Euro2016៖ ពូល A មាន អាល់បានី បារាំង រូម៉ានី និងស្វ៊ីស

កីឡាអន្តរជាតិ

អន្តរជាតិ

Euro2016៖ ពូល A មាន អាល់បានី បារាំង រូម៉ានី និងស្វ៊ីស

18, May 2016 , 11:59 am

រូបភាព

ដោយ: រួបរួម

ព្រឹត្តិការណ៍ប្រកួតកីឡាបាល់ទាត់ដណ្តើមពានរង្វាន់ទ្វីបអឺរ៉ុបឆ្នាំ២០១៦ (UEFA EURO 2016) នឹងដំណើរការចាប់ពីថ្ងៃទី១០ ខែមិថុនា ដោយមាន២៤ក្រុមចូលរួម។ ការប្រកួតនឹងប្រព្រឹត្តទៅនៅកីឡដ្ឋានចំនួន១០ក្នុងប្រទេសបារាំង។ ដោយមានការបែងចែកជា៦ពូល។

ថ្ងៃនេះ សារព័ត៌មានថ្មីៗ សូមផ្តល់ព័ត៌មានសង្ខេបទាក់ទងនឹងក្រុមជម្រើសជាតិដែលស្ថិតនៅក្នុងពូល A ដែលក្នុងនោះ មានតែម្ចាស់ផ្ទះបារាំងប៉ុណ្ណោះធ្លាប់ឈ្នះតំណែងជើងឯក រូម៉ានី និងស្វ៊ីស ធ្លាប់បង្ហាញខ្លួននៅវគ្គនេះ ខណៈអាល់បានី មានឈ្មោះចូលលេងជាលើកដំបូងបំផុត។

អាល់បានី ដឹកនាំដោយគ្រូបង្វឹកសញ្ជាតិអ៊ីតាលី លោក Gianni De Biasi ចាប់តាំងពីខែធ្នូ ឆ្នាំ២០១១ មក។ ក្រុមដែលមានរហស្សនាមថា «The Eagles» (ឥន្ទ្រី) មួយនេះ ទើបតែមានឱកាសបង្ហាញខ្លួនលើកទីមួយក្នុងព្រឹត្តិការណ៍ដណ្តើមពានប្រចាំទ្វីបអឺរ៉ុប បន្ទាប់ពីពួកគេ បានយកឈ្នះអាមេនី ៣-០ នៅវគ្គជម្រុះ។

ម្ចាស់ផ្ទះបារាំងដឹកនាំដោយគ្រូបង្វឹកសញ្ជាតិបារាំងផ្ទាល់ គឺលោក Didier Deschamps ចាប់តាំងពីខែកក្កដា ឆ្នាំ២០១២ មក។ ក្រុមពណ៌ខៀវ (Les Bleus) ឬ មាន់គក មួយនេះ ធ្លាប់ឈ្នះជើងឯក Euro ពីរលើក គឺនៅឆ្នាំ១៩៨៤ និងឆ្នាំ២០០០ ។ បន្ទាប់ពីអាល្លឺម៉ង់ និងអេស្ប៉ាញ បារាំងគឺជាក្រុមទីបី ដែលឈ្នះពានប្រចាំទ្វីបលើសពី១លើក។

រូម៉ានី ស្ថិតក្រោមការដឹកនាំរបស់លោក Anghel Iordanescu ចាប់តាំងពីខែតុលា ឆ្នាំ២០១៤ មក។ ក្រុមនេះមានរហស្សនាមថា Tricolorii (បីពណ៌)។ នេះជាលើកទី៤ហើយដែលរូម៉ានីបានឆ្លងផុតវគ្គជម្រុះ Euro ហើយកាលពីឆ្នាំ២០០០ ពួកគេបានឈានទៅដល់វគ្គ១/៤ផ្តាច់ព្រ័ត្រ។

ស្វ៊ីសមានលោក Vladimir Petkovic ជាគ្រូបង្វឹក ដោយលោកបានចាប់ផ្តើមការងារតាំងពីខែកក្កដា ឆ្នាំ២០១៤មក។ កំណត់ត្រាដ៏ល្អរបស់ស្វ៊ីស គឺការបង្ហាញវត្តមាននៅវគ្គចាប់ពូលបីលើកកន្លងមកហើយដោយចាប់ផ្តើមនៅឆ្នាំ១៩៩៦ ឆ្នាំ២០០៤ និងឆ្នាំ២០០៨ ៕