ពីនេះ ពីនោះ
សន្យាតែមិនធ្វើ បង្ហាញពីភាពខ្វះតម្លៃរបស់បុគ្គល
× ភ្នំពេញ៖ ចាស់បុរាណបានពោលជាសុភាសិតថា«មនុស្សគេយកសម្ដី ដំរីគេយកភ្លុក» នេះ គឺជាឃ្លាដ៏មានតម្លៃបំផុតដើម្បីឲ្យមនុស្សចេះទទួលខុសត្រូវចំពោះពាក្យសម្ដីរបស់ខ្លួនដែលនិយាយចេញមក ឬការសន្យាអ្វីមួយ។ ផ្ទុយមកវិញ វានឹងបង្ហាញពីមនុស្សខ្វះខាតតម្លៃផ្ទាល់ខ្លួន បើគ្រាន់តែសម្ដីខ្លួនមិនអាចទទួលខុសត្រូវបាន។
ពាក្យសន្យា គឺជាភាសាមួយដែលអ្នកណា ក៏ធ្លាប់បាននិយាយទៅកាន់ដៃគូរបស់ខ្លួន ក្រុមរបស់ខ្លួន កន្លែងការងារ កិច្ចសន្យា ពាណិជ្ជកម្ម ឬក្នុងរូបភាពគ្រប់បែបយ៉ាង។ រឿងដែលផ្ដល់«ការសន្យា» វាមិនមែនជាកំហុស។ ប៉ុន្តែវានឹងខុសនៅពេលដែលបុគ្គលដែលបានសន្យាហើយមិនព្រមធ្វើ មិនបានអនុវត្តតាមអ្វីដែលខ្លួនបានសន្យា ដោយផ្ដល់មកវិញនូវហេតុផលគ្រប់បែបគ្រប់យ៉ាង។
ជាការពិតណា ហេតុនិងផល ដែលបានលើកយកមកការពារខ្លួននោះ វាគ្រាន់តែជាលេសផ្ទាល់ខ្លួន របស់បុគ្គលដែលមិនគោរពសម្ដីតែប៉ុណ្ណោះ។ ប៉ុន្តែហេតុផលនោះវាមិនបានដោះស្រាយបញ្ហា ឬបង្ហាញពីតម្លៃរបស់បុគ្គលឡើយ។ ព្រោះក្នុងករណីបែបនេះ បុគ្គលនោះគឺបានបង្ហាញយ៉ាងច្បាស់ពីខ្លួនឯងរួចទៅហើយថា ជាបុគ្គលគ្មានភាពសច្ច គ្មានមនសិការ ខ្វះការទទួលខុសត្រូវ គ្មានវិន័យ ខ្វះសីលធម៌ ខ្វះខាតផ្នែកសតិសម្បជញ្ញៈ ដែលជាមូលដ្ឋានតម្លៃរបស់មនុស្ស។
ហេតុដូច្នេះ ធ្វើជាមនុស្ស គឺត្រូវពិចារណាពីសកម្មភាពផ្ទាល់ខ្លួន អំពើ និងគំនិតខ្លួនឯង មុនធ្វើការសម្រេចចិត្ត ឬសន្យាអ្វីមួយ។ ប្រសិនបើខ្លួនអាចធ្វើបាន គឺត្រូវតែតាំងចិត្តថាធ្វើឲ្យបាន តែបើធ្វើមិនបានកុំសន្យា។ យ៉ាងណា បើសិនជាខ្លួនធ្លាប់ខុសក្នុងករណីនេះ ត្រូវតែកែកំហុស កុំបន្តជាទម្លាប់ ជាវប្បធម៌ ដែលនាំឲ្យអ្នកដទៃអស់ជំនឿចិត្តចំពោះខ្លួន៕
© រក្សាសិទ្ធិដោយ thmeythmey.com