ជាតិ
អ្នកច្បាប់ថាតុលាការមិនអាចនាំខ្លួនឯកឧត្តម កឹម សុខា ទេ តែអ្នកវិភាគថាអាច
× ភ្នំពេញ៖ បើនិយាយតាមផ្លូវច្បាប់ តុលាការមិនអាចនាំខ្លួន ឯកឧត្តម កឹម សុខា បានឡើយ ព្រោះប្រធានស្តីទីគណបក្សសង្គ្រោះជាតិរូបនេះ ត្រូវបានការពារដោយអភ័យឯកសិទ្ធក្នុងនាមជាតំណាងរាស្ត្រ។ ប៉ុន្តែអ្នកវិភាគនយោបាយនិយាយថា អភ័យឯកសិទ្ធិមិនមានប្រសិទ្ធភាពសោះឡើយ ដើម្បីរារាំងចេតនារបស់តុលាការក្នុងការនាំខ្លួនឯកឧត្តម កឹម សុខានោះ។
លោក ជូង ជូងី មេធាវីនៃគណបក្សសង្គ្រោះជាតិ បានបកស្រាយថា ឯកឧត្តម កឹម សុខា មានអភ័យឯកសិទ្ធិ ដូច្នេះតុលាការមិនអាចនាំខ្លួនប្រធានស្តីទីគណបក្សប្រឆាំងរូបនេះ តាមចិត្តចង់នោះទេ។ លោកមេធាវីបន្តថា តុលាការអាចនាំខ្លួនឬឃាត់ខ្លួន ឯកឧត្តម កឹម សុខាបាន លុះត្រាតែរដ្ឋសភា សម្រេចដកអភ័យឯកសិទ្ធិជាមុនសិន ក្នុងករណីអនុប្រធានបក្សប្រឆាំងរូបនេះ ប្រព្រឹត្តបទល្មើសព្រហ្មទណ្ឌជាក់ស្តែង។
ថ្លែងប្រាប់សារព័ត៌មានថ្មីៗ អ្នកច្បាប់រូបនេះបន្តទៀតថា ប្រសិនបើតុលាការ នៅតែប្រើអំណាច ដើម្បីនាំខ្លួនឯកឧត្តម កឹម សុខាមែននោះ វាជាការរំលោភរដ្ឋធម្មនុញ្ញយ៉ាងធ្ងន់ធ្ងរ។ លោក ជូង ជូងីបានបញ្ជាក់ដូច្នេះថា៖ «ការចូលឬមិនចូល គឺជាសិទ្ធិរបស់គាត់ (ឯកឧត្តម កឹម សុខា)។ បើនាំខ្លួនគាត់មែន បានន័យថាតុលាការប្រើកម្លាំងរបស់ខ្លួន ដោយបំពានច្បាប់ហើយ»។
ប៉ុន្តែក្រុមអ្នកតាមដានស្ថានការណ៍នយោបាយយល់ឃើញខុសពីលោកមេធាវី។ អ្នកវិភាគទាំងនោះយល់ថា អភ័យឯកសិទ្ធិមិនអាចធ្វើជារនាំងការពារឯកឧត្តម កឹម សុខា បាននោះទេ ប្រសិនបើតុលាការមានចេតនាចង់នាំខ្លួនគាត់មែន។ ការអះអាងដូច្នេះ ដោយសារតែកន្លងមក ពួកគេសង្កេតឃើញថា តំណាងរាស្ត្របានទទួលរងការវាយដំយ៉ាងធ្ងន់ធ្ងរ ហើយតំណាងរាស្ត្រនិងសមាជិព្រឹទ្ធសភាខ្លះទៀត ត្រូវបានឃុំឃាំង ទាំងមានអភ័យឯកសិទ្ធិ។
លោក សូ ចន្ថា អ្នកវិភាគនយោបាយ បានលើកឡើងថា តាមការវិវត្តនយោបាយចុងក្រោយនេះ តុលាការបានចាត់ការករណីមួយចំនួនលើអ្នកតំណាងរាស្ត្រ ដោយមិនខ្វល់ខ្វាយពីអភ័យឯកសិទ្ធិនោះទេ។ លោករម្លឹកថា ជាក់ស្តែង អភ័យឯកសិទ្ធិ មិនអាចការពារលោក ហុង សុខហួ សមាជិកព្រឹទ្ធសភាបក្ស សម រង្ស៊ី និងលោក អ៊ុំ សំអាន សមាជិករដ្ឋសភាបក្សសង្គ្រោះជាតិ ពីការចាប់ខ្លួននោះទេ។ តាមការមើលឃើញបែបនេះ លោកសូ ចន្ថា ហ៊ានសន្និដ្ឋានថា ឯកឧត្តម កឹម សុខា អាចនឹងមានវាសនា ដូចលោក ហុង សុខហួ និងលោក អ៊ុំ សំអាន ដូច្នេះដែរ ប្រសិនបើតុលាការចង់ចាប់មែននោះ។
