Euro2016៖ ពូល E មាន បែលហ្ស៊ិក អ៊ីតាលី សាធារណរដ្ឋអៀរឡង់ និងស៊ុយអែត

កីឡាអន្តរជាតិ

Euro2016៖ ពូល E មាន បែលហ្ស៊ិក អ៊ីតាលី សាធារណរដ្ឋអៀរឡង់ និងស៊ុយអែត

22, May 2016 , 2:20 pm

រូបភាព

ដោយ: រួបរួម

ព្រឹត្តិការណ៍ប្រកួតកីឡាបាល់ទាត់ដណ្តើមពានរង្វាន់ទ្វីបអឺរ៉ុបឆ្នាំ២០១៦ (UEFA EURO 2016) នឹងដំណើរការចាប់ពីថ្ងៃទី១០ ខែមិថុនា ដោយមាន២៤ក្រុមចូលរួម។ ការប្រកួតនឹងប្រព្រឹត្តទៅនៅកីឡដ្ឋានចំនួន១០ក្នុងប្រទេសបារាំង ដោយមានការបែងចែកជា៦ពូល។

បន្ទាប់ពីពូល A ពូល B ពូល C និងពូល D ថ្ងៃនេះ សារព័ត៌មានថ្មីៗ សូមផ្តល់ព័ត៌មានសង្ខេបទាក់ទងនឹងក្រុមជម្រើសជាតិដែលស្ថិតនៅក្នុងពូល E។ អ៊ីតាលី គឺជាក្រុមតែមួយគត់នៅក្នុងពូលដែលធ្លាប់មានប្រវត្តិលើកពាន កាលពីឆ្នាំ១៩៦៨ បែលហ្ស៊ិក និងស៊ុយអែត ធ្លាប់បានលេខ២ រីឯសាធារណរដ្ឋអៀរឡង់ ធ្លាប់ឈានចូលវគ្គចាប់ពូលនេះ ពីរលើក។

ក្រោមការដឹកនាំរបស់លោក Marc Wilmots ចាប់តាំងពីខែឧសភា ឆ្នាំ២០១២មក ក្រុមជម្រើសជាតិបែលហ្ស៊ិកមានការរីកចម្រើនជាបន្តបន្ទាប់ រហូតដល់ធ្លាប់ឡើងទៅឈរលេខមួយក្នុង FIFA Ranking ថែមទៀតផង។ បែលហ្ស៊ិក ដែលមានរហស្សនាមថា Red Devils (បិសាចក្រហម) បានទទួលចំណាត់ថ្នាក់លេខ២កាលពីឆ្នាំ១៩៨០ ។

អ៊ីតាលី មានលោក Antonio Conte ជាគ្រូបង្វឹកចាប់ពីខែសីហា ឆ្នាំ២០១៤ មក។ អ៊ីតាលី ដែលគេនិយមហៅថា Azzurri (ពណ៌ខៀវ) ជាក្រុមដ៏ជោគជ័យបំផុតនៅក្នុង World Cup ដោយឈ្នះជើងឯករហូតដល់ទៅ៤លើក។ សម្រាប់ក្របខណ្ឌអ៊ឺរ៉ុប ពួកគេបានលើកពានកាលពីឆ្នាំ១៩៦៨នៅលើទឹកដីខ្លួនឯង។

លោក Martin O’Neill បានក្លាយជាគ្រូបង្វឹករបស់សាធារណរដ្ឋអៀរឡង់ចាប់ពីខែវិច្ឆិកា ឆ្នាំ២០១៣មក។ នេះជាការបង្ហាញខ្លួនលើកទី៣របស់ក្រុមដែលមានរហស្សនាមថា «Boys in Green» ដោយវត្តមានកាលពីឆ្នាំ១៩៨៨ និងឆ្នាំ២០១២ ពួកគេសុទ្ធបរាជ័យក្នុងការឈានទៅកាន់វគ្គ១៦ក្រុមចុងក្រោយ។

ស៊ុយអែត ស្ថិតក្រោមការដឹកនាំរបស់លោក Erik Hamren ចាប់តាំងពីឆ្នាំ២០០៩ មកម្ល៉េះ។ ពួកគេមានរហស្សនាមថា Blagult (ខៀវ និងលឿង)។ នាការបង្ហាញវត្តមានលើកដំបូងនៅឆ្នាំ១៩៩២ ស៊ុយអែតបានឈានទៅដល់វគ្គពាក់កណ្តាលផ្តាច់ព្រ័ត្រ ហើយបានចាញ់អាល្លឺម៉ង់ ៣-២ ៕