ជាតិ
នយោបាយជាតិ
ឯកឧត្តម សម រង្ស៊ី ថា ការកំណត់ថ្ងៃបោះឆ្នោត ជាល្បិចបង្វែរស្ថានការណ៍
×
ឯកឧត្តម សម រង្ស៊ី បានចាត់ទុកការកំណត់កាលបរិច្ឆេទ ការបោះឆ្នោតឃុំ-សង្កាត់ និងការបោះឆ្នោតជ្រើសរើសតំណាងរាស្ត្រ គឺការបំភាន់ភ្នែក និងល្បិចកលរបស់រដ្ឋាភិបាល ដើម្បីយកឈ្នះការបោះឆ្នោតប៉ុណ្ណោះ។ ប្រធានគណបក្សសង្គ្រោះជាតិបានអត្ថាធិប្បាយយ៉ាងនេះភ្លាមៗ បន្ទាប់ពីរដ្ឋាភិបាលប្រកាសកំណត់ថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤ និងថ្ងៃបោះឆ្នោតថ្នាក់ជាតិអាណត្តិទី៦ ។
ការកំណត់កាលបរិច្ឆេទ ការបោះឆ្នោតឃុំ-សង្កាត់ និងការបោះឆ្នោតជ្រើសរើសតំណាងរាស្ត្រ ដែលគ្រោងរៀបចំនៅឆ្នាំ២០១៧ និង២០១៨ខាងមុខ មិនទាន់គ្រប់គ្រាន់ទេ ដើម្បីធានាការបោះឆ្នោត។ នេះជាការបញ្ជាក់របស់ ឯក ឧត្តម សម រង្ស៊ី។ តាមរយៈសំណេរនៅលើទំព័រហ្វេសប៊ុករបស់ខ្លួន ប្រធានគណបក្សសង្គ្រោះជាតិរូបនេះ ចាត់ទុកថា ការប្រកាសកាលបរិច្ឆេទបោះឆ្នោតរបស់រដ្ឋាភិបាលនេះ គ្រាន់តែជាការបំភាន់ភ្នែក ដែលផ្ទុយអំពីបំណងពិតប្រាកដរបស់រដ្ឋាភិបាល ដែលកំពុងតែត្រៀមល្បិចកល ដើម្បីដណ្តើមយកជ័យជម្នះក្នុងការបោះឆ្នោតខាងមុខប៉ុណ្ណោះ។
ប្រធានគណបក្សប្រឆាំងរូបនេះ បានសរសេរលើហ្វេសប៊ុកថា៖«ធ្ងន់ធ្ងរជាងនេះទៅទៀត ក្នុងកាលៈទេសៈដែលមានការកៀបសង្កត់ផ្នែកនយោបាយដូចសព្វថ្ងៃ ការប្រកាសពីកាលបរិច្ឆេទបែបនេះ អាចធ្វើឲ្យមានការភាន់ច្រឡំ ពីបំណងពិតប្រាកដរបស់រដ្ឋាភិបាល ពីព្រោះវាអាចបង្វែរអារម្មណ៍ពីទង្វើជាក់ស្តែងរបស់រដ្ឋាភិបាល ដែលកំពុងតែត្រៀមល្បិចកលដើម្បីដណ្តើមយកជ័យជម្នះក្នុងការបោះឆ្នោតខាងមុខ ទោះជាប្រជាប្រិយភាពរបស់ខ្លួនបានធ្លាក់ចុះយ៉ាងណាក៏ដោយ»។
សំណេរដដែលបន្តថា៖«មុននឹងរដ្ឋាភិបាលអាចលើកឡើងពីការបោះឆ្នោតណាមួយដោយសេរី និងយុត្តិធម៌ ត្រូវតែរដ្ឋាភិបាលបញ្ចប់ការកៀបសង្កត់ផ្នែកនយោបាយ ព្រមទាំងបំបាត់បរិយាកាសគំរាមកំហែង និងបំភិតបំភ័យជាមុនសិន»។
ប្រមុខបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស បានបន្តរិះគន់ទៀតថា រដ្ឋាភិបាលបានយកតុលាការដែលខ្លួនគ្រប់គ្រង និងបញ្ជាតាមចិត្ត ធ្វើជាឧបករណ៍នយោបាយ ក្នុងការបង្ក្រាបអ្នកដែលហ៊ានប្រឆាំង និងហ៊ានទិតៀនខ្លួន ក្នុងនោះមានទាំងថ្នាក់ដឹកនាំ និងសមាជិកសង្គមស៊ីវិលផងដែរ ដែលត្រូវបានគេចាប់ខ្លួននិងឃុំខ្លួន តាមការចោទប្រកាន់ដែលគ្មានមូលដ្ឋានត្រឹមត្រូវទាល់តែសោះ។
លោក សម រង្ស៊ី បានអធិប្បាយរិះគន់គណបក្សប្រជាជនកម្ពុជាទៀតថា គណបក្សកាន់អំណាចនេះបានបំបាត់សិទ្ធិសេរីភាពសម្តែងមតិរបស់រាស្ត្រខ្មែរ និងបំផ្លាញតុល្យភាពនយោបាយ ក្នុងសមាសភាពគណៈកម្មាធិការជាតិរៀបចំការបោះឆ្នោត (គ.ជ.ប.)ទៀត តាមរយៈការឃុំខ្លួនលោក នី ចរិយា និងការរំឮកពីបទចោទកន្លងមកទៅកាន់លោក រ៉ុង ឈុន ពីសំណាក់តុលាការ។
មុននឹងបញ្ចប់សំណេររបស់ខ្លួន ប្រធានគណបក្សប្រឆាំង បានបញ្ជាក់ប្រាប់ រដ្ឋាភិបាល និងគណបក្សកាន់អំណាចថា ការបោះឆ្នោតនឹងគ្មានន័យ គ្មានតម្លៃបើគ្មានការចូលរួមពីប្រធានគណបក្សប្រឆាំង។
គេនៅមិនទាន់ឮការឆ្លើយតបយ៉ាងណាពីគណបក្សប្រជាជនកម្ពុជាទៅលើការអត្ថាធិប្បាយរបស់លោក សម រង្ស៊ី នេះនៅឡើយទេ៕
© រក្សាសិទ្ធិដោយ thmeythmey.com