ពីនេះ ពីនោះ
តើអ្នកណា ជាអ្នកបង្កើតទ្រឹស្ដីអាតូមដំបូងគេ?
× ភ្នំពេញ៖ អំឡុងឆ្នាំ៥០០ មុនគ.ស គឺជាឆ្នាំកំណើតរបស់ទស្សនវិទូជនជាតិក្រិក លោក ឡឺស៊ីប ដែលជាទស្សនវិទូមួយរូបបាន ផ្ដើមបង្កើតទ្រឹស្ដីអាតូមដំបូង។ ការបង្កើតទ្រឹស្ដី ស្ដីពីអាតូមរបស់លោកគឺផ្អែកលើមូលដ្ឋាន២យ៉ាងដូចខាងក្រោម៖
ទីមួយ ទ្រឹស្ដីអត្ថិភាព ឬទ្រឹស្ដីភាវៈរបស់ទស្សនវិទូប៉ារមេនីត និង សេណូហ្វាន តែលោកឥតបដិសេធអភាវៈដូចទស្សនវិទូទាំងពីររូបនេះទេ។
ទីពីរ ទ្រឹស្ដីពហុកត្តារូបធាតុរបស់ទស្សនវិទូ អំពេដូក ដែលលោកបដិសេធទស្សនៈដែលថា កត្ដារូបធាតុទាំងបួន ទឹក ដី ភ្លើង ខ្យល់ ជាល្អងសម្រាប់បង្កើតវត្ថុផ្សេងៗ។ តែលោកយល់ថា កត្តារូបធាតុសម្រាប់បង្កើតវត្ថុផ្សេងៗគឺអាតូម ដ៏ច្រើនអនេក។
លោកបានបញ្ជាក់ថា អាតូមជាល្អរូបធាតុតូចបំផុត គេមិនអាចបែងចែកបានឲ្យតូចទៅទៀតបានឡើយ។ វាឥតព្រំដែនខាងបរិមាណ និងឥតព្រំដែនខាងទម្ងន់។ វាគ្មានគុណភាពទេ វាគ្រាន់តែជារូបរាងខុសគ្នាប៉ុណ្ណោះ។ លោកយល់ថា អភាវៈ ជាសុញ្ញាកាស ជាទីកន្លែងទទេ។ ដោយសារតែមានសុញ្ញាកាសនេះហើយបានជាអង្គធាតុទាំងឡាយអាចផ្ដាច់ចេញពីគ្នា និងអាចស្ថិតនៅក្បែរៗគ្នាបាន។
ទ្រឹស្ដីអាតូមរបស់ទស្សនវិទូរូបនេះ ថ្វីដ្បិតថា នៅមិនទាន់គ្រប់គ្រាន់ ដូចការអះអាងរបស់អ្នកវិទ្យាសាស្ត្រក្នុងពេលបច្ចុប្បន្ន ប៉ុន្តែលោកគឺជាអ្នកផ្ដើមគំនិតបែបវិទ្យាសាស្ត្រមួយរូបសម្រាប់ឲ្យអ្នកវិទ្យាសាស្ត្រជំនាន់ក្រោយស្វែងរកបន្ថែមអំពីការកើតនៃរូបធាតុ ចក្រវាឡ នានា៕
ដកស្រង់៖ ប្រវត្តិទស្សនវិជ្ជាបុរាណសម័យក្រិក, រៀបរៀងដោយលោក ឆយ យីហ៊ាង
© រក្សាសិទ្ធិដោយ thmeythmey.com