ជាតិ
សេដ្ឋកិច្ច
ធនាគារពិភពលោក ផ្តល់កម្ចីគ្មានការប្រាក់ចំនួន ១៣០លានដុល្លារដល់កម្ពុជា
× ធនាគារពិភពលោក (World Bank) នៅថ្ងៃទី៩ខែមិថុនា ផ្តល់កម្ចីគ្មានការប្រាក់ចំនួន ១៣០ លានដុល្លារអាមេរិកដល់រដ្ឋាភិបាលកម្ពុជា ដែលនឹងត្រូវប្រើប្រាស់លើគម្រោងអភិវឌ្ឍន៍ចំនួន៤។
យោងតាមសេចក្តីប្រកាសព័ត៌មានរបស់ធនាគារពិភពលោក ទឹកប្រាក់ចំនួន ៣០លានដុល្លារ ត្រូវប្រើប្រាស់លើគម្រោងលើកកម្ពស់គុណភាពសុខាភិបាលនៅកម្ពុជា ខណៈថវិកាចំនួន ១៥ លានដុល្លារ ត្រូវអនុវត្តន៍ក្នុងគម្រោងលើកកម្ពស់ការគ្រប់គ្រងទឹក និងជលផល នៅតាមអាងទន្លេមេគង្គភាគឦសានកម្ពុជា។ ដោយឡែក ទឹកប្រាក់ចំនួន ៦០លានដុល្លារទៀតត្រូវប្រើលើគម្រោងថែទាំផ្លូវថ្នល់ ស្របគ្នាដែលថវិកាចំនួន ២៥លានដុល្លារត្រូវចំណាយលើគម្រោងលើកកម្ពស់ជីវភាពពលរដ្ឋតាមខេត្តចំនួន៥។
សេចក្តីប្រកាសព័ត៌មាន បញ្ជាក់ថា កម្ចីចំនួន ១៣០លានដុល្លានេះ ជាឥណទានគ្មានការប្រាក់របស់ធនាគារពិភពលោក ដែលរដ្ឋាភិបាលកម្ពុជា ត្រូវសងត្រឡប់វិញនៅចន្លោះពី ២៥ ទៅ ៤០ឆ្នាំ។ ហើយរយៈពេលនៃការចាប់ផ្តើមសងគឺនៅចន្លោះពី ៥ ទៅ ១០ឆ្នាំបន្ទាប់ពីខ្ចី។
ជាមួយគ្នានេះដែរ រដ្ឋាភិបាលអូស្រា្តលី, ធនាគារអភិវឌ្ឍន៍អាល្លឺម៉ង់ និងភ្នាក់ងារសហប្រតិបត្តិការអន្តរជាតិកូរ៉េ បានផ្តល់ជំនួយឥតសំណងប្រមាណ ៥០លានដុល្លារបន្ថែម លើកម្ចីរបស់ធនាគារពិភពលោក ដើម្បីប្រើប្រាស់លើគម្រោងលើកកម្ពស់គុណភាពសុខាភិបាលនៅកម្ពុជា។
គួរបញ្ជាក់ថា រដ្ឋាភិបាលកម្ពុជាក៏បានរួមចំណែកជាថវិកាបដិភាគប្រមាណ ១០២លានដុល្លារអាមេរិកបន្ថែម លើហិរញ្ញប្បទានរបស់ធនាគារពិភពលោក និងដៃគូអភិវឌ្ឍន៍ផ្សេងទៀត ដែលនឹងត្រូវប្រើប្រាស់ លើគម្រោងទាំង៤ខាងលើនេះផងដែរ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ចនិងហិរញ្ញវត្ថុ៕
Tag:
ធនាគារពិភពលោក
កម្ចី
© រក្សាសិទ្ធិដោយ thmeythmey.com