ពីនេះ ពីនោះ
តៃកុងឡានម្នាក់បើករយៈពេលយូរគ្មានសម្រាកអាចនាំទៅរកគ្រោះថ្នាក់ចរាចរណ៍
× គ្រោះថ្នាក់ចរាចរណ៍បានក្លាយទៅជាសោកនាដកម្មដ៏មហាសាលនៅក្នុងសង្គមខ្មែរនាពេលបច្ចុប្បន្ននេះ។ កាលពីពេលមុន គេថា គ្រាប់មីន និងជំងឺអេដស៍ គឺជាឃាតករសម្លាប់មនុស្សច្រើនជាងគេនៅកម្ពុជា។
ប៉ុន្តែឥឡូវនេះ ឃាតករនៅលើដងផ្លូវសម្លាប់ជីវិតខ្មែរច្រើនណាស់។គ្រោះថ្នាក់ចរាចរណ៍សម្លាប់ជីវិតមនុស្សចំនួន៦នាក់ប្រចាំថ្ងៃជាមធ្យមនៅក្នុងប្រទេសកម្ពុជា និងធ្វើឲ្យប្រទេសក្រីក្រមួយនេះខាតបង់ផ្នែកសេដ្ឋកិច្ចជាង៣០០លានដុល្លារអាមេរិកក្នុងមួយឆ្នាំៗ។
កត្តាមនុស្សបានបង្កគ្រោះថ្នាក់ចរាចរណ៍ខ្លាំងជាងគេ បន្ទាប់មកកត្តាបច្ចេកទេស ឬកត្តាយានយន្តជាដើម។ ក្នុងចំណោមកត្តាមនុស្ស តៃកុងឡានធុនមធ្យម និងធំ គឺជាអ្នកបង្កគ្រោះថ្នាក់ចរាចរណ៍ទ្រង់ទ្រាយធំ។ មូលហេតុ គឺដោយសារ តៃកុងឡានធំៗបើកបរដោយធ្វេសប្រហែសច្រើន ឬម្យ៉ាងទៀត ពួកគេត្រូវបានក្រុមហ៊ុនបង្ខំឲ្យបើកបរគ្មានពេលសម្រាកឡើយ។ តៃកុងមួយចំនួនធំត្រូវបានគេបង្ខំឲ្យបើកបរពីភ្នំពេញទៅសៀមរាប ពីសៀមរាបមកភ្នំពេញវិញក្នុងថ្ងៃតែមួយ។ តើតៃកុងអាចទ្រាំទ្រកម្លាំងបានឬទេ? ឆ្លើយថាបាន។ តែលទ្ធភាពនៃការធ្វេសប្រហែសអាចកើតមានច្រើន ប្រសិនបើតៃកុងមានតែម្នាក់។
ការបើកបររថយន្តដឹកទំនិញក៏ដូចគ្នាដែរ។ តៃកុង ដោយសារថៅកែកេងលុយពេក ត្រូវបានគេបង្ខំឲ្យបើកបរក្នុងចម្ងាយឆ្ងាយដោយមិនសម្រាក ឬគ្មានតៃកុងជំនួស។ នៅក្នុងប្រទេសគោរពច្បាប់ តៃកុងឡាន ដែលបើកបរក្នុងចម្ងាយឆ្ងាយ ត្រូវមានអ្នកជំនួសគ្នាទៅវិញទៅមក។ នៅកម្ពុជា ថៅកែកេងប្រាក់ចំណេញខ្លាំងពេក គេប្រើប្រាស់តៃកុងតែមួយទេ។ នេះហើយ គឺជាកត្តាធំមួយដែលជំរុញឲ្យមានគ្រោះថ្នាក់ចរាចរណ៍។
ម្យ៉ាងទៀត តៃកុងបើកឡានខ្លះ ស្ថិតក្នុងវ័យក្មេងឈាមរាវ បើកបរមិនខ្លាច មិនចេះច្បាប់ចរាចរណ៍ឡើយ។ ពួកគេខ្លះ គ្មានបានរៀបរបៀបបើកបរទេ។ គ្រាន់តែចេះបើក ក៏ទិញបណ្ឌបើកបរតែម្តងទៅ។
ដើម្បីចង់កាត់បន្ថយគ្រោះថ្នាក់ចរាចរណ៍ទ្រង់ទ្រាយធំ ក្រសួងសាធារណៈការ និងដឹកជញ្ជូនគួរចាត់វិធានការណ៍ត្រួតពិនិត្យក្រុមហ៊ុនដឹកជញ្ជូនឡើងវិញទាំងអស់ ជាពិសេស ក្រុមហ៊ុនរថយន្តក្រុងពីភ្នំពេញទៅតាមបណ្តាខេត្តនានា៕
© រក្សាសិទ្ធិដោយ thmeythmey.com