FFC ទាមទារឲ្យមានការគោរពកម្មសិទ្ធិបញ្ញាលើឯកសណ្ឋានក្រុមជម្រើសជាតិ

កីឡាជាតិ

ជាតិ

FFC ទាមទារឲ្យមានការគោរពកម្មសិទ្ធិបញ្ញាលើឯកសណ្ឋានក្រុមជម្រើសជាតិ

06, Jun 2016 , 9:58 am

រូបភាព

ដោយ:

ដោយសារតែមានព្រួយបារម្ភសម្រាប់ការយកស្លាកសញ្ញាទៅប្រើប្រាស់ដើម្បីទាញយកផលប្រយោជន៍ ដែលអាចធ្វើឲ្យមានការប៉ះពាល់ដល់កិត្តិយសរបស់សហព័ន្ធ កាលពីថ្ងៃទី២ ខែមិថុនា ឆ្នាំ២០១៦ សហព័ន្ធកីឡាបាល់ទាត់កម្ពុជាបានសរសេរសារនៅលើទំព័រហ្វេសប៊ុកផ្លូវការរបស់ខ្លូន ហាមយកស្លាកសញ្ញារបស់សហព័ន្ធ ដោយគ្មានការអនុញ្ញាត ដើម្បីធ្វើអាជីវកម្មផ្សេងៗដូចជាការផលិតឯកសណ្ឋាន និងសម្ភារៈរបស់ក្រុមជម្រើសជាតិជាដើម ប៉ុន្តែសហព័ន្ធអនុញ្ញាតឲ្យប្រើប្រាស់ដែលបំពេញឲ្យតម្រូវការផ្ទាល់ខ្លួន។

ដើម្បីរក្សាកម្មសិទ្ធបញ្ញាសហព័ន្ធកីឡាបាល់ទាត់កម្ពុជាបានចេញសេចក្តីហាមហាត់ចំពោះក្រុមហ៊ុនឧស្សាហកម្មគ្រប់ធនដែលយកស្លាកសញ្ញារបស់សហព័ន្ធដោយគ្មានការអនុញ្ញាត ដើម្បីបំពេញតម្រូវការផលិតឯកសណ្ឋាន និងសម្ភារៈកីឡាផ្សេងៗ ក្នុងការប្រកបអាជីវកម្មផ្សេងៗឲ្យបញ្ឈប់ការផលិត ព្រោះបច្ចុប្បន្នគេឃើញឯកសណ្ឋាន និងសម្ភារៈកីឡាដែលប្រើស្លាកសញ្ញារបស់សហព័ន្ធជាច្រើនកំពុងដំណើរការនៅលើទីផ្សារ។ ប៉ុន្តែប្រសិនបើក្រុមហ៊ុនអាជីវកម្មគ្រប់ធនចង់បន្តការផលិតត្រូវមកសុំការអនុញ្ញាតពីសហព័ន្ធជាមុនសិន បើពុំដូចនោះទេសហព័ន្ធនឹងចាត់វិធានការតាមផ្លូវច្បាប់។

សហព័ន្ធកីឡាបាល់ទាត់កម្ពុជាបានសរសេរនៅលើទំព័រហ្វេសប៊ុករបស់ខ្លួនដូច្នេះថា៖«រាល់ការផលិតឯកសណ្ឋានក្រុមជម្រើសជាតិកម្ពុជាឬសម្ភារៈផ្សេងៗដែលប្រើប្រាស់ស្លាកសញ្ញា ឬកម្មសិទ្ធិបញ្ញាផ្សេងៗរបស់សហព័ន្ធកីឡាបាល់ទាត់កម្ពុជាដើម្បីធ្វើសកម្មភាពអាជីវកម្មនឹងមិនត្រូវបានអនុញ្ញាតប្រសិនបើមិនមានការអនុម័តពីសហព័ន្ធកីឡាបាល់ទាត់កម្ពុជា។ ក្នុងករណីមានការរំលោភបំពាន សហព័ន្ធកីឡាបាល់ទាត់កម្ពុជានឹងចាត់វិធានការតាមផ្លូវច្បាប់»។

ពាក់ព័ន្ធទៅនឹងបញ្ហាចេញសារនេះដែរ លោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជាបានពន្យល់ថា ដោយសារសហព័ន្ធមានការព្រួយបារម្ភចំពោះការប្រើប្រាស់ស្លាកសញ្ញារបស់សហព័ន្ធដោយគ្មានការអនុញ្ញាតពីសហព័ន្ធ ហើយវាជាសារមួយដើម្បីដាស់តឿនឲ្យអ្នកដែលពាក់ព័ន្ធទាំងអស់មុននឹងប្រើប្រាស់ស្លាកសញ្ញាត្រូវមកសុំការអនុញ្ញាតពីសហព័ន្ធដោយផ្ទាល់ជាមុនសិន។

សហព័ន្ធកីឡាបាល់ទាត់កម្ពុជាក៏បានស្នើសុំចំពោះក្រុមហ៊ុនណាដែលបានផលិតឯកសណ្ឋាន ឬសម្ភារៈកីឡាដែលយកស្លាកសញ្ញាដោយគ្មានការអនុញ្ញាតមេត្តាបញ្ឈប់ការផលិត ឬមកសុំការអនុញ្ញាតពីសហព័ន្ធ ដើម្បីទទួលបានសិទ្ធក្នុងការបន្តអាជីវកម្មនៃការផលិតនេះ បើពុំដូច្នេះទេសហព័ន្ធចាត់វិធានការតាមផ្លូវច្បាប់ពាក់ព័ន្ធទៅនឹងការចម្លងកម្មសិទ្ធបញ្ញា។ លោកអត្ថាធិប្បាយដូច្នេះថា៖«ប្រសិនបើអ្នកដែលបានបោះហើយគួរតែបញ្ឈប់រឿងនឹង ហើយពេលដែលគាត់ទទួលព័ត៌មាននេះហើយ គួរតែមកទំនាក់ទំនងជាមួយសហព័ន្ធ ព្រោះសហព័ន្ធមិនបិទសិទ្ធថាមិនអាចបន្តបាននោះទេឬមួយយ៉ាងណានោះទេ វាអាស្រ័យទៅលើហេតុផលនៃការចរចាគ្នា»។

ពាក់ព័ន្ធទៅនឹងការចេញសានេះដែរក៏មានមតិមួយចំនួនជាពិសេសអ្នកដែលគាំទ្រវិស័យកីឡាបាល់ទាត់បានលើកឡើងថា តើការយកស្លាកសញ្ញាទៅបិទនៅលើឧបករណ៍ដូចជាទូរស័ព្ទដៃ កុំព្យូទ័រ ឬការព្រីនយកទៅបិទនៅតាមបន្ទប់ដើម្បីលម្អរតើត្រូវមកសុំការអនុញ្ញាតពីសហព័ន្ធដេរឬទេ? ពាក់ព័ន្ធទៅនឹងបញ្ហានេះ លោក គល់ សុផាណា បានបកស្រាយថា សម្រាប់ការប្រើប្រាស់ស្លាកសញ្ញានេះសហព័ន្ធអនុញ្ញាតឲ្យប្រើប្រាស់ជាលក្ខណៈឯកជនដែលមិនពាក់ព័ន្ធនៅការធ្វើអាជីវកម្ម៕