ពីនេះ ពីនោះ
ចង់ទទួលបានរឿងពិតអ្នកណាជាអ្នកទទួលខុសត្រូវ?
× ភ្នំពេញ៖ ដើម្បីរក្សាបានការសហការគ្នាបានល្អ ការសម្រេចចិត្តត្រូវ គឺត្រូវការជាចាំបាច់ការទទួលបានព័ត៌មានច្បាស់លាស់ និងគ្រប់ជ្រុងជ្រោយ។ ចំណែក វាសនាប្រជាពលរដ្ឋ អនាគតសង្គមជាតិ ត្រូវការជាចាំបាច់ព័ត៌មានគ្រប់ជ្រុងជ្រោយ ព័ត៌មានពិត សម្រាប់ថ្នាក់ដឹកនាំ សម្រាប់ប្រជាជន យកមកផ្ទៀងផ្ទាត់ ដើម្បីធ្វើសេចក្ដីសម្រេចចិត្តណាមួយក្នុងបុព្វហេតុផលប្រយោជន៍ជាតិ។
កន្លងទៅមានរឿងជាច្រើនបានកើតមានឡើងបង្ករជាបញ្ហា ជាទំនាស់ ប្រកាន់បក្ស ប្រកាន់និន្នាការគឺព្រោះតែការផ្សព្វផ្សាយព័ត៌មានមិនពិត នាំឲ្យភាគីនានាចេះតែមើលគ្នាក្នុងគំនិតមិនទុកចិត្តគ្នា។ ចំណែកផ្នែកអភិវឌ្ឍនមួយចំនួនវិញ ផ្ដល់ទិន្នន័យមិនច្បាស់លាស់ ព័ត៌មានមិនគ្រប់ជ្រុងជ្រោយ មិនបានសិក្សាឲ្យបានច្បាស់លាស់ ហើយចេះតែសរសេររបាយការណ៍ ជូនថ្នាក់លើ។ ចំណែកបញ្ហាខ្លះ ថ្នាក់លើបញ្ជាឲ្យថ្នាក់ក្រោមសរសរខុសដោយបំផ្លើស ឬបន្ថយព័ត៌មាន ដើម្បីផលប្រយោជន៍ណាមួយ ទីបំផុតពេលរដ្ឋដាក់ការសម្រេចចិត្តអ្វីមួយទៅ បញ្ហាចេះតែកើតមានមិនចេះចប់រវាងពលរដ្ឋ និងក្រុមហ៊ុន ពលរដ្ឋនិងរដ្ឋាភិបាលជាដើម។ តើបញ្ហានៅកន្លែងណា? បញ្ហាមួយភាគធំគឺមកពីព័ត៌មានមិនពិត។
ដូច្នេះហើយ បកមកគិតពីរឿងជាតិវិញ គ្រប់ភាគីដែលមានអត្ថិភាពក្នុងសង្គមមួយនេះ គួរនាំគ្នាផ្សាយភាពស្មោះត្រង់ឲ្យគ្នា ផ្ដល់នូវអ្វីដែលជាតថភាពឲ្យគ្នា ដើម្បីសេចក្ដីសុខទាំងអស់គ្នាក្នុងនាមជាធាតុសង្គមដូចគ្នា។ ជាពិសេស គឺភាគីដែលធ្វើកិច្ចការផ្នែកផ្សព្វផ្សាយព័ត៌មាន។ ដោយហេតុថា ព័ត៌មានពិត ជាមធ្យោបាយមួយដ៏ល្អប្រសើរបំផុត ក្នុងការកំណត់ជោគវាសនាប្រទេសជាតិ ដោយការគិតពិចារណាឲ្យបានគ្រប់ជ្រុងជ្រោយ មុននឹងសម្រេចចិត្តធ្វើអ្វីមួយ ចៀសវាងនូវការធ្វើសេចក្ដីសម្រេចចិត្តណាមួយ ដែលនាំឲ្យជាតិប្រឈមនិងវិនាសកម្ម។
យ៉ាងណាមិញ នៅក្នុងការរៀបចំសង្គម ការអប់រំ ការដោះស្រាយបញ្ហានយោបាយ វាគឺជាការលូកដៃចូលយ៉ាងសំខាន់នៃការផ្ដល់ព័ត៌មាន ដែលអាចនាំឲ្យមានតម្លាភាព គណនេយ្យភាព និងអាចនាំឲ្យសេវាសាធារណៈកាន់តែល្អប្រសើរឡើងសម្រាប់ប្រជាជាតិ សន្តិភាព និងការអភិវឌ្ឍនសង្គម។ ហេតុនេះ ដើម្បីទទួលបានព័ត៌មានពិតគឺមិនមែនជាកាតព្វកិច្ចចំពោះតែអ្នកណាម្នាក់នោះទេ ប៉ុន្តែគឺជាកាតព្វកិច្ចរបស់មនុស្សទូទៅក្នុងសង្គម ជាពិសេសភាគីស្ថាប័នព័ត៌មាន។
© រក្សាសិទ្ធិដោយ thmeythmey.com