ជាតិ
សង្គមជាតិ
បាក់ដើមឈើច្រើនដើមក្នុងតំបន់អង្គរតែមិនប៉ះពាល់ដល់ប្រាសាទឡើយ
× សៀមរាប៖ ដើមឈើតូចធំប្រមាណ១០ដើម ខ្លះបាក់មែក ខ្លះដួលរលំ នៅក្នុងបរិវេណតំបន់អង្គរ។ ហេតុការណ៍នេះបានកើតឡើងនៅរសៀលថ្ងៃទី១៣ ឧសភានេះ គឺអំឡុងពេលមានភ្លៀងធ្លាក់ លាយឡំខ្យល់បក់។
យោងតាមរបាយការណ៍របស់អាជ្ញាធរជាតិអប្សរា ដែលទើបនឹងចេញផ្សាយប៉ុន្មាននាទីមុននេះ បានបញ្ជាក់ថា មានដើមឈើតូចធំច្រើនដើម ដែលអាជ្ញាធរអះអាងថា បានដួលរលំ និងខ្លះបានបាក់មែក ក្នុងតំបន់ប្រាសាទបុរាណ។ អាជ្ញាធរជាតិអប្សរាបញ្ជាក់ថា ភ្លៀងធ្លាក់ លាយឡំខ្យល់បោកខ្លាំងនៅបរិវេណក្រុងអង្គរធំ មកប្រាសាទអង្គរវត្ត នៅវេលាម៉ោង ៣និង៥នាទី បណ្តាលឲ្យបាក់មែកឈើ និងខ្លះទៀតដួលរលំមកលើផ្លូវ នៅទីតាំងតំបន់ប្រាសាទមួយចំនួន។
ចំណុចប្រាសាទចំនួនជាង១០កន្លែង ដែលអាជ្ញាធរជាតិអប្សរាធ្វើរបាយការណ៍ ថាមានដើមឈើបាក់មែក និងខ្លះបានដួលសង្កត់ផង។ ក្នុងនោះមាននៅបរិវេណប្រាសាទព្រះវិហារ៧ល្វែង នៅបរិវេណចំណតមុខភ្នំបាខែង បាក់មែកយាងធំៗចំនួន៤មែក តែពុំបង្កឲ្យមានខូចខាតអ្វីទេ។ ហេតុការណ៍ក៏បានកើតឡើងនៅលើភ្នំបាខែងជ្រុងខាងកើតឈាងខាងត្បូងប្រាសាទ ដែលបណ្តាលឲ្យដើមកន្ទ្រៀកមួយដើម ទំហំមុខកាត់ប្រហែល០.៦០ម៉ែត្រ បណ្ដោយជាង១០ម៉ែត្ររលំលើគំនរថ្ម ចុងមែកបោកប៉ះចំបណ្ណាល័យប្រាសាទខ្លះៗតែពុំបណ្ដាលឲ្យខូចខាតទេ។
តាមរបាយការណ៍របស់អាជ្ញាធរជាតិអប្សរាដដែល បង្ហាញថាភ្លៀងមួយមេនៅរសៀលនេះ ក៏បានធ្វើឲ្យដួលរលំតូបលក់ដូរនៅមុខផ្សារយាងធំផងដែរ ហើយនៅមុខកសិណខាងលិចឈាងខាងជើងប្រាសាទអង្គរនោះវិញ ក៏មានបាក់ដើមសង្កែមួយដើមដែរ។ ទីតាំងផ្សេងៗទៀត មាននៅ មាត់កសិណជ្រុងខាងលិចឈាងខាងជើងប្រាសាទអង្គរ ជ្រុងខាងត្បូងឈាងខាងលិចនៃខឿនប្រាសាទអង្គរវត្ត បាក់ដើមត្នោតមួយដើម កំពែងខាងកើតប្រាសាទអង្គរវត្ត រលំដើមក្រឡាញ់មួយដើម កំពែងខាងជើងប្រាសាទអង្គរវត្ត ដើមស្នួលមួយដើមទំហំមុខកាត់ប្រហែល ១ម៉ែត្រ និងបណ្ដោយប្រហែល២០ម៉ែត្រ។ល។ ហើយក្នុងនោះក៏មានការបាក់ផ្ទាំងបាណូមួយផងដែរ។
អាជ្ញាធរជាតិអប្សរាបញ្ជាក់ថា ហេតុការណ៍នេះពុំបណ្តាលឲ្យប៉ះពាល់ដល់ប្រាសាទបុរាណឡើយ៕
© រក្សាសិទ្ធិដោយ thmeythmey.com