ពីនេះ ពីនោះ
តើ«យុត្តិធម៌» និង«គុណប្រយោជន៍» មួយណាជាជម្រើសទីមួយសម្រាប់បណ្ឌិត?
× ភ្នំពេញ៖ ខុងជឺ ជាទស្សនវិទូជនជាតិចិន សម័យបុរាណ បានលើកឡើងថា មនុស្សទាំងឡាយនៅក្នុងសង្គម តែងតែស្វែងរករបស់ពីយ៉ាងប្លែកគ្នាគឺយី « យុត្តិធម៌ » និងលី «គុណប្រយោជន៍» បណ្ឌិតចេះលះបង់គុណប្រយោជន៍ ហើយស្វែងរកយុត្តិធម៌ ដើម្បីបណ្ដុះកិត្តិសព្ទរបស់ខ្លួន ឯចំណែកមនុស្សសាមញ្ញសុខចិត្តលះបង់យុត្តិធម៌ដើម្បីស្វែងរកគុណប្រយោជន៍។
បុគ្គលដែលមានឧត្ដមគតិ និងស្មារតីជាបណ្ឌិត គឺហ៊ានលះបង់អ្វីគ្រប់យ៉ាងដែលមិនមែនជាប្រយោជន៍សម្រាប់មនុស្សទូទៅ និងសង្គមជាតិទាំងមូល ហើយប្រកាន់ខ្ជាប់គោលការណ៍តម្លៃនៃយុត្តិធម៌ សច្ចភាព ។ បណ្ឌិត មិនព្រមលះបង់មាគ៌ាត្រឹមត្រូវព្រោះតែប្រយោជន៍ផ្ទាល់ខ្លួនឡើយ គេសុខចិត្តធ្វើអ្វីទៅតាមសមត្ថភាព និងលទ្ធភាពរបស់ខ្លួនដែលអាចធ្វើបាន។ ផ្ទុយទៅវិញជនសាមញ្ញ មើលឃើញតែអ្វីដែលជាប្រយោជន៍ចំពោះមុខ បើទោះបីជាទង្វើរបស់ខ្លួនត្រូវបង្ករសេចក្ដីវិនាសទៅលើអ្នកដទៃក៏ដោយ សំខាន់អ្វីដែលខ្លួនធ្វើគឺបានផ្ដល់ប្រយោជន៍ដល់ខ្លួន។
ការពិតទៅទស្សនៈរបស់ទស្សនវិទូរូបនេះ បានលើកឡើងនេះមិនមែនមានន័យដាច់ខាតថាបណ្ឌិតចាំបាច់ត្រូវតែលះបង់គុណប្រយោជន៍ទាំងស្រុងនោះទេ។ ប៉ុន្តែ គឺចង់សំដៅដល់គោលការណ៍របស់បណ្ឌិត គឺយកវិថី យុត្តិធម៌ ជាមូលដ្ឋានដើម្បីឆ្ពោះទៅរកគុណប្រយោជន៍និងកិត្តិសព្ទល្អសម្រាប់ជីវិត៕
© រក្សាសិទ្ធិដោយ thmeythmey.com