ត្រីដៀប និងត្រីឆ្ដោ គឺប្រភេទតែមួយ

ពីនេះ ពីនោះ

ត្រីដៀប និងត្រីឆ្ដោ គឺប្រភេទតែមួយ

07, Jun 2016 , 7:39 am

រូបភាព

ដោយ: ថ្មីៗ

ត្រីដៀប និងត្រីឆ្ដោ ជាទូទៅគេតែងគិតថាវាគឺជាត្រីពីរប្រភេទផ្សេងគ្នា ប៉ុន្តែតាមពិតត្រីទាំងពីរនេះគឺតែមួយ។ ត្រីប្រភេទនេះ ពេលមិនទាន់ពេញវ័យ គេហៅថាត្រីដៀប ចំណែកពេលពេញវ័យគេហៅថាត្រីឆ្តោ។ វាជាមច្ឆាទឹកសាប តែក៏មានរស់នៅក្នុងតំបន់ទឹកភ្លាវផងដែរ ដែលជាប្រភេទ មំសាសីសត្វ មានប្រវែងមធ្យម ១៣០ ស.ម ប្រវែងធម្មតា ៥០ ស.ម និង អាចមានទម្ងន់រហូតដល់ទៅ២០គីឡូក្រាម។

មច្ឆាប្រភេទនេះ អាចរស់នៅគ្រប់ស្ថានភាពទឹក និងអាចរស់នៅក្នុងទឹកដែលខ្វះអុកស៊ីហ្សែនផងដែរ។ វាត្រូវបានគេឃើញមានរស់នៅស្ទើរគ្រប់ទីកន្លែង ទាំងក្នុងទន្លេ ស្ទឹង បឹងបួរ ថ្លុក ត្រពាំង ស្រះ ព្រមទាំងតំបន់ទឹកភ្លាវ (ទឹកសាបលាយទឹកប្រៃពីសមុទ្រ) ផងដែរ។ មិនតែប៉ុណ្ណោះ មច្ឆានេះ វាអាចស៊ូទ្រាំរស់នៅក្នុងស្ថានភាពខ្វះអុកស៊ីសែន ទឹកភក់ និងល្អក់ខ្លាំង ក្នុងស៊ីតុណ្ហភាពទឹក ៣៦.៥ អង្សាសេផងដែរ។

ត្រីប្រភេទនេះ ភាគច្រើនស៊ីពពួកខ្យង ខ្ចៅ ក្តាម បង្កង កំពឹស សត្វល្អិត និងត្រីផ្សេងៗជាចំណី ហើយមាន ពង-កូននៅតាមដងស្ទឹង ឬអូរតូចៗ ដែលមានរុក្ខជាតិក្រាស់ (ព្រៃលិចទឹក)៕

ប្រភព៖ សារព័ត៌មានថ្មីៗ(ThmeyThmey) សហការជាមួយ page អ្នកនេសាទ Fisherman