អន្តរជាតិ
រដ្ឋការីប៊ីន« ហៃទី» នឹងក្លាយជាសមាជិកទី៥៥នៃសហភាពអាហ្វ្រិក
× នៅខែក្រោយនេះ ប្រទេសហៃទី ដែលជារដ្ឋនៅតំបន់ការីប៊ីននឹងក្លាយជាសមាជិកថ្មីរបស់សហភាពអអាហ្វ្រិកជាផ្លូវការនៅខែក្រោយក្នុងកិច្ចប្រជុំប្រទេសម៉ាឡាវី។ ហៃទីនឹងក្លាយជាប្រទេសសមាជិកទី ៥៥នៃសហភាពអាហ្វ្រិក ហើយជាប្រទេសដំបូងបំផុតនៅក្រៅទ្វីបអាហ្វ្រិកដែលក្លាយជាសមាជិកអង្គការតំបន់នេះ។
សូមស្ដាប់ព័ត៌មានលម្អិត៖
ចុងក្រោយ រដ្ឋការីប៊ីន ហៃទី នឹងក្លាយជាសមាជិកសហភាពអាហ្វ្រិកជាផ្លូវការនៅខែ មិថុនាខាងមុខ បន្ទាប់ពីស្នើសុំសមាជិកពេញសិទ្ធិកាលពីឆ្នាំ ២០១២កន្លងទៅ។ បច្ចុប្បន្ននេះសហភាពអាហ្វ្រិកមានសមាជិកសរុបចំនួន ៥៤ ដែលសមាជិកទាំងអស់សុទ្ធតែមានទីតាំងភូមិសាស្ត្រនៅក្នុងទ្វីបអាហ្វ្រិក។
ដូច្នេះ ហៃទី នេះនឹងក្លាយជាសមាជិកទី ៥៥ នៃសហភាពអាហ្វ្រិក ហើយវាក៏ក្លាយជាប្រទេសដំបូងបំផុតដែលមិនមានទីតាំងភូមសាស្ត្រនៅអាហ្វ្រិកតែក្លាយជាសមាជិកអង្គការនេះ។
ការសម្រេចផ្តល់សមាជិកភាពពេញលេញដល់ប្រទេសហៃទីនេះនឹងត្រូវធ្វើឡើងក្នុងកិច្ចប្រជុំកំពូលសហភាពអាហ្វ្រិកដែលនឹងត្រូវធ្វើឡើងនៅរដ្ឋធានី Lilongwe នៃប្រទេសម៉ាឡាវី។ ហើយវានឹងក្លាយជាព្រឹត្តិការណ៏ប្រវត្តិសាស្ត្រមួយសម្រាប់ប្រជាជនហៃទីនៅពេលដែលប្រទេសរបស់ពួកគេបានទទួលសិទ្ធិជាសមាជិកសហភាពអាហ្វ្រិក។
កន្លងមកហៃទីបានក្លាយជាប្រទេសអង្កេតការណ៍ ហើយក្នុងឆ្នាំ ២០១២ រដ្ឋាភិបាលប្រទេសនេះបានបង្ហាញគម្រោងសុំសមាជិកភាពពេញលេញតែម្តង។ នេះក៏ដោយសារតែហៃទី មើលឃើញថា ខ្លួនសក្តិសមជាផ្នែកមួយនៃទ្វីបអាហ្វ្រិក ថ្វីបើស្ថិតនៅក្នុងទីតាំងភូមិសាស្ត្រដាច់នៅឆ្ងាយពីអាហ្វ្រិកក្តី។
តាមពិតទៅមានបញ្ហាច្រើនដែលជំរុញឲ្យហៃទីចង់ក្លាយជាសមាជិកសហភាពអាហ្វ្រិកនេះ។ ប្រជាជនហៃទី យល់ថាខ្លួនជាផ្នែកមួយនៃទ្វីបអាហ្វ្រិក ព្រោះទាំងប្រជាជនមានស្បែកខ្មៅច្រើនដូចប្រជាជនអាហ្វ្រិក ហើយនាំគ្នាគោរពប្រតិបត្តិប្រពៃណី ទំនៀមទម្លាប់ សាសនា ប្រហាក់ប្រហែលគ្នាច្រើនទៀត។
ហើយហៃទីក៏សំឡឹងឃើញឱកាសល្អៗដែលខ្លួនទទួលបានពេលក្លាយជាសមាជិកសហភាពអាហ្វ្រិក ជាពិសេសមានចំណងសេដ្ឋកិច្ច ពាណិជ្ជកម្ម និងនយោបាយរឹងមាំ។ អាចថា ហៃទីរំពឹងក្លាយជាទីផ្សារមួយសម្រាប់ទ្វីបអាហ្វ្រិកព្រោះថា តំបន់អាហ្វ្រិកកំពុងតែអភិវឌ្ឍវិស័យឧស្សាហកម្មរបស់ខ្លួននាពេលបច្ចុប្បន្នផងនោះ។
សម្រាប់បណ្តាប្រទេសអាហ្វ្រិកឯណោះវិញ ហៃទី ស្ថិតក្នុងក្រុមគ្រួសារអាហ្វ្រិកតែមួយ គ្រាន់តែជាបងប្អូនដែលរស់នៅបរទេសប៉ុណ្ណោះហើយពួកគេមានប្រវត្តិសាស្ត្ររួមគ្នាច្រើន។ បណ្តាសមាជិកទាំងនោះស្វាគមន៍ការស្នើសុំចូលរួមសហភាពអាហ្វ្រិករបស់ហៃទីយ៉ាងកក់ក្តៅបំផុត។ បើយោងតាមប្រវត្តិសាស្ត្រ ហៃទី បានរួមចំណែកយ៉ាងសំខាន់ក្នុងការគាំទ្របណ្តារដ្ឋអាហ្វ្រិក ទាំងផ្នែកនយោបាយក្តី ការទូតក្តី ។ ឧទាហរណ៍ជាក់ស្តែង ហៃទី បានរិះគន់ការឈ្លានពានប្រទេសអេត្យូពីពីសំណាក់ទ័ពហ្វាស៊ីស អ៊ីតាលី , រក្សាជំហរយ៉ាងរឹងមាំប្រឆាំងសង្គ្រាមអង់ហ្កូឡា,ប្រកាសគាំទ្រការប្រកាសឯករាជ្យរបស់លីប៊ី និងជួយគាំទ្រដល់បណ្តាចលនាជួបជុំទាមទារប្រជាធិបតេយ្យនៅអាហ្វ្រិកកន្លងមក៕
© រក្សាសិទ្ធិដោយ thmeythmey.com