លោក សូ ចន្ថា ព្រួយបារម្ភពីការផ្ទុះអំពើហិង្សា និងការប្រទូសសរ៉ាយគ្នារវាងអាជ្ញាធរនិង អ្នកគាំទ្រគណបក្សសង្គ្រោះជាតិ ប្រសិនបើឯឧត្តម កឹម សុខា ត្រូវបាននាំខ្លួនមែននោះ។ លោកបញ្ជាក់បែបនេះថា៖«ខ្ញុំប្រមើលមើលទៅឃើញថា បើមានការចាប់ខ្លួនមែន ការតវ៉ាអាចកើតមានឡើង ហើយអាចនឹងមានជនបាតដៃទី៣ បង្កចលាចលថែមទៀត។ ពេលនោះ ស្ថានភាពនយោបាយ ប្រាកដជាក្តៅឡើងៗហើយ»។
លោក មាស នី អ្នកតាមដានស្ថានការណ៍នយោបាយមួយរូបទៀត មើលឃើញថា នាពេលបច្ចុប្បន្ននេះ អ្នកនយោបាយ គិតតែចង់ឈ្នះ ចង់ផ្ចាញ់ និងសងសឹកគ្នាទៅវិញទៅមក។ លោកថា ការកាត់ក្តីរបស់តុលាការ ក៏ជាការបំពេញចិត្តរបស់អ្នកនយោបាយ ដូច្នេះឯកឧត្តម កឹម សុខា អាចនឹងត្រូវនាំខ្លួន ដោយចៀសមិនផុត។
អ្នកវិភាគរូបនេះ អះអាងថា រឿងរ៉ាវរបស់ឯកឧត្តមកឹម សុខា មិនអាចរម្ងាប់ដោយតុលាការនោះទេ ប្រសិនបើអ្នកនយោបាយ មិនព្រមបញ្ឈប់។ លោកចាត់ទុកករណីរបស់ឯកឧត្តម កឹម សុខា ថាជាឧបសគ្គ ដែលគណបក្សសង្គ្រោះជាតិ ត្រូវតែជួបប្រទះ មុនពេលការបោះឆ្នោតឈានមកដល់។ «ខ្ញុំថា រឿងរបស់គាត់ (ឯកឧត្តម កឹម សុខា) តុលាការ មិនអាចបញ្ចប់ទេ បើអ្នកនយោយបានមិនចង់បញ្ចប់។ វាជាឧបសគ្គរបស់គណបក្សសង្គ្រោះជាតិ ដែលត្រូវឆ្លងកាត់ដោយមិនអាចគេចបាន។ [……] ហើយ មិនមែនតែប៉ុណ្ណឹងទេ បើតាមខ្ញុំយល់ អាចនៅមានព្យុះភ្លៀង២ឬ៣ដងទៀត ដែលបក្សសង្គ្រោះជាតិ ត្រូវជួប»។ នេះជាការបញ្ជាក់បន្ថែមរបស់លោក មាស នី ដោយមិនបានបង្ហាញច្បាស់ថា អ្វីទៅជាព្យុះភ្លៀងទាំងនោះ។
សូមបញ្ជាក់ថា ថ្មីៗនេះ តុលាការបានចេញដីកាចំនួនពីរ ដើម្បីកោះហៅឯកឧត្ត កឹម សុខា ឲ្យចូលខ្លួនបំភ្លឺ។ ដីកាទី១ បង្គាប់ឲ្យឯកឧត្តមកឹម សុខា ចូលបំភ្លឺនៅថ្ងៃទី១១ ខែឧសភា ទាក់ទងនឹងពាក្យបណ្តឹង «បរិហារកេរ្តិ៍» របស់កញ្ញា ធី សុវណ្ណថា។ ដីកាទី២ បានបង្គាប់ឲ្យឯកឧត្តម កឹម សុខា ចូលបកស្រាយនៅថ្ងៃទី១៧ ខែឧសភា ពាក់ព័ន្ធនឹងបទល្មើស «សញ្ចារកម្ម» ជុំវិញករណីរបស់កញ្ញា ខុម ចាន់តារ៉ាទី ហៅស្រីមុំ។ ដោយសំអាងលើអភ័យឯកសិទិ្ធរបស់ខ្លួនក្នុងនាមជាតំណាងរាស្ត្រ ឯកឧត្តម កឹម សុខា បានច្រានចោលដីកានោះ ដោយមិនព្រមបង្ហាញខ្លួននៅតុលាការឡើយ៕
Tag:
អ្នកវិភាគ
កឹម សុខា
តុលាការ
© រក្សាសិទ្ធិដោយ thmeythmey.com