កដា។
ការមកកាន់កម្ពុជារបស់ក្រុម NBA របស់អាមេរិកនេះ ក្នុងគោលបំណងធំៗពីរគឺ ដើម្បីលើកទឹកចិត្ត ពង្រឹង និងជំរុញវិស័យកីឡាបាល់បោះកម្ពុជាឲ្យកាន់តែមានការរីកចម្រើន និងដើម្បីផ្តល់ជំនួយ ដូចជាបាល់ សំណាញ់ ជូនសិស្សតាមបណ្តាសាលានៅក្នុងរាជធានីភ្នំពេញ និងតាមខេត្តមួយចំនួន។ ហើយលោក វ៉ាត់ ចំរើន សង្ឃឹមយ៉ាងមុតមាំថា តាមរយៈការមកកាន់កម្ពុជា របស់ក្រុម NBA នេះ នឹងអាចជួយលើកទឹកចិត្ត និងពង្រឹងសមត្ថភាព ព្រមទាំងបច្ចេកទេសរបស់កីឡាករកម្ពុជាឲ្យកាន់តែមានភាពរីកចម្រើន សម្រាប់ត្រៀមប្រកួតស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ។
ការប្រកួតកីឡាបាល់បោះដណ្តើមជើងឯកពានរង្វាន់ក្របខណ្ឌអង្គរលីក ប្រចាំឆ្នាំ២០១៦ (Baseball Angkor League 2016) រដូវកាលទី៤ ប្រព្រឹត្តទៅនៅថ្ងៃទី២៥ ខែមិថុនា ដោយគ្រោងនឹងបញ្ចប់នៅថ្ងៃទី២៤ ខែកញ្ញា នៅវិមានពហុកីឡដ្ឋានជាតិ។ ក្រុមទាំង១០ ដែលចូលរូមប្រកួតនៅឆ្នាំនេះត្រូវធ្វើការប្រកួតវិលជុំ ដោយជុំទីមួយក្រុមនីមួយៗត្រូវជួបប្រកួតជាមួយគ្នាចំនួន៩ដង ពោលគឺមួយក្រុមត្រូវប្រកួតចំនួន៤៥ដង។ នេះបើយោងតាមលោក កៅ សាន់ណាលី អគ្គលេខាធិការសហព័ន្ធកីឡាបាល់បោះកម្ពុជា។
លោកបានបន្ថែមថា សម្រាប់ការប្រកួតជុំទី១ នេះក្នុងចំណោម១០ក្រុមចូលរួមត្រូវធ្វើការជម្រុះចំនួន២ក្រុម ដើម្បីយក៨ក្រុមដែលមានពិន្ទុខ្ពស់ឡើងទៅប្រកួតនៅវគ្គជម្រុះ១/៣ ដើម្បីចំរាញ់ជ្រើសរើសក្រុមដែលឈ្នះពីរប្រកួតក្នុងការប្រកួតបីលើកឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ ហើយនៅក្នុងវគ្គនេះគឺក្រុមនីមួយៗប្រកួតតែមួយប្រកួតនោះទេប្រសិនបើក្រុមណាឈ្នះក្រុមនោះនឹងឡើងទៅប្រកួតនៅវគ្គផ្តាច់ព្រ័ត្រតែម្តង។
សម្រាប់លក្ខខណ្ឌនៃការប្រកួត សម្រាប់ក្រុមបាល់បោះរស់កម្ពុជាអាចដាក់កីឡាករបរទេសបាន៣នាក់ ប៉ុន្តែសម្រាប់ក្រុមបាល់បោះបរទេសត្រូវដាក់កីឡាកម្ពុជាយ៉ាងតិច៣នាក់ ហើយរាល់ការប្រកួតនៅលើទីលានត្រូវមានកីឡាករកម្ពុជាម្នាក់ជានិច្ច។
គួរបញ្ជាក់ថា ការប្រកួតកីឡាបាល់បោះដណ្តើមជើងឯកពានរង្វាន់ក្របខណ្ឌអង្គរលីកឆ្នាំ២០១៦ ក្រុមម្ចាស់ជើងឯកទទួលបានប្រាក់រង្វាន់ ៣ពាន់ដុល្លារ លេខ២ទទួលបាន ២ពាន់ដុល្លារ និងលេខ៣ ទទួលបានប្រាក់រង្វាន់ ១ពាន់ដុល្លារ ៕