ពីនេះ ពីនោះ
មនុស្សនឹងអន់ជាងសត្វ នៅពេលមនុស្សប្រើប្រាស់បញ្ញាខ្លួនឯងខុស
× ភ្នំពេញ៖ នៅក្នុងពិភពចក្រវាឡនេះ គ្មានភាវៈណាមួយអាចមានបញ្ញាជាងមនុស្សឡើយ។ ដោយសារបញ្ញានេះ ធ្វើឱ្យមនុស្សក្លាយជាភាវៈឆ្លាតបំផុត ដោយគេអាចផលិតសម្ភារវិទ្យាសាស្ត្របច្ចេកទេសសព្វបែបយ៉ាង ដើម្បីការពារធាតុអាកាស មេរោគ គ្រោះធម្មជាតិ សត្វសាហាវនានា...។ល។
ស្រប់ពេលជាមួយភាពឆ្លាតវៃរបស់មនុស្ស មនុស្សបែរជាធ្វើរឿងមួយចំនួន ដែលអាចនិយាយបានថាថោកទាបជាងសត្វ ដែលគ្មានបញ្ញាទៅវិញ។ ព្រោះតែទង្វើថោកទាបបែបនេះហើយ ទើបគេក៏អាចចាត់ទុក មនុស្ស ជាសភាវៈល្ងង់បំផុតដែរ ព្រោះមនុស្សបានមើលងាយ បែងចែក កាប់សម្លាប់ ភូតភរកុហកបោកប្រាស់គ្នា។ល។ ដោយសារតែការជ្រើសរើសតម្លៃខុស អាត្មានិយម, ការដណ្តើមគ្នារស់, ការងប់ងុលនឹងសម្ភារនិយម, ការឈ្លក់វង្វេងនឹងមនោគមវិជ្ជានយោបាយណាមួយយ៉ាងងុបងុល, ជំនឿមួយចំនួនដែលមានលក្ខណៈអន់ថយ, ការមិនយល់ពីខ្លឹមសារអាថ៌កំបាំងនៃជីវិត។ល។ ដែលធ្វើឱ្យពិភពលោកប្រឈមមុខ នឹងបញ្ហាមិនចេះចប់។
ហេតុនេះហើយ ក្នុងនាមជាមនុស្ស គួរតែចេះរលឹកឡើងវិញដោយខ្លួនឯង ដោយមិនចាំបាច់មានអ្នកដទៃក្រើនរំលឹក អំពីទង្វើដែលស្មោកគ្រោករបស់ខ្លួន ក្នុងនាមជាភាវៈមានវិចារណញ្ញាណ។ ព្រោះថា ពិភពលោកនេះ មិនខ្វះទេរឿងដែលល្អៗ មានប្រយោជន៍ចំពោះខ្លួនឯង គ្រួសារ សង្គមជាតិ និងពិភពលោក ដែលយើងអាចធ្វើបាន ដោយមិនធ្វើឲ្យវិនាសដល់អ្វីដែលនៅជុំវិញខ្លួន។
ទស្សនវិទូ អ្នកប្រាជ្ញ បណ្ឌិត ជំនាន់ចាស់លោកបានចងក្រងទុកនូវទ្រឹស្ដីសុចរិត គុណធម៌ សីលធម៌ មាគ៌ាល្អ... ដើម្បីកសាងខ្លួនមកច្រើនណាស់ គួរនាំគ្នាសិក្សាស្វែងយល់ឲ្យចេះឲ្យចាំ ឲ្យយល់ ប្រសិនបើខ្លួនឯងមិនអាចបង្កើតថ្មីដោយខ្លួនឯង។ ទោះបីថាសម័យនេះគឺជាសម័យវិទ្យាសាស្ត្រ សម័យបច្ចេកវិទ្យា ក៏ប៉ុន្តែវាក៏មិនអាចមើលរំលងវិទ្យាសាស្ត្រធម្មជាតិដែរ។
បញ្ញាមនុស្សបានពង្រីកពិភពលោក តែក៏មិនអាចទៅឲ្យផុតពីដែននៃចក្រវាឡដែរ។ ហេតុនេះ ទោះបីមនុស្សប្រឹងបង្កើតយ៉ាងណា ក៏នៅតែមានដែនកំណត់ដដែល ទីបំផុតប្រសិនបើបង្កើតដោយប្រាស់ចាកពីសីលតម្លៃ គ្រប់យ៉ាងនឹងវិលមកអ្នកវិញដោយសេចក្ដីវិនាស។ ហេតុផលនេះហើយ ដែលគេអាចមើលឃើញថា មនុស្សនឹងអន់ជាងសត្វ ព្រោះសត្វវាមិនបានបង្កើតអ្វីមួយ ដើម្បីបំផ្លាញខ្លួនវា ដូចជាមនុស្សឡើយ។ វារស់នៅក្នុងសភាពធម្មជាតិ សប្បាយជាមួយសភាវគតិរបស់វា ប៉ុន្តែមនុស្សបង្កើតក៏បង្កើតថ្មី បញ្ញាក៏ប្រើ អ្វីក៏មាន តែបែរជាមិនអាចបំពេញតម្រូវការខ្លួនឯងបានទៅវិញ។ ឯណាសេចក្ដីសុខ?
© រក្សាសិទ្ធិដោយ thmeythmey.com