ជាតិ
ច្រត់ព្រះនង្គ័ល៖ អាជ្ញាធរខេត្តសៀមរាបត្រៀមកម្លាំងជាង១០០០នាក់
× សៀមរាប៖ ព្រះរាជពិធីច្រត់ព្រះនង្គ័លនាថ្ងៃទី២៤ ខែឧសភា ខាងមុខ នឹងរៀបចំឡើងនៅខេត្តសៀមរាប ក្រោមព្រះរាជាធិបតីភាព ព្រះមហាក្សត្រ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី។ សម្រាប់ព្រះរាជពិធីដ៏សំខាន់នេះ អាជ្ញាធរខេត្ត ត្រៀមកម្លាំងប្រមាណ១០០០នាក់ នៅទីតាំងសំខាន់ៗចំនួនបី។
លោក កាន់ សម្បត្តិ ស្នងការរងខេត្តសៀមរាប ទទួលបន្ទុកសេនាធិការ បានឲ្យសារព័ត៌មានថ្មីៗដឹងថា មានកម្លាំងចម្រុះជាងមួយពាន់នាក់ ដែលបានត្រៀមរៀបចំសុវត្ថិភាព សណ្តាប់ធ្នាប់នាអំឡុងនៃព្រះរាជពិធីច្រត់ព្រះនង្គ័ល ក្រោមព្រះរាជាធិបតីភាពរបស់ព្រះមហាក្សត្រ។ លោកបន្ថែមថា កម្លាំងចម្រុះទាំងនោះមានដូចជា ស្នងការនគរបាលខេត្ត កងរាជអាវុធហត្ថខេត្ត អង្គភាពការពារបេតិកភណ្ឌ នគរបាលទេសចរណ៍ និងនាយកដ្ឋានអង្គរក្សរបស់អគ្គស្នងការនគរបាលជាតិ។
តាមការបញ្ជាក់របស់លោក កាន់ សម្បត្តិ ទីតាំងបីសំខាន់ៗ ដែលគ្រោងនឹងប្រើប្រាស់កម្លាំងច្រើន ក្នុងនោះមានកំណាត់ផ្លូវពីព្រលានយន្តហោះ ព្រះរាជដំណាក់ និងទីតាំងប្រារព្ធពិធី។ តាមផែនការ កងកម្លាំងនឹងចាប់ផ្តើមចុះការពារនៅទីតាំងនោះ ចាប់ពីថ្ងៃទី២១ ឧសភាតទៅ។
លោក កាន់ សម្បត្តិ ពន្យល់បន្ថែមថា៖« ជាក់ស្តែងកងកម្លាំងយើង បានចុះការពារកន្លែងប្រារព្ធពិធី ក្រោយថ្ងៃអង្គរសង្ក្រាន្តមកម្លេះ គឺតាំងពីការដឹករោងទៅ។ យើងការពារ ក្រែងលោកភ្លើងឆេះ ព្រោះសុទ្ធតែស្បូវ ណាមួយក្រែងមានជនខិលខូច វាយកស្អីទៅដាក់...»៕
Tag:
ច្រត់ព្រះនង្គ័ល
ព្រះមហាក្សត្រ
© រក្សាសិទ្ធិដោយ thmeythmey.com