អត្ថបទពាណិជ្ជកម្ម
ក្រុមហ៊ុនអាកាសចរជាតិ កម្ពុជា អង្គរ អ៊ែរ និង អាកាសចរ ជីន អ៊ែរ (Jin Air) ចុះហត្ថលេខាលើអនុស្សារណៈយោគយល់ (MOU)
× កាលពីថ្មីៗនេះ ក្រុមហ៊ុនអាកាសចរជាតិ កម្ពុជា អង្គរ អ៊ែរ សហការជាមួយ ក្រុមហ៊ុនអាកាសចរ ជីន អ៊ែរ របស់សាធារណរដ្ឋកូរ៉េ ។ ក្រុមហ៊ុនទាំងពីរឈានដល់ការចុះហត្ថលេខាលើអនុស្សារណៈយោគយល់ ដែលបានប្រព្រឹត្តទៅនៅស្នាក់កណ្តាលរបស់ក្រុមហ៊ុនអាកាសចរជាតិ កម្ពុជា អង្គរ អ៊ែរ រាជធានីភ្នំពេញ ។
អនុស្សារណៈយោគយល់ អាកាសចរទាំងពីរ នឹងធ្វើកិច្ចសហប្រតិបត្តិការលើផ្លូវហោះហើររបស់អាកាសចរនីមួយៗ និង បង្កើនសុវត្ថិភាពហោះហើរតាមរយះការផ្លាស់ប្តូរព័ត៌មាន រួមជាមួយការជួយគាំទ្រផ្នែកសម្ភារៈបចេ្ចកទេសគ្នាទៅវិញទៅមក ។
ការចុះហត្ថលេខានេះធ្វើឡើងមានរយះពេល ៤៧ ថ្ងៃក្រោយ ការចាប់ផ្តើមហោះហើរត្រង់ រវាងរាជធានីភ្នំពេញ និង រដ្ឋធានី សេអ៊ូល ៤ជើង ក្នុងមួយសប្តាហ៍ដោយប្រើប្រាស់យន្តហោះប្រភេទ អ៊ែរប៊ើស A៣២១ របស់ក្រុមហ៊ុនអាកាសចរជាតិ កម្ពុជា អង្គរ អ៊ែរ ។
អាកាសចរជាតិ កម្ពុជា អង្គរ អ៊ែរ ជឿជាក់ថាកិច្ចសហប្រតិបត្តិការជាមួយអាកាសចរ ជីន អ៊ែរ នឹងបង្កើនជំរើសសម្រាប់អ្នកធ្វើដំណើររវាង ព្រះរាជាណាចក្រ កម្ពុជា និង សាធារណរដ្ឋ កូរ៉េ ។ អ្នកដំណើរអាចប្រើប្រាស់សំបុត្រតែមួយក្នុងការធ្វើដំណើរតាមជើងហោះហើររបស់ អាកាសចរជាតិ កម្ពុជា អង្គរ អ៊ែរ ភ្ជាប់ជាមួយជើងហោះហើរ ក្នុងស្រុក និង អន្តរជាតិ របស់អាកាសចរ ជីន អ៊ែរ ។ បន្ថែមលើនេះទៅទៀត អតិថិជននឹងរីករាយជាមួយការផ្តល់ជូនពិសេស ដូចជា តម្លៃ និង សេវាកម្មផ្សេងនៅលើយន្តហោះ ។ មិនតែប៉ុណ្ណោះ អាកាសចរកម្ពុជា អង្គរ អ៊ែរ នឹងបង្កើនសេវាកម្មលើយន្តហោះតម្រូវតាមស្តង់ដាររបស់អាកាសចរ ជីន អ៊ែរ និង ពង្រឹងបន្ថែមសុវត្ថិភាពហោះហើរដោយមានការគាំទ្រផ្នែកសម្ភាៈបច្ចេកទេសពីអាកាសចរជាដៃគូរ ។
ដោយឡែកនៅថ្ងៃទី ១៧ ខែមិថុនានេះ អាកាសចរកម្ពុជា អង្គរ អ៊ែរ នឹងចាប់ដំណើរការហោះហើរ ត្រង់រវាង ទីក្រុងព្រះសីហនុ និង ទីក្រុង ហូជីមិញ ៥ជើងក្នុងមួយសប្តាហ៍ ដែលជាជើងហោះហើរអន្តជាតិទីមួយរបស់ក្រុមហ៊ុន ចេញពីខេត្ត ព្រះសីហនុ ។ ផ្លូវហោះហើរថ្មីមួយទៀតរវាង ខេត្តសៀមរាប និង ខេត្តដាណាង ប្រទេសវៀតណាម ក៏នឹងចាប់ដំណើរការ ក្នុងថ្ងៃទី០១ ខែកក្កដា ៣ជើងក្នុងមួយសប្តាហ៍ ។
អាស័យដ្ឋាន៖ ២០៦អេ មហាវិថីព្រះនរោត្តម សង្កាត់ ទន្លេបាសាក់ ខណ្ឌ ចំការមន រាជធានីភ្នំពេញ ប្រទេសកម្ពុជា
ទូរសព្ទលេខ ០២៣ ៦៦៦៦ ៧៨៧ ទូរសារលេខ ០២៣ ២១២ ៥៦៤ គេហទំព័រ៖ www.cambodiaangkorair.com
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